ரோமானியப் பேரரசு வீழ்ச்சிக்குப் பின் ஐரோப்பா மாறியது எப்படி? தொல் டிஎன்ஏ வெளிச்சம்

தொல் மனித டிஎன்ஏவையும் தொல்லியல் சான்றுகளையும் இணைத்த ஒரு புதிய ஆய்வு, ரோமானியப் பேரரசு வீழ்ந்த பின் 'காட்டுமிராண்டிகள்' மட்டுமே ஐரோப்பாவை ஆண்டனர் என்ற பழைய எண்ணத்தை மறுபரிசீலனை செய்கிறது. ஹிஸ்டோஜீன்ஸ் (HistoGenes) திட்டத்தின் கீழ், ஸ்டோனி ப்ரூக் பல்கலைக்கழகத்தின் யிஜீ டியானும் ஹங்கேரியின் ஏட்வோஸ் லொராண்ட் பல்கலைக்கழகத்தின் இஸ்த்வான் கோன்ட்ஸும் தலைமையில், வடமேற்கு ஹங்கேரியில் உள்ள 'லிட்டில் ஹங்கேரியன் பிளெயின்' (Little Hungarian Plain) பகுதியில் வாழ்ந்த 300க்கும் மேற்பட்டோரின் மரபணுத் தொகுப்பை ஆய்வாளர்கள் வரிசைப்படுத்தினர். இந்த ஆய்வு முடிவுகள் சயின்ஸ் (Science) இதழில் வெளியிடப்பட்டன.

ரோமானிய ஆட்சிக் காலத்தில், இப்பகுதி மக்கள் பெரும்பாலும் தென் ஐரோப்பிய மரபணு வழிமரபைக் கொண்டிருந்தனர்; அத்துடன் ரோமானியப் பேரரசின் பன்னாட்டுத் தன்மையை பிரதிபலிக்கும் வகையில் ஆசியா, ஆப்பிரிக்காவிலிருந்தும் குறிப்பிடத்தக்க மரபணு வேறுபாடு காணப்பட்டது. ரோமானிய ஆட்சி முடிந்த பின், இப்பகுதியில் வடக்கு ஐரோப்பிய மரபணு வழிமரபு அதிகரித்தது; இது பெருமளவு மக்கள் இப்பகுதிக்குள் புலம்பெயர்ந்ததைக் காட்டுகிறது.

மரபணுத் தரவையும் தொல்லியல் சான்றுகளையும் இணைத்தபோது, வடக்கு ஐரோப்பிய வழிமரபு கொண்டோர் இணைந்ததற்குக் காரணம், ஆறாம் நூற்றாண்டின் தொடக்கத்தில் டானூப் நதிக்கு வடக்கிலிருந்து முன்னாள் ரோமானியப் பகுதிகளுக்குள் விரிவடைந்த லோம்பார்ட் அரசின் விரிவாக்கமாக இருந்திருக்கலாம் என ஆய்வாளர்கள் கண்டறிந்தனர்; இது வரலாற்று ஆவணங்களில் பதிவாகியிருந்தாலும் இன்னும் விவாதத்திற்குரியதாகவே உள்ளது. இது ஒரே பெரும் புலப்பெயர்வு அல்ல; மாறாக, நீண்டகாலம் நீடித்த சிக்கலான புலப்பெயர்வுகளின் தொடர் என்றும், 'லிட்டில் ஹங்கேரியன் பிளெயின்' மக்களுக்கும் வடக்கே தொலைவில் உள்ள மக்களுக்கும் இடையே மரபணு தொடர்புகள் இருந்ததாகவும் ஆய்வாளர்கள் கண்டறிந்தனர்.

ரோமானிய ஆட்சி வலு இழந்த பின், புதிய குடியேறிகள் புதிய அரசியல் ஒழுங்கை உருவாக்கிய ஆளும் உயரடுக்குடன் கூடிய பன்முகப் படிநிலைச் சமூகத்தை உருவாக்கினர். 'குறுகிய, நீண்ட தூரங்களில் நடந்த படிப்படியான, உள்ளூர்மயமான புலப்பெயர்வுகளையும், கிழக்கு ஆசியாவிலிருந்து கார்பேதியன் படுகைக்குள் விரைவாக நடந்த பெரிய அளவிலான மக்கள் இடப்பெயர்வுகளையும் இத்திட்டம் வெளிக்கொணர்ந்துள்ளது' என ஹிஸ்டோஜீன்ஸ் திட்டத்தின் இணை முதன்மை ஆய்வாளரும் மேம்பட்ட ஆய்வு நிறுவனத்தின் (Institute for Advanced Study) வரலாற்றுப் பள்ளியில் ஓய்வுபெற்ற பேராசிரியருமான பேட்ரிக் கியரி தெரிவித்தார். 'பொருள் கலாச்சாரமும் மரபணு வழிமரபும் எப்போதும் ஒன்றுக்கொன்று பொருந்துவதில்லை என்பதையும் இது காட்டுகிறது' என அவர் மேலும் தெரிவித்தார்.

ஹிஸ்டோஜீன்ஸ் திட்டத்திற்கு ஐரோப்பிய ஆராய்ச்சி கவுன்சில் (European Research Council) நிதியுதவி அளிக்கிறது.