எட்னா எரிமலையில் வாரக்கணக்கில் ஒரு வெடிப்பு, மணிநேரத்தில் மற்றொன்று ஏன்?

கார்னெல் பல்கலைக்கழகத்தின் தலைமையிலான ஆய்வுக் குழு, இத்தாலியில் உள்ள எட்னா எரிமலையின் இரு பெரும் வெடிப்புகளை மீள்கட்டமைத்தது. இதில், மாக்மா மேற்பரப்பை அடைய முற்றிலும் வேறுபட்ட பாதைகளையும் வேகங்களையும் கடைப்பிடித்ததைக் குழு கண்டறிந்துள்ளது. இந்த ஆய்வு முடிவுகள் Geochemistry, Geophysics, Geosystems இதழில் வெளியிடப்பட்டுள்ளன. இவை, எதிர்கால எரிமலை வெடிப்புகளின் இடர் அளவை மதிப்பிடும் மாதிரிகளை மேம்படுத்த உதவக்கூடும்.

புவி மற்றும் வளிமண்டல அறிவியல் துறையின் பேராசிரியர் எஸ்டெபான் காசெல் இக்குழுவுக்குத் தலைமை தாங்கினார். இவர்களது குழு, தாங்களே உருவாக்கிய ராமன் ஸ்பெக்ட்ரோஸ்கோபி எனும் நுட்பத்தைப் பயன்படுத்தி, மாக்மாவுக்குள் உருவான படிகங்களை ஆய்வு செய்தது. அவற்றுக்குள் சிக்கியுள்ள நுண் வாயு குமிழிகளையும் அளந்தது. இவை மனித முடியின் கனத்தில் சுமார் 1 முதல் 10% அளவே. இந்தக் குமிழிகளில் உள்ள கார்பன் டை ஆக்சைடின் அடர்த்தியை அளந்து, ஆய்வாளர்கள் அழுத்தத்தையும், பின்னர் ஆழத்தையும் கணக்கிட்டனர்.

இந்த ஆய்வின் முதன்மை ஆசிரியர் மாக்சிம் கவ்ரிலெங்கோ, கார்னெல் பல்கலைக்கழகத்தின் முன்னாள் பிந்தைய முனைவர் ஆய்வாளர் ஆவார். கொலம்பியா பல்கலைக்கழகத்தின் டெர்ரி பிளாங்க் மற்றும் ஹவாய் பல்கலைக்கழகத்தின் (மனோவா) புரூஸ் ஹவுட்டன் ஆகியோர் மாதிரிகளைச் சேகரிக்க எட்னா எரிமலைக்குச் சென்றனர். கிமு 122ஆம் ஆண்டு நிகழ்ந்த ஒரு வெடிப்பு, மெக்னீசியம் மற்றும் இரும்பு நிறைந்த, குறைந்த பாகுத்தன்மை கொண்ட மேஃபிக் மாக்மாவால் ஏற்பட்டது. இது, கிபி 79ஆம் ஆண்டு வெசூவியஸ் எரிமலை வெடிப்பை விவரித்த மூத்த பிளினியின் பெயரால் அழைக்கப்படும் மிகவும் வெடிப்புத்தன்மை கொண்ட பிளீனியன் வெடிப்பு ஆகும்.

அந்த வெடிப்பில், மாக்மா சுமார் 22 கிலோமீட்டர் ஆழத்தில் இருந்து மேலெழும்பத் தொடங்கியது. ஆனால் மெதுவாக நகர்ந்து, 2 முதல் 5 கிலோமீட்டர் ஆழத்தில் தேங்கி, பல வாரங்கள் அங்கேயே தங்கி, படிப்படியாக வாயுவை வெளியிட்ட பின்னரே வெடித்தது. கிட்டத்தட்ட 4,000 ஆண்டுகளுக்கு முன் நிகழ்ந்த 'ஃபால் ஸ்ட்ராடிஃபைட்' எனும் இரண்டாவது வெடிப்பில், மாக்மா 24 முதல் 30 கிலோமீட்டர் ஆழத்தில் இருந்து வேகமாக மேலெழுந்து, வாரங்களுக்குப் பதிலாக சில மணிநேரங்களிலேயே வெடித்தது. இது மிக அதிக அளவு கார்பன் டை ஆக்சைடுடன் தொடர்புடையதாக இருந்தது.

கார்பன் டை ஆக்சைடும் நீரும் போட்டியிட்டு வெடிப்பைக் கட்டுப்படுத்தும் உலகின் ஒரு சில எரிமலைகளில் எட்னாவும் ஒன்று என காசெல் கூறினார். கார்பன் டை ஆக்சைடின் அளவு அதிகமாக இருந்தால், வெடிப்பு ஆழத்தில் இருந்து வேகமாக நிகழும். நீரின் அளவு அதிகமாக இருந்தால், செயல்முறை மேற்பரப்புக்கு அருகில் கட்டுப்படுத்தப்படும். இதே நுட்பத்தைப் பயன்படுத்தி, சிலி, ஹவாய் உள்ளிட்ட பல பகுதிகளில் உள்ள எரிமலைகளை இக்குழு இப்போது ஆய்வு செய்து வருகிறது. இது எரிமலை இடர் மதிப்பீட்டுக்கான இயற்பியல் மாதிரிகளுக்குத் தேவையான தரவை உருவாக்கும்.