தானாகச் சரிசெய்யும், நிறமூட்டும் 'உயிருள்ள துணி'யை உருவாக்கிய பூஞ்சை

சீனாவின் ஷென்சென் மேம்பட்ட தொழில்நுட்ப நிறுவனத்தை (SIAT) சேர்ந்த ஆராய்ச்சியாளர்கள், கார்டிசெப்ஸ் மிலிடாரிஸ் எனும் பூஞ்சையிலிருந்து 'உயிருள்ள துணி'களை உருவாக்கும் ஒரு 'நிரல்படுத்தக்கூடிய பூஞ்சை தளத்தை' வடிவமைத்துள்ளனர். இது சயின்ஸ் அட்வான்சஸ் இதழில் வெளியிடப்பட்டது. இதில் எலக்ட்ரானிக் சுற்றுகள் எதுவும் இல்லை. பூஞ்சையின் உயிரியல் பண்புகளான சூழலுக்கு ஏற்ப மாறுதல், வளர்தல், மீள்உருவாதல், நிறம் மாறுதல், தானாகச் சுத்தமாகும் பூச்சு ஆகியவை பதப்படுத்தப்பட்ட பிறகும் அப்படியே பாதுகாக்கப்படுவதே 'நிரல்படுத்தம்' எனப்படுகிறது.

ஆராய்ச்சியாளர்கள் முதலில் கார்டிசெப்ஸ் மிலிடாரிஸ் பூஞ்சையைத் திரவத்தில் வளர்த்தனர். இது மைசீலியல் பந்துகள் எனப்படும் சிறு பூஞ்சை இழைத் திரள்களை உருவாக்கியது. இவை அச்சுகளில் வைத்து உலர்த்தப்பட்டு, தொடர்ச்சியான தாள்களாக மாறின. இந்த தாள்கள் முதலில் எளிதில் உடையக்கூடியதாக இருந்தன. அதை மென்மையாக்கும் கிளிசரால் கொண்டு சிகிச்சையளித்ததால், மடிக்கவும் வெட்டவும் தைக்கவும் கூடிய, சாதாரண துணி போன்ற நெகிழ்வுத்தன்மை பெற்றன.

வண்ணமூட்டும் வேதிப் பொருட்களுக்குப் பதிலாக, பொறியியல் செய்யப்பட்ட ஈஸ்ட் சேர்க்கப்பட்டதால் நீலம், சிவப்பு, ஆரஞ்சு, ஊதா நிறங்களை பூஞ்சையே தானாக உற்பத்தி செய்தது. ஈரப்பதமான நிலையில் சில ஊட்டச்சத்துகளைப் பயன்படுத்தியபோது, பூஞ்சை இழைகளின் வளர்ச்சி தூண்டப்பட்டது. இதனால் சேதமான பகுதிகளைச் சரி செய்யவும், குறிப்பிட்ட வடிவங்களை உருவாக்கவும் துணி திறன் பெற்றது. வேறு சில ஊட்டச்சத்துகள், வெளிப்புற இரசாயனங்கள் இல்லாமலேயே தண்ணீரைத் தட்டிவிடும், தானாகச் சுத்தமாகும் மேற்பரப்பை உருவாக்கின. மெலனின் நிறைந்த இழைகளைக் கொண்ட ஆஸ்பர்ஜில்லஸ் நைஜர் எனும் மற்றொரு பூஞ்சையை வளர்த்ததால், துணிக்கு புற ஊதா கதிர் பாதுகாப்பும் கிடைத்தது.

இந்த செயல்பாடுகள் அனைத்தையும் இணைத்து ஆராய்ச்சியாளர்கள் ஒரு உண்மையான ஆடையையே தயாரித்தனர். முக்கிய பகுதிக்கு பொறியியல் ஈஸ்ட் அடர் நீல நிறத்தை உற்பத்தி செய்தது. விளிம்பில் நீர்-விலக்கும் பூஞ்சை இழைகள் இருந்தன. காலரில் ஊட்டச்சத்தால் தூண்டப்பட்ட வடிவங்களைக் கொண்ட இதழ் வடிவப் பகுதிகள் இருந்தன. இந்த ஆடை மண்ணில் 41 நாட்களுக்குள் கிட்டத்தட்ட முழுவதுமாக மக்கிவிட்டது. உற்பத்தியை பெரிய அளவில் விரிவாக்குவதும், துணியின் துவைக்கும் திறனையும் நீடித்திருக்கும் தன்மையையும் சோதிப்பதும் அடுத்த கட்ட ஆய்வுகள் என ஆராய்ச்சியாளர்கள் தெரிவிக்கின்றனர்.