ஏழு செயற்கைக்கோள்களுடன் விண்ணில் பாய்ந்த சீனாவின் லாங் மார்ச் 6சி ராக்கெட்

செவ்வாய்க்கிழமை காலை ஏழு செயற்கைக்கோள்களைச் சீனா சுற்றுப்பாதையில் நிலைநிறுத்தியுள்ளதாக அந்நாட்டின் முன்னணி விண்வெளி ஒப்பந்த நிறுவனமான சைனா ஏரோஸ்பேஸ் சயின்ஸ் அண்ட் டெக்னாலஜி கார்ப் தெரிவித்துள்ளது. ஷான்சி மாகாணத்தின் மலைப் பகுதியில் உள்ள தையுவான் செயற்கைக்கோள் ஏவுதளத்திலிருந்து காலை 11:21 மணிக்கு இந்த ராக்கெட் புறப்பட்டது. 43 மீட்டர் உயரமுள்ள லாங் மார்ச் 6சி ராக்கெட் இது. செயற்கைக்கோள்களை முன்னரே தீர்மானிக்கப்பட்ட சுற்றுப்பாதை இடங்களில் அது நிலைநிறுத்தியதாக அரசுக்குச் சொந்தமான அந்நிறுவனம் அறிவித்தது.

இரண்டு நிலைகள் கொண்ட லாங் மார்ச் 6சி ராக்கெட்டை ஷாங்காய் அகாடமி ஆஃப் ஸ்பேஸ்ஃபிளைட் டெக்னாலஜி உருவாக்கியது. இதன் விட்டம் 3.35 மீட்டர். திரவ ஆக்சிஜனையும் மண்ணெண்ணெயையும் எரிக்கும் மூன்று எஞ்சின்கள் இதை இயக்குகின்றன. புறப்படும்போது இதன் எடை 215 மெட்ரிக் டன். 500 கிலோமீட்டர் உயரத்தில் உள்ள சூரிய-ஒத்திசைவு சுற்றுப்பாதைக்கு சுமார் 2.4 டன் எடையை இது கொண்டு செல்ல முடியும். 300 கிலோமீட்டர் உயரத்தில் உள்ள தாழ் புவிச் சுற்றுப்பாதைக்கு 4 டன் எடையைச் சுமக்க முடியும்.

இந்தப் பயணத்தில் சென்ற செயற்கைக்கோள்களில் மூன்றை — ஏர்சாட் 14, ஏர்சாட் 15 மற்றும் லிங்ஷி-09 தாய் க்யூப்சாட் — பீஜிங்கைத் தலைமையிடமாகக் கொண்ட வணிக விண்வெளி நிறுவனமான கேலக்ஸிஸ்பேஸ் உருவாக்கியது. முழுமையான செயற்கைக்கோளையும் தரை அமைப்பையும் வெளிநாட்டு வாடிக்கையாளருக்குக் கேலக்ஸிஸ்பேஸ் ஏற்றுமதி செய்வது இதுவே முதல் முறை. செயற்கைக்கோள் தயாரிப்பு, ஏவுதல், சுற்றுப்பாதையில் ஒப்படைப்பு என முழுத் தொகுப்பையும் ஒரு தென்கிழக்கு ஆசிய நாட்டுக்கு ஒரு சீன வணிக விண்வெளி நிறுவனம் வழங்குவதும் இதுவே முதல் முறை என அந்நிறுவனம் கூறுகிறது.

ஷான்டோங் மாகாணம் ஜினானைத் தலைமையிடமாகக் கொண்ட ஏர்சாட் என்ற செயற்கைக்கோள் இயக்க நிறுவனத்துக்காக ஏர்சாட் 14, 15 தயாரிக்கப்பட்டன. இவற்றில் உயர்தெளிவுத் திறன் கொண்ட சிந்தெடிக் அபர்ச்சர் ரேடார்கள் உள்ளன. ஒளிக்குப் பதிலாக வானொலி அலைகளைப் பயன்படுத்திப் படங்களை உருவாக்குவதால், மேகங்களைத் தாண்டியும் இரவிலும் இவற்றால் பார்க்க முடியும். தனிப்பட்ட விண்வெளி சார்ந்த கிளவுட் பேலோடுகளும் இவற்றில் உள்ளன. ஒருங்கிணைந்த விண்வெளி சார்ந்த தகவல் தளத்தை உருவாக்கும் பணி இவ்விரு செயற்கைக்கோள்களுக்கும் உள்ளது. விண்வெளி சார்ந்த கணினி செயலாக்கத்தில் தனக்குக் கிடைத்த முக்கியமான முன்னேற்றம் இது என்று கேலக்ஸிஸ்பேஸ் இந்தப் பயணத்தை விவரிக்கிறது.

இதுவரை பத்துக்கும் மேற்பட்ட சிந்தெடிக் அபர்ச்சர் ரேடார் செயற்கைக்கோள்களை கேலக்ஸிஸ்பேஸ் ஏவியுள்ளது. இதனுடன், அந்நிறுவனம் சுயமாக உருவாக்கிய செயற்கைக்கோள்களின் மொத்த எண்ணிக்கை 49 ஆக உயர்ந்துள்ளது.