கடல் நீரிலிருந்து யுரேனியத்தை வடிகட்டும் மென்படலம்: IISc விஞ்ஞானிகள் வடிவமைப்பு

பெங்களூருவின் இந்திய அறிவியல் கழக (IISc) விஞ்ஞானிகள், கடல் நீரிலிருந்து யுரேனியத்தை பிரித்தெடுக்க ஒரு புதிய முறையை உருவாக்கியுள்ளனர். இதை நிலத்தடி நீரில் உள்ள யுரேனியக் கசிவை நீக்கவும் பயன்படுத்தலாம். இந்த நுட்பம் நீண்ட காலத்திற்கு அணுசக்தி எரிபொருள் தேவைகளை பூர்த்தி செய்ய உதவும் என்றும், சுற்றுச்சூழல், உடல்நல அபாயமான நிலத்தடி நீர் யுரேனியப் பிரச்சினையைத் தீர்க்க உதவும் என்றும் நிறுவனம் தெரிவிக்கிறது. நிலத்தில் உள்ள யுரேனிய இருப்புகள் வேகமாகக் குறைந்து வருகின்றன. நிலத்தில் சுமார் 7.5 மில்லியன் டன் யுரேனியம் உள்ளது. கடல் நீரிலோ சுமார் 4.5 பில்லியன் டன் யுரேனியம் கரைந்துள்ளது.

முந்தைய முறைகள், யுரேனியம் அயனிகளுடன் வேதியியல் ரீதியாக பிணையும் நுண்துளை கரிம பாலிமர்கள், செயல்பாட்டு நானோபொருட்களைப் பயன்படுத்தின. ஆனால் கடல் நீரில் வேறு பல அயனிகளும் உள்ளதால், யுரேனியத்தை மட்டும் தேர்ந்தெடுத்து பிரிப்பது கடினமாக இருந்தது. IISc-யின் இயற்பியல் துறை ஆராய்ச்சியாளர்கள், 'வழுக்கிய' கோவேலன்ட் ஆர்கானிக் ஃப்ரேம்வொர்க் (COF) மென்படலங்களை வடிவமைத்து இந்தச் சிக்கலைத் தீர்த்தனர். இந்த அடுக்கு அமைப்புள்ள பொருள்கள், யுரேனைல் அயனிகளை முழுவதுமாகத் தடுத்து, கடல் நீரின் பொதுவான அயனிகளை சுதந்திரமாகக் கடக்க விடுகின்றன.

பிரபல் கே. மைதியின் வழிகாட்டுதலில், யோகேந்திர குமார், பினு வர்கீஸ் ஆகியோர் தலைமையிலான குழு, பெங்களூருவின் ஆக்சென்ச்சர் லேப்ஸுடன் இணைந்து இந்த ஆய்வை நடத்தியது. அயனிகளின் நீரேற்ற அமைப்பு, மென்படலத்தின் இலவச-ஆற்றல் தடை, உராய்வு ஆகியவற்றை அவர்கள் ஆய்வு செய்தனர். COF அடுக்குகளின் குறிப்பிட்ட அமைப்பே தனிப்பட்ட அயனிகளின் நகர்வைக் கட்டுப்படுத்துகிறது என்பதை இது வெளிப்படுத்தியது. பழைய முறைகள் யுரேனியத்தைப் பிணைக்க வேதியியல் செயல்பாட்டுக் குழுக்களை நம்பியிருந்தன. புதிய முறையோ, அடுக்குகளை ஒன்றுக்கொன்று சற்று வழுக்க வைப்பதன் மூலம், COF அடுக்குகளின் நானோ அளவு அமைப்பையே முதன்மையாகப் பயன்படுத்தி அயனி நகர்வைக் கட்டுப்படுத்துகிறது.

அடுக்கு COF மென்படலங்களின் அமைப்பை துல்லியமாக வடிவமைப்பதன் மூலம், அயனிகளின் பாதையையும் ஆற்றல் நிலைகளையும் கட்டுப்படுத்த முடியும் என்பதை இந்த ஆய்வு நிரூபிக்கிறது என ஆராய்ச்சியாளர்கள் தெரிவிக்கின்றனர். இது சுற்றுச்சூழல், எரிசக்தித் துறைகளில் பொருட்களைத் தேர்ந்தெடுத்துப் பிரிக்கும் புதிய தொழில்நுட்பங்களுக்கு வழிவகுக்கும் என்றும் அவர்கள் கூறுகின்றனர்.