OptoSAR-க்கு அமெரிக்க காப்புரிமை பெற்றது GalaxEye

இந்திய விண்வெளி தொழில்நுட்ப நிறுவனமான GalaxEye, தனது OptoSAR இமேஜிங் தொழில்நுட்பத்திற்கு அமெரிக்க காப்புரிமை பெற்றுள்ளது. இந்த தொழில்நுட்பம் ஒளியியல் சென்சார்களையும் செயற்கை துளையக ரேடாரையும் (SAR) இணைத்து, பூமியின் ஒரே பகுதியை பொருந்தும் வகையில் படம் பிடிக்கிறது. SAR என்பது செயற்கைக்கோள் நகரும்போது சேகரிக்கும் சிக்னல்களை இணைத்து உயர்தர படங்களை உருவாக்கும் ரேடார் தொழில்நுட்பம். இது பகலிலும் இரவிலும், மேகமூட்டத்திலும் இயங்கும். இதே அடிப்படை தொழில்நுட்பத்திற்கு ஏற்கெனவே இந்தியாவில் காப்புரிமை பெறப்பட்டுள்ளது.

ஒளியியல் மற்றும் SAR சென்சார்களை ஒரே நேரத்தில், ஒரே கோணத்தில், ஒரே இடத்தைப் படம் பிடிக்கும் வகையில் ஒத்திசைக்கும் அமைப்புக்கு இந்த காப்புரிமை பொருந்தும். வழக்கமாக ஒளியியல் மற்றும் SAR சென்சார்கள் தனித்தனியாக இயங்கும், அல்லது பின்னர் தரவுகளை இணைத்து செயலாக்கம் செய்யப்படும். வெவ்வேறு நேரங்களில், வெவ்வேறு கோணங்களில் எடுக்கப்படும் தரவுகளில் இடைவெளிகளும் இடப் பொருத்தமின்மையும் ஏற்படும். GalaxEye-இன் அமைப்பு இந்த இரண்டு சென்சார் முறைகளையும் அமைப்பு மட்டத்திலேயே ஒத்திசைக்கிறது. இதனால் ஒளியியல் படங்களின் காட்சி விவரமும், மேகம் மற்றும் இருட்டையும் ஊடுருவிப் பார்க்கும் SAR-இன் திறனும் ஒன்றிணைகின்றன.

"இது இந்தியாவிலிருந்து உருவான ஒரு கண்டுபிடிப்பு," என GalaxEye நிறுவனர் மற்றும் தலைமை நிர்வாக அதிகாரி சுயாஷ் சிங் தெரிவித்தார். இந்திய டீப்-டெக் நிறுவனங்கள் உலகளவில் தனித்துவமான தொழில்நுட்பத்தை உருவாக்கும் திறன் கொண்டவை என்பதை இந்த அமெரிக்க காப்புரிமை உறுதிசெய்வதாக அவர் கூறினார். அடுத்த ஐந்து ஆண்டுகளில் 30 செயற்கைக்கோள்களைக் கொண்ட வலையமைப்பை விரிவுபடுத்த திட்டமிட்டுள்ள நிலையில், இந்த காப்புரிமை தனது அறிவுசார் சொத்து நிலையை பலப்படுத்துவதாக GalaxEye தெரிவித்தது. பாதுகாப்பு, அரசு மற்றும் வணிக வாடிக்கையாளர்களுக்கு வேளாண்மை, உள்கட்டமைப்பு, காப்பீடு, கடல்சார் தரவு சேகரிப்பு, பேரிடர் மேலாண்மை உள்ளிட்ட பகுதிகளில் இது சேவை செய்யும்.

இந்த தொழில்நுட்பம் GalaxEye-இன் மிஷன் திருஷ்டி செயற்கைக்கோளுடன் தொடர்புடையது. இது பல்நிற இமேஜிங்கையும் (கண்ணுக்குப் புலப்படாத பல ஒளி அலைவரிசைகளில் படம் பிடிக்கும் முறை) SAR-ஐயும் ஒரே தளத்தில் இணைக்கும் உலகின் முதல் OptoSAR இமேஜிங் செயற்கைக்கோள் எனக் கூறப்படுகிறது. சுமார் 190 கிலோ எடை கொண்ட திருஷ்டி, மே மாதம் ஏவப்பட்ட காலகட்டத்தில் இந்தியாவின் மிகப்பெரிய தனியார் பூமி கண்காணிப்பு செயற்கைக்கோளாகவும் இருந்தது. ஆகஸ்ட் மாதம், தனது உள்நாட்டு செயற்கைக்கோள் பொறியியல் திறனை வலுப்படுத்த, பெங்களூரு நிறுவனமான StarOps-ஐ கையகப்படுத்துவதாக GalaxEye அறிவித்தது.