கிராண்ட் கேன்யனில் மறைந்த பில்லியன் ஆண்டுகள்: காரணம் பண்டைய பாறைச் சுவரா?

அமெரிக்காவின் கிராண்ட் கேன்யனின் ஆழமான, மிகப் பழமையான பாறைகள், இன்றைய கொலராடோ நதி அதைச் செதுக்குவதற்கு கிட்டத்தட்ட ஒரு பில்லியன் ஆண்டுகளுக்கு முன்பே வெளிப்பட்டிருக்கலாம் என சவுத்தாம்ப்டன் பல்கலைக்கழக ஆய்வாளர்கள் கூறுகின்றனர். ஒரு பிரம்மாண்டமான பண்டைய பாறைச் சுவர் அமைப்பு இதற்குக் காரணமாக இருந்திருக்கலாம் என்று அவர்கள் தெரிவிக்கின்றனர்.

இந்த "மாபெரும் பாறைச் சுவர்" சுமார் 800 மில்லியன் ஆண்டுகளுக்கு முன்பு, ரோடினியா எனப்படும் பண்டைய மாபெருங்கண்டம் பிளவுபட்ட காலத்தில் உருவானது என ஆய்வுக் குழு கூறுகிறது. இது சுமார் ஒரு கிலோமீட்டர் உயரமும், இன்றைய மேற்கு வட அமெரிக்கா முழுவதும் ஆயிரக்கணக்கான கிலோமீட்டர் நீளமும் கொண்டதாக இருந்திருக்கலாம். காலப்போக்கில் அரிப்பு இதைப் படிப்படியாக தேய்த்து, அரிசோனாவில் உள்ள கிராண்ட் கேன்யனில் இன்று ஆழத்தில் தெரியும் பண்டைய படிக அடித்தள பாறைகளை வெளிக்கொணர்ந்தது.

சவுத்தாம்ப்டன் பல்கலைக்கழகத்தின் புவி அறிவியல் பேராசிரியரும் இந்த ஆய்வின் முதன்மை ஆசிரியருமான தாமஸ் கெர்னான், கிராண்ட் கேன்யனின் பாறை வரலாறு சுமார் இரண்டு பில்லியன் ஆண்டுகள் பழமையானது எனினும், அதில் பாதிக்கும் மேற்பட்ட பகுதி காணாமல் போயிருப்பதாகக் கூறுகிறார். "பெரும் முரண்பாடு" (Great Unconformity) என அழைக்கப்படும் இந்த இடைவெளிக்கு, பாறைச் சுவரின் அரிப்பே காரணம் என ஆய்வுக் குழு வாதிடுகிறது.

பிளேட் டெக்டானிக் இயக்கங்களின் மறுகட்டமைப்புகளையும், நிலப்பரப்புகள் காலப்போக்கில் எப்படி மாறுகின்றன என்பதற்கான தரவுகளையும் இணைத்து ஆராய்ந்ததில், சில பகுதிகளில் இந்த பாறைச் சுவர் எட்டு கிலோமீட்டர் அளவு பாறையை அரித்திருக்கக் கூடும் என ஆய்வாளர்கள் மதிப்பிடுகின்றனர். இது, நவீன கேன்யன் உருவாவதற்கு முன் அப்பகுதியில் ஐந்து முதல் பத்து கிலோமீட்டர் பாறை இழந்திருக்கக்கூடும் என்ற தனி புவியியல் சான்றுகளுடன் ஒத்துப்போகிறது. இந்த பாறைச் சுவர் இன்றைய அரிசோனா, யூட்டா, ஐடஹோ, ஒயோமிங், கொலராடோ, டெக்சாஸ், ஒக்லஹோமா, அர்கன்சாஸ், மிசோரி மற்றும் இலினாய் ஆகிய பகுதிகள் வழியாக நீண்டிருக்கக்கூடும்.

Geology என்ற இதழில் வெளியான இந்த ஆய்வில், சவுத்தாம்ப்டன் பல்கலைக்கழகம், ஜெர்மனியின் GFZ ஹெல்ம்ஹோல்ட்ஸ் புவி அறிவியல் மையம் மற்றும் பாட்ஸ்டாம் பல்கலைக்கழகம், அமெரிக்காவின் இல்லினாய் பல்கலைக்கழகம் (அர்பானா-சாம்பெயின்) ஆகியவற்றின் ஆய்வாளர்கள் பங்கேற்றனர். சிக்கலான உயிரினங்கள் வேகமாகப் பெருகிய "கேம்பிரியன் வெடிப்பு" காலகட்டத்திற்கு முன்பு, இந்த பண்டைய மலைத் தொடர் அப்பகுதியின் நதிப் பாதைகளையும் வண்டல் படிவுகளையும் வடிவமைத்திருக்கக்கூடும் என ஆய்வாளர்கள் தெரிவிக்கின்றனர்.