எல் நினோ: 40 ஆண்டுகளில் 40% வலிமை அதிகரிப்பு, ஆய்வு

காலநிலை மாற்றம், பூமியின் மிக சக்திவாய்ந்த இயற்கை காலநிலை அமைப்புகளில் ஒன்றை தீவிரப்படுத்தி வருகிறது என மிச்சிகன் பல்கலைக்கழகத்தின் புதிய ஆய்வு கூறுகிறது. எல் நினோ என்பது சில ஆண்டுகளுக்கு ஒருமுறை நிகழும் ஓர் இயற்கை நிகழ்வு. இதில் பசிபிக் பெருங்கடலின் நடுவண் பகுதி வழக்கத்தை விட வெப்பமடைந்து, உலகம் முழுவதும் வானிலையைப் பாதிக்கிறது. தொழில்மயமாக்கலுக்கு முந்தைய காலத்தை விட, கடந்த 40 ஆண்டுகளில் எல் நினோ நிகழ்வுகள் கிட்டத்தட்ட 40% அதிக வலிமை பெற்றுள்ளன என்று ஆய்வு கண்டறிந்துள்ளது. மனிதர்கள் பசுமைக்குடில் வாயுக்களை வெளியிடத் தொடங்கிய 1850-க்கு முன்பிருந்த கிட்டத்தட்ட 1,000 ஆண்டுகளில் இருந்த எந்த எல் நினோவையும் விட இது வலிமையானது. இந்த ஆய்வு முடிவுகள் சயின்ஸ் ஆய்விதழில் வெளியிடப்பட்டுள்ளன.

இந்த வரலாற்றை மீட்டெடுக்க, முதன்மை ஆசிரியர் பேராசிரியர் ஜூலியா கோல் மற்றும் சக ஆய்வாளர்கள், காலபகோஸ் தீவுகளிலிருந்து 13 பவளப் பாறை மாதிரிகளை சேகரித்தனர். கோல், மிச்சிகன் பல்கலைக்கழகத்தின் புவி மற்றும் சூழலியல் அறிவியல் துறைத் தலைவராக உள்ளார். இவற்றில் உயிருடன் உள்ள பவளக் காலனிகளும், தொல்லுயிர் பவளப் பாறை பாறாங்கற்களும் அடங்கும். பவளங்கள் ஆண்டுக்கு 1 முதல் 2 செண்டிமீட்டர் வரை வளர்ந்து, கால்சியம் கார்பனேட் அடுக்குகளை சேர்க்கின்றன. இந்த அடுக்குகளின் வேதியியல் அமைப்பு ஒரு பவளப் பதிவை உருவாக்குகிறது; இது கடல் நீரின் கடந்தகால வெப்பநிலையைப் பதிவு செய்கிறது. ஆய்வுக் குழு ஒவ்வொரு அடுக்கிலும் ஸ்ட்ரான்சியம்-கால்சியம் விகிதத்தையும், ஆக்சிஜன் ஐசோடோப்பு விகிதத்தையும் அளந்தது. இவை இரண்டும் கடல் வெப்பநிலையின் குறியீடுகள்.

கடந்த 40 முதல் 50 ஆண்டுகளுக்கு முன், எல் நினோ நிகழ்வுகள் ஒப்பீட்டளவில் நிலையான, குறைந்த வலிமையுடன் இருந்ததாக பதிவுகள் காட்டுகின்றன. "கடந்த காலத்தில் இன்று உள்ளதைப் போல எல் நினோ இவ்வளவு வலிமையாக இருந்த காலத்தை நாம் காணவில்லை; உலக வெப்பநிலை உயருவதற்கு இணையாக எல் நினோவின் வலிமையும் மாறுவதை நாங்கள் காட்டுகிறோம்" என்று கோல் கூறினார். கடந்த 40 ஆண்டுகளின் பெரிய எல் நினோ நிகழ்வுகள், கடந்த 1,000 ஆண்டுகளின் பின்னணியில் "இயல்பானவை அல்ல" என்றும் அவர் மேலும் கூறினார்.

இந்த மாற்றத்தை இயற்கையான காரணங்கள் விளக்க முடியுமா என்று சரிபார்க்க, ஆய்வாளர்கள் கடந்த 1,000 ஆண்டுகளை பிரதிபலிக்கும் காலநிலை மாதிரிகளை இயக்கினர். இதற்கு எரிமலை வெடிப்புகள் மற்றும் சூரிய மாறுபாடுகளின் வரலாற்றுத் தரவுகளைப் பயன்படுத்தினர். இவ்வளவு பெரிய மாற்றத்தை உருவாக்கக்கூடிய எந்த இயற்கை செயல்முறையையும் அந்த மாதிரிகள் காணவில்லை. "இது மிகவும் தெளிவான ஒரு கதை" என்று கோல் கூறினார். வழக்கமாக ஆஸ்திரேலியா நோக்கிப் பாயும் பசிபிக் வெப்ப நீர், பலவீனமடையும் வர்த்தகக் காற்றின் காரணமாக மீண்டும் தென் அமெரிக்கா நோக்கி பாயத் தொடங்கும்போது எல் நினோ உருவாகிறது. இது ஒன்று முதல் இரண்டு ஆண்டுகள் வரை நீடிக்கும்.