வெயிலில் குளிர்ச்சி தரும் ஊதா நிற துணி வந்தது!

ஜெங்ஜோ பல்கலைக்கழகம், அடிலெய்டு பல்கலைக்கழகம், தென் ஆஸ்திரேலியா பல்கலைக்கழகம் மற்றும் மத்திய சீனா நார்மல் பல்கலைக்கழக ஆராய்ச்சியாளர்கள் இணைந்து, வெயிலிலும் குளிர்ச்சியாக இருக்கும் ஊதா நிற துணியை உருவாக்கியுள்ளனர். வெள்ளை நிறத் துணி மட்டுமே வெப்பத்தைத் தவிர்க்க முடியும் என்ற எண்ணத்தை இது மாற்றுகிறது. இந்த ஆய்வு Small ஆய்விதழில் வெளியாகியுள்ளது. கோபால்ட் அடிப்படையிலான ZIF-67 எனும் மெட்டல்-ஆர்கானிக் ஃப்ரேம்வொர்க் (MOF) ஒன்றை ஜிங்க் ஆக்சைடு நானோ துகள்களுடன் ஆராய்ச்சிக் குழு இணைத்துள்ளது.

“குளிர்ச்சித் திறனுக்கும் தோற்றத்துக்கும் இடையே தேர்வு செய்ய வேண்டிய நிலை பாரம்பரியமாக இருந்தது” என அடிலெய்டு பல்கலைக்கழக பொருள் பொறியியலாளர் ஜூன் மா தெரிவித்தார். “இரண்டையும் ஒருங்கே பெறமுடியும் என எங்கள் ஆய்வு காட்டுகிறது. ஊதா நிறத்தில் தெரியும் அதே வேளையில், சூரிய ஒளியில் பெரும்பகுதியைப் பிரதிபலித்து, வெப்பத்தை மிக திறனுடன் வெளியேற்றும் துணியை நாங்கள் உருவாக்க முடியும்” என்று அவர் கூறினார். ZIF-67, ஒளிப் பகுதியில் மட்டுமே ஒளியை உறிஞ்சி, நியர்-அகச்சிவப்பில் அதிக பிரதிபலிப்புத் திறன் கொண்டது; மிட்-அகச்சிவப்பில் குறிப்பிடத்தக்க அளவு கதிர்வீச்சை வெளியிட்டு, வெப்பம் குவியாமல் தடுக்கிறது.

இந்த MOF பொருளை அணியக்கூடிய துணியாக மாற்ற, தெர்மோபிளாஸ்டிக் பாலியூரிதேன் இழைகளை ஒற்றைக்கட்ட எலக்ட்ரோஸ்பின்னிங் முறையில் குழு உருவாக்கியது. இதனால் கிடைத்த துணி, விழும் சூரிய ஒளியில் கிட்டத்தட்ட 88%-ஐப் பிரதிபலிக்கிறது; மிட்-அகச்சிவப்பு பகுதியில் தன் ஒளியில் 96%-க்கு மேல் வெளியிடுகிறது. ஜிங்க் ஆக்சைடு நானோ துகள்களைச் சேர்த்ததால், நியர்-புற ஊதா கதிர்களையும் இந்தத் துணி உறிஞ்ச முடிந்தது.

சீனாவின் ஜெங்ஜோவில் வெயில் நாளன்று நடத்திய வெளிப்புற சோதனையில், 5 சென்டிமீட்டர் சதுர அளவிலான ஊதா துணித் துண்டுகள் வெப்பநிலையை 5.6°C குறைத்தன்; வெள்ளை பாலியூரிதேன் துண்டுகள் 3.1°C மட்டுமே குறைத்தன. இரவில் இந்த வித்தியாசம் இன்னும் அதிகமாக இருந்தது. ஊதா துணி 3.4°C குளிர்ச்சியாக இருந்தது, வெள்ளை துணியோ 1.2°C மட்டுமே குளிர்ச்சியாக இருந்தது. இந்தத் துணி நீரை விலக்கும் தன்மை கொண்டது; 50 முறை துவைத்த பிறகும் அதன் குளிர்ச்சித் திறனைத் தக்கவைத்தது.

“குளிர்ச்சித் துணிகள் வெள்ளையாகவே இருக்க வேண்டும் என்ற எண்ணத்தைத் தாண்டிச் செல்வதே நீண்டகால இலக்கு” என அடிலெய்டு பல்கலைக்கழக வேதியியல் பொறியியல் பள்ளியின் முனைவர் பட்ட ஆய்வாளர் யாங்ஷி ஹோ தெரிவித்தார்.