ஜப்பானிலிருந்து பிலிப்பைன்ஸ் வரை 1,848 கிமீ இடைவிடாமல் பறந்த ஆந்தையை GPS வெளிக்காட்டியது

சுமார் 30 செ.மீ. நீளமுள்ள ஆந்தை இனமான நார்தர்ன் பூபுக் ஒன்று, ஜப்பானிலிருந்து பிலிப்பைன்ஸ் வரை 1,800 கிலோமீட்டருக்கும் மேலாகக் கடல் வழியாக இடைவிடாமல் பறந்தது. இதை ஜப்பானின் டோஹோகு பல்கலைக்கழகம் உள்ளிட்ட ஆராய்ச்சிக் குழு ஒன்றின் ஆய்வு தெரிவிக்கிறது. வடகிழக்கு ஜப்பானின் மியாகி மாகாணத் தலைநகர் சென்டாயில் வாழும் நான்கு நார்தர்ன் பூபுக் ஆந்தைகளுக்கு ஆராய்ச்சியாளர்கள் பொருத்திய GPS தரவு பதிவிகள் மூலம் இந்தக் கண்டுபிடிப்பு கிடைத்தது.

ஜப்பானில், ஒகசவாரா தீவுகள் போன்ற சில பகுதிகளைத் தவிர, இந்த ஆந்தை பரவலாகக் காணப்படுகிறது. கோடைகாலத்தில் நகர்ப்புற பூங்காக்கள் உள்ளிட்ட இடங்களில் இது குஞ்சு பொரிக்கிறது. இந்த இனம் தென்கிழக்கு ஆசியாவில் குளிர்காலத்தைக் கழிக்கிறது என்பது ஏற்கெனவே தெரிந்திருந்தாலும், அதன் புலம்பெயர்வுப் பாதைகள் விரிவாகத் தெரிந்திருக்கவில்லை. GPS பொருத்தப்பட்ட நான்கு பறவைகளில் ஒன்றின் தரவு பகுப்பாய்வு, கடந்த கோடையில் வெளியிடப்பட்டது. அது இந்த ஆந்தையின் முழுப் பயணத்தையும் முதன்முறையாகக் கண்டறிந்தது.

2024ஆம் ஆண்டு அக்டோபர் இறுதியில், இந்த ஆண் ஆந்தை ஜப்பான் தீவுக் கூட்டத்தின் வழியாகத் தெற்கு நோக்கிப் பறந்தது. பின்னர், தென்மேற்கு ஜப்பானின் காகோஷிமா மாகாணத்தில் உள்ள கேப் சாதாவிலிருந்து, பிலிப்பைன்ஸின் லுசான் தீவு வரை 1,848 கிலோமீட்டர் தூரத்தை, 36 மணி நேரப் பயணத்தில், கடல் வழியாக இடைவிடாமல் கடந்தது. பின்னர் இந்தோனேசியாவின் கலிமந்தான் தீவில் குளிர்காலத்தில் சுமார் நான்கு மாதங்கள் தங்கியிருந்த அது, 2025ஆம் ஆண்டு மார்ச் இறுதியில் தென் சீனாவின் ஹைனான் தீவுக்கு சுமார் 1,500 கிலோமீட்டர் தூரம் பறந்தது. சீனப் பெருநிலப்பரப்பின் வழியாக வடக்கு நோக்கிப் பறந்த அது, ஏப்ரல் இறுதியில் சென்டாய்க்குத் திரும்பியது.

"பறவைகள் நகராது என்ற பொதுவான கருத்துக்கு மாறாக, ஆந்தைகள் பற்றிய ஒரு புதிய கோணத்தை இந்த ஆய்வு வெளிக்கொணர்ந்துள்ளது" என்று வளர்ச்சி உயிரியலில் நிபுணத்துவம் பெற்ற டோஹோகு பல்கலைக்கழக ஆராய்ச்சியாளர் யவாரா தகேடா தெரிவித்தார். "இந்த இனத்தின் புலம்பெயர்வுப் பாதைகளும் ஓய்வெடுக்கும் இடங்களும் கண்டறியப்பட்டால், அது இந்த இனத்தைப் பாதுகாக்க உதவும்" என்று தகேடா மேலும் கூறினார். இந்த ஆய்வு ஜூன் மாதம் ஒரு பிரிட்டிஷ் அறிவியல் இதழில் வெளியானது.