பசிபிக் பெருங்கடலில் எல் நினோவின் தாக்கத்தை பதிவு செய்த இஸ்ரோ செயற்கைக்கோள்

இந்தியாவின் EOS-06/ஓஷன்சாட்-3 செயற்கைக்கோள் ஒரு முக்கிய கண்டுபிடிப்பைப் பதிவு செய்துள்ளது. வெப்பமண்டல பசிபிக் பெருங்கடலில் உருவாகி வரும் எல் நினோவின் தெளிவான அறிகுறிகளையும், அது கடல் உற்பத்தித்திறனில் ஏற்படுத்தும் தாக்கத்தையும் இது காட்டுகிறது என இஸ்ரோவின் தேசிய தொலை உணர்வு மையம் (NRSC) தெரிவித்துள்ளது. செயற்கைக்கோளின் கடல் வண்ணக் கண்காணிப்பான்-3 (OCM-3), ஸ்கேட்டரோமீட்டர் ஆகியவற்றின் தரவை இப்பகுப்பாய்வு பயன்படுத்தியது. பசிபிக்கின் காலமுறை வெப்பமாதல், குளிர்தல் அமைப்பான எல் நினோ-தென் அலைவு (ENSO) நடுநிலை ஆண்டுகளுடன் ஒப்பிடும்போது, ஜூன் 2026-ல் மேற்பரப்பு குளோரோஃபில்-a அளவு குறிப்பிடத்தக்க அளவு குறைந்திருந்ததை இது கண்டறிந்தது. கடல்பாசி எண்ணிக்கை, கடல் உற்பத்தித்திறன் ஆகியவற்றைக் காட்டும் முக்கிய அளவீடே குளோரோஃபில்-a.

இந்தக் குறைவு கடல்மேற்பரப்புக் காற்றின் திசை மாற்றத்துடன் ஒத்துப்போனதாக இஸ்ரோ தெரிவித்தது. அப்பகுதியின் வழக்கமான கீழைக்காற்று பலவீனமடைந்து மேற்குக் காற்றாக மாறியது. இது ஆழத்திலிருந்து ஊட்டச்சத்து நிறைந்த நீரை மேற்பரப்புக்குக் கொண்டுவரும் வழக்கமான பூமத்திய ரேகை மேலெழும்பலைப் பாதித்தது. ஏப்ரல் முதல் ஜூன் 2026 வரை உயர்ந்த குளோரோஃபில்-a பகுதி படிப்படியாக மேற்கு நோக்கி சுருங்கியதை செயற்கைக்கோள் கண்காணிப்புகள் காட்டின; இது எல் நினோ உருவாகும் போது மேலெழும்பல் பலவீனமடைவதற்கான மேலும் சான்றாகும்.

OCM-3, ஸ்கேட்டரோமீட்டர் ஆகியவற்றின் ஒருங்கிணைந்த கண்காணிப்புகள், பூமத்திய ரேகை பசிபிக்கில் வளிமண்டலக் காற்றுக்கும் உயிரியல் செயல்முறைகளுக்கும் இடையேயான வலுவான தொடர்பைக் காட்டுவதாக இஸ்ரோ தெரிவித்தது. முன்னறிவிக்கப்பட்டுள்ளபடி எல் நினோ மேலும் தீவிரமடைந்தால், குறைந்த குளோரோஃபில் பகுதி இன்னும் அதிகமாகலாம்.

ஜூன்-ஆகஸ்ட் 2026-ல் எல் நினோ நிலைமைகள் உருவாகும் நிகழ்தகவு 80% எனும் உலக வானிலை நிறுவனத்தின் (WMO) முன்னறிவிப்பை செயற்கைக்கோள் கண்டுபிடிப்புகள் பூர்த்தி செய்கின்றன. ஜூலை இறுதியில், இந்த நிகழ்வு தீவிரமடைந்து வருவதாகவும், ஆகஸ்ட்-அக்டோபரில் மேலும் வலுப்பெறும் என்றும் WMO தெரிவித்தது.