சுய இயக்கத் துகள்கள் கண்ணாடியின் பலத்தை அதிகரிக்க உதவுகின்றன

ஹைதராபாத் டாடா அடிப்படை ஆராய்ச்சி நிறுவனம் (TIFR) மற்றும் டஸ்ஸல்டார்ஃப் ஹைன்ரிச் ஹைன் பல்கலைக்கழகம் (HHU) ஆகியவற்றின் ஆராய்ச்சியாளர்கள், நிலையான கண்ணாடிகளின் முறிவு தன்மையை குறைக்க ஒரு கோட்பாட்டுக் கட்டமைப்பை உருவாக்கியுள்ளனர். ரஷ்மி பிரியா மற்றும் ஸ்மராஜித் கர்மாகர் தலைமையிலான இந்த ஆய்வு, கண்ணாடியில் சுய இயக்கத் துகள்களைச் சேர்ப்பது அதன் முறிவு செயல்முறையை மாற்றுவதன் மூலம் அதன் பலத்தை அதிகரிக்க முடியும் என்று கூறுகிறது.

அதிக வலிமைக்குப் பெயர் பெற்றவை நிலையான கண்ணாடிகள். ஆனால் தாங்கும் எல்லையை மீறி அழுத்தம் கொடுத்தால், அவை திடீரென உடைந்துவிடுகின்றன. இந்த முறிவு தன்மை, சேதம் ஒரே வெட்டுப் பட்டையில் திரண்டு திடீர் முறிவை ஏற்படுத்துவதால் உருவாகிறது. சீரற்று நகரும் சுய இயக்கத் துகள்களைச் சேர்த்தால், அழுத்தம் பகிரப்படும் விதம் மாறுகிறது. இதனால் கண்ணாடி அதிக சுமையைத் தாங்கும்; திடீரென உடையாமல் மெல்ல மெல்லவே முறியும் என்று குழு கூறுகிறது.

ஆராய்ச்சியாளர்கள், தங்களின் சொந்த எரிபொருளை ஏந்தி, பாக்டீரியா அல்லது செயற்கை கலோயிடுகள் போல நகரும் செயல்பாட்டுத் துகள்கள், கண்ணாடியின் அழுத்த-திரிபு வளைவை மாற்ற முடியும் என்பதை சிமுலேஷன்கள் மூலம் காட்டினர். அழுத்தம் திடீரென வீழ்ச்சி அடையாமல், வளைவு படிப்படியாக இறங்குகிறது. அதாவது, உருமாற்றம் ஒரே தளத்தில் குவியாமல், பல பட்டைகளாகப் பரவுகிறது என்பதை இது காட்டுகிறது. இந்த மாற்றம், வெட்டு விசைகளுக்கும் செயல்பாட்டுத் துகள்களின் இயக்கத்திற்கும் இடையேயான தொடர்பால் ஏற்படுகிறது.

சுய இயக்கத் துகள்களின் நிலைத்தன்மை நேரம்—அவை ஒரு திசையில் நகரும் நேரம்—இந்த செயல்முறையில் முக்கிய பங்கு வகிக்கிறது என்று ஆய்வு குறிப்பிடுகிறது. நிலைத்தன்மை நேரம் குறைவாக இருந்தால், துகள்கள் வெட்டுப் பட்டைகளின் வலையமைப்பை உருவாக்கி கண்ணாடியை பலப்படுத்துகின்றன. ஆனால் அந்த நேரம் அதிகமானால், கண்ணாடி எளிதில் உருமாறிவிடுகிறது.

இந்தக் கண்டுபிடிப்புகள் இப்போதைக்கு கோட்பாட்டு அளவில்தான் உள்ளன. ஒளியால் இயக்கக்கூடிய செயல்பாட்டுத் துகள்கள் கொண்ட அடர்த்தியான கலோயிட் அமைப்புகளில் இவற்றை சோதனை மூலம் உறுதிசெய்ய ஆராய்ச்சியாளர்கள் திட்டமிட்டுள்ளனர். இந்த ஆராய்ச்சி, கண்ணாடியின் பலத்தை அதிகரிக்க புதிய வழியை வழங்குவதோடு, செயல்பாட்டு பொருள் மற்றும் சீரற்ற திடவியல் ஆகிய துறைகளை இணைக்கிறது.