இந்தியாவின் G20 காலநிலை செயற்கைக்கோள் 2027-இல் ஏவப்படும்: இஸ்ரோ தலைவர்

காலநிலை மற்றும் காற்று மாசு பற்றி ஆய்வு செய்யவும், வானிலையைக் கண்காணிக்கவும் வடிவமைக்கப்பட்ட G20 செயற்கைக்கோள் 2027-இல் ஏவப்படும் என இந்திய விண்வெளி ஆராய்ச்சி நிறுவன (இஸ்ரோ) தலைவர் வி. நாராயணன் தெரிவித்துள்ளார். G20 நாடுகளுக்காக இந்தத் திட்டத்தில் இந்தியா முன்னணிப் பங்கு வகிக்கிறது.

பாதுகாப்பு ஆராய்ச்சி மற்றும் மேம்பாட்டு நிறுவனம் (DRDO), இஸ்ரோ மற்றும் ஏரோநாட்டிகல் சொசைட்டி ஆஃப் இந்தியா ஆகியவற்றின் விஞ்ஞானிகளிடம் நாராயணன் ஹைதராபாத்தில் உள்ள இன்ஜினியரிங் ஸ்டாஃப் கல்லூரியில் பேசினார். ஒரே ராக்கெட்டைப் பயன்படுத்தி மோதலின்றி 100-க்கும் மேற்பட்ட செயற்கைக்கோள்களை சுற்றுப்பாதையில் நிலைநிறுத்திய முதல் நாடு இந்தியா என்று அவர் தெரிவித்தார்.

2040-க்குள் மனிதனை சந்திரனுக்கு அனுப்ப இஸ்ரோ பணியாற்றி வருவதாக அவர் தெரிவித்தார். இஸ்ரோ இதை சாதித்தால், ஏவுகல தொழில்நுட்பம், செயற்கைக்கோள் தொழில்நுட்பம், பயன்பாட்டுத் துறைகள் ஆகியவற்றில் இந்தியா மற்ற விண்வெளி நாடுகளுக்கு இணையாக இருக்கும். மனிதர்களை விண்வெளிக்கு அனுப்பும் திட்டத்திலும் இணையாக இருக்கும் என நாராயணன் தெரிவித்தார்.

இந்தியாவின் ஆழ்கடல் பணித் திட்டத்தின் கீழ் வரும் சமுத்திரயான் திட்டத்திற்காக, 2.2 மீட்டர் விட்டமும் 100 மில்லிமீட்டர் தடிமனும் கொண்ட டைட்டானியம் பாத்திரத்தை இஸ்ரோ தயாரித்து வருவதாகவும் நாராயணன் தெரிவித்தார்.