வணிக ராக்கெட் ஏவுதல்களுக்காக ஹைனான் புதிய விண்வெளித் தரவு மையம்

தென் சீனாவின் ஹைனான் மாகாணம், தீவின் கிழக்குக் கடற்கரையில் உள்ள வெஞ்சாங்கில் ஆகஸ்ட் 24 முதல் 26 வரை நடைபெற்ற ஒரு விண்வெளி மாநாட்டின் விளைவாக, சர்வதேச விண்வெளித் தரவுச் சேவை மையத்தை நிறுவியுள்ளது. ஹைனான் சர்வதேச ஊடக மையத்தின்படி, தொடர்ச்சியான வணிக ராக்கெட் ஏவுதல்களுக்கான உள்கட்டமைப்பை நிறுவ, முக்கிய ஒப்பந்தங்கள் இந்த மாநாட்டில் கையெழுத்தானதாகத் தெரிவிக்கப்பட்டுள்ளது.

வெஞ்சாங் விண்வெளி நகர நிர்வாகம், சீன விண்வெளி அறிவியல் மற்றும் தொழில்நுட்ப கழகத்தின் வணிக ராக்கெட் பிரிவு உள்ளிட்ட 17 நிறுவனங்களுடன் மூலோபாய, கட்டமைப்பு ஒப்பந்தங்களில் கையெழுத்திட்டது. ஹைனான் ஸ்பேஸ் குரூப், சீனா காலக்ஸி செக்யூரிட்டீஸ் உள்ளிட்ட ஆறு நிறுவனங்களுடன் புரிந்துணர்வு ஒப்பந்தங்களில் கையெழுத்திட்டது. இந்த ஒப்பந்தங்கள் செயற்கைக்கோள் உற்பத்தி, நிதி, விண்வெளிச் சுற்றுலா ஆகிய துறைகளை உள்ளடக்கியவை. தொடர்ச்சியான வணிக ஏவுதல்களுக்கான அடித்தளத்தை இவை அமைக்கும். நுண்ணறிவு கணிப்புத் திறன் கொண்ட செயற்கைக்கோள் திரள்களுக்கான கூட்டு ஆய்வகமும் இந்த நிகழ்வில் திறக்கப்பட்டது.

வெஞ்சாங் சர்வதேச விண்வெளி நகர நிர்வாகத்தால் ஏற்பாடு செய்யப்பட்ட இந்த மாநாட்டிற்கு, அரசு நிறுவனங்களும் முன்னணி சீன வங்கிகள் பலவும் ஆதரவளித்தன. நிபுணர்கள், முதலீட்டாளர்கள், அதிகாரிகள் மறுபயன்பாட்டு ஏவுகணை தொழில்நுட்பம், தாழ் புவி சுற்றுவட்டப் பாதை செயற்கைக்கோள் இணையம் ஆகியவை குறித்து விவாதித்தனர். விண்வெளித் திட்டங்களுக்கான நிதி ஆதரவு, ஹைனான் தடையற்ற வர்த்தக துறைமுகத்தை தொழில்துறைக்குப் பயன்படுத்துவது ஆகியவையும் விவாதிக்கப்பட்டன.

ஹைனான் ஸ்பேஸ் குரூப் தலைவரும் மாகாணத்தின் சர்வதேச வணிக ஏவுதல் மையத் தலைவருமான லியூ ஹோங்ஜியன், இந்தத் தீவு உலகத் தரம் வாய்ந்த விண்வெளி அறிவியல் மற்றும் தொழில்துறைத் திரளாக வேகமாக வளர்ந்து வருவதாகக் கூறினார். வெஞ்சாங் மேயர் காவோ ஷூயு, ஏவுதல் திறன், தளவாடம் மற்றும் ராக்கெட் படி வீழும் பகுதிகளில் பாதுகாப்புக் கண்காணிப்பு ஆகியவற்றில் ஹைனானின் தனித்துவமான நன்மைகளை எடுத்துரைத்தார். இந்தத் தொழில்துறைத் திரள் செலவைக் கணிசமாகக் குறைப்பதுடன், ராக்கெட் அசெம்பிளி, தரவு பரிமாற்றம், செயற்கைக்கோள் உற்பத்தி, விண்வெளிச் சுற்றுலா ஆகியவற்றுக்கான திறன்களை அளிப்பதாகவும் அவர் தெரிவித்தார்.

இந்த ஆண்டு தொடக்கத்திலிருந்து மாகாணத்தின் விண்வெளி மையம் 11 ஏவுதல்களை மேற்கொண்டுள்ளது; புதிய ஏவுதள்கள் கட்டும் பணி விரைவாக நடந்து வருகிறது. அடுத்த ஐந்தாண்டுகளுக்கான முக்கியத் திட்டங்களில் செயற்கைக்கோள் திரள்களை நிலைநிறுத்துவது, மனிதர்கள் பங்கேற்கும் நிலவுத் திட்டம், கனரக ராக்கெட்டுகளை சுற்றுவட்டப் பாதையில் ஏவுவது ஆகியவை அடங்கும்.