இஸ்ரோவின் ஓசன்சாட்-3 கண்டறிந்த கடல் உயிர்ச்சூழல் மாற்றம்: சூப்பர் எல்நினோ காரணம்

இந்திய விண்வெளி ஆய்வு நிறுவனமான இஸ்ரோவின் ஓசன்சாட்-3 செயற்கைக்கோள், இந்த ஆண்டு ஏற்பட்டுள்ள 'சூப்பர் எல்நினோ' நிகழ்வுடன் தொடர்புடையதாக, உலகின் கடல்வாழ் உயிர்ச்சூழலில் வழக்கத்திற்கு மாறான மாற்றங்களை கண்டறிந்துள்ளது. வெப்பமண்டல பசிபிக் பெருங்கடலில் அவ்வப்போது ஏற்படும் வெப்ப மாறுபாட்டு நிகழ்வான எல்நினோ, உலகின் அனைத்து கடல் பகுதிகளையும் பாதிக்கிறது. இந்தாண்டு ஏற்பட்டுள்ள எல்நினோவால் கடலின் மேற்பரப்பு வழக்கத்திற்கு மாறாக வெப்பமடைந்து, கடலின் ஆழத்திலிருந்து குளிர்ந்த, ஊட்டச்சத்து நிறைந்த நீர் மேற்பரப்புக்கு வருவது தடைபட்டுள்ளது.

இதனால் கடல் மேற்பரப்பில் ஊட்டச்சத்துகள் குறைந்து, கடலின் அடிப்படை உணவுச் சங்கிலியை உருவாக்கும் நுண்ணிய தாவர இயல்பு கொண்ட உயிரினங்களான பைட்டோபிளாங்டன்களின் வளர்ச்சி பாதிக்கப்பட்டுள்ளது. இதன் விளைவாக குளோரோபில் (தாவரங்களில் உள்ள பச்சை நிற பொருள்) அளவு குறைந்து, ஒட்டுமொத்த கடல்வாழ் உயிரினங்களுக்கான ஆக்சிஜன் உற்பத்தியும் பாதிக்கப்பட்டுள்ளது.

கடல் ஆய்வுக்காக இஸ்ரோ அனுப்பியுள்ள ஓசன்சாட்-3 செயற்கைக்கோளில் உள்ள ஓசன் கலர் மானிட்டர்-3, ஸ்கேட்டர் மீட்டர் ஆகிய இரு கருவிகளும் இதை ஆய்வு செய்ய பெருங்கடல் பரப்பை கண்காணித்தன. இந்த ஆண்டு ஜூன் மாத தரவுகளை, 2024, 2025ஆம் ஆண்டுகளின் ஜூன் மாத தரவுகளுடன் இஸ்ரோ ஒப்பிட்டு பார்த்தது. அதில், தற்போது பெருங்கடலில் குளோரோபில் அளவு பெருமளவில் குறைந்திருப்பது கண்டறியப்பட்டது. வழக்கமாக கிழக்கிலிருந்து மேற்கு நோக்கி வீசும் காற்று, எல்நினோவின் காரணமாக இப்போது மேற்கிலிருந்து கிழக்காக வீசுவதையும், இதனால் கடல் நீரோட்டங்கள் மாறியிருப்பதையும் செயற்கைக்கோள் தரவுகள் உறுதிசெய்துள்ளன.

இந்தாண்டு ஜூன் மாதத்தில் எல்நினோ தீவிரமடையும் என உலக வானிலை ஆய்வு நிறுவனம் (WMO) ஏற்கெனவே கணித்திருந்தது. ஓசன்சாட்-3 செயற்கைக்கோளின் நேரடி கடல் கண்காணிப்பு தரவுகள் அந்த முன்னறிவிப்புக்கு வலு சேர்த்துள்ளன.

இதன் காரணமாக உலகளாவிய வானிலை அமைப்பு மற்றும் மழையளவுகளில் பெரும் மாற்றங்கள் ஏற்படக்கூடும் என இஸ்ரோவின் செயற்கைக்கோள் தரவுகள் சுட்டிக்காட்டியுள்ளன. மேலும், பெருங்கடல் உயிர்ச்சூழலில் வீழ்ச்சி ஏற்படும் என்ற இந்த முடிவை, உலகின் சுற்றுச்சூழல் அமைப்புகளுக்கும் அது சுட்டிக்காட்டியுள்ளது.