சீனக் குகையில் டெனிசோவான் மனித இனத்தின் அரிய எச்சங்கள் கண்டுபிடிப்பு

சீனாவின் யுன்னான் மாகாணத்தில் உள்ள பியான்·பு குகையில் குறைந்தது மூன்று டெனிசோவான்கள் வாழ்ந்தார்கள். இது 167,000 முதல் 134,000 ஆண்டுகளுக்கு முன் நடந்தது. இதை உறுதிப்படுத்தும் இரு புதிய ஆய்வுகள் செப்டம்பர் 9 அன்று நேச்சர் இதழில் வெளியாயின. அங்கு கிடைத்த கருவிகளும் விலங்கு எலும்புகளும், டெனிசோவான்கள் எவ்வாறு வாழ்ந்தார்கள் என்பதற்கான முதல் தெளிவான சான்றுகளை அளிக்கின்றன.

டெனிசோவான்கள் ஆசியா முழுவதும் சுமார் 400,000 முதல் 30,000 ஆண்டுகளுக்கு முன் வரை வாழ்ந்த ஒரு பழங்கால மனித இனம் ஆகும். நியண்டர்தால்களையும் நவீன மனிதர்களையும் விட இவர்கள் குறித்து மிகக் குறைவாகவே அறியப்பட்டுள்ளது. 2010-இல் சைபீரியாவின் டெனிசோவா குகையில் ஒரு பல்லும் விரல் எலும்பும் கிடைத்தன. அவற்றின் டிஎன்ஏவை பகுப்பாய்வு செய்ததன் மூலம்தான் இந்த இனம் முதன்முதலில் கண்டறியப்பட்டது. பிலிப்பீன்ஸ், திபெத், நியூ கினியா, ஆஸ்திரேலியா ஆகிய பகுதிகளின் இன்றைய மக்களிடம் டெனிசோவான் டிஎன்ஏ காணப்படுகிறது. ஆனால் நியண்டர்தால் தொல்லுயிர் எச்சங்கள் ஆயிரக்கணக்கில் கிடைத்திருக்கும் நிலையில், டெனிசோவான் தொல்லுயிர் எச்சங்கள் கைவிரல் விட்டு எண்ணக்கூடிய அளவே இதுவரை கிடைத்துள்ளன.

மியான்மர், லாவோஸ் நாடுகளின் எல்லையை ஒட்டியுள்ள யுன்னான் மாகாணத்தில் கைவிடப்பட்ட ஒரு கல்குவாரியில் 2019-இல் மேற்கொள்ளப்பட்ட சூழலியல் மறுசீரமைப்பு பணியின்போது பியான்·பு குகை கண்டுபிடிக்கப்பட்டது. பின்னர் நடத்தப்பட்ட அகழாய்வுகளில் நான்கு பற்கள், மண்டை ஓட்டின் இரு துண்டுகள், ஒரு கை எலும்புத் துண்டு ஆகியவை மீட்கப்பட்டன. புரத பகுப்பாய்வும் மைக்ரோ-சிடி ஸ்கேனும், அவற்றில் ஒரு டெனிசோவான் சிறப்பியல்பு காலஜன் மாறுபாடு இருப்பதை உறுதிசெய்தன. பற்களின் வடிவம் லாவோஸ் மற்றும் திபெத்தில் கிடைத்த டெனிசோவான் பற்களுடன் ஒத்திருந்தது. டெனிசோவான் தொல்லுயிர் எச்சங்கள் இப்போது உலகில் மொத்தம் ஐந்தே இடங்களில்தான் கிடைத்துள்ளன; பியான்·பு அவற்றில் மிக சமீபத்தியது.

இந்தக் குகையில் 190,000 முதல் 70,000 ஆண்டுகளுக்கு முந்தையதாக கணக்கிடப்பட்ட 1,300-க்கும் அதிகமான கல் கருவிகள் கிடைத்தன. 1,600-க்கும் அதிகமான அடையாளம் காணக்கூடிய விலங்கு எலும்புகளும் இருந்தன; பெரும்பாலும் அவை மான் இனத்தைச் சேர்ந்தவை. சில எலும்புகளில் வெட்டு, சிராய்ப்பு அடையாளங்களும் இருந்தன. அந்த 120,000 ஆண்டு கால குகை-வாழ்விடத்தில் வேறெந்த மனித இனமும் வாழ்ந்ததற்கான சான்று கிடைக்கவில்லை. விலங்குகளை வெட்டவும் இறைச்சியை நறுக்கவும் தோலை சிரைக்கவும் அந்தக் கருவிகளை டெனிசோவான்களே பயன்படுத்தினர் என ஆராய்ச்சியாளர்கள் கருதுகின்றனர்.

பிற இடங்களில் கிடைத்த டெனிசோவான் தொல்லுயிர் எச்சங்களுடன் மர்மோட் விலங்கு எலும்புகளும் இணைந்து கண்டறியப்பட்டுள்ளன. ஆனால் பியான்·புவில் கிடைத்த வெட்டப்பட்ட மான் எலும்புகள் வேறு ஒன்றைக் காட்டுகின்றன. இந்த இனம் வெவ்வேறு சூழல்களில் வெவ்வேறு விலங்குகளை வேட்டையாடியிருக்கலாம்.