மலையின் வடிவமே நிலநடுக்க அரிப்பை தீர்மானிக்கிறது

பெரிய நிலநடுக்கங்கள், ஆயிரக்கணக்கான நிலச்சரிவுகளைத் தூண்டி மலைப் பகுதிகளின் தோற்றத்தையே வேகமாக மாற்றி அரிப்பை துரிதப்படுத்தும். ஆனால், நிலநடுக்கத்திற்குப் பிறகு சில மலைப் பகுதிகளில் மட்டும் ஏன் தீவிரமான, நீண்டகால அரிப்பு ஏற்படுகிறது, மற்றவற்றில் ஏன் மட்டுப்படுத்தப்பட்ட மாற்றமே தென்படுகிறது என்பது நீண்ட காலமாக விளக்கமளிக்கப்படாத புதிராக இருந்தது. Geology இதழில் வெளியான புதிய ஆய்வு ஒன்று, நிலநடுக்கம் மட்டுமல்ல, நிலப்பரப்பின் வடிவமைப்பும் மலைத்தொடர் எவ்வாறு எதிர்வினையாற்றுகிறது என்பதை நிர்ணயிக்கிறது எனக் கண்டறிந்துள்ளது.

சீன அறிவியல் கழகத்தின் புவிச் சூழலியல் நிறுவனத்தைச் சேர்ந்த ஆய்வாளர்கள், நியூசிலாந்தின் ஆல்பைன் புவிப்பிளவில் 1717ஆம் ஆண்டு ஏற்பட்ட, 8-க்கும் அதிகமான அளவிலான நிலநடுக்கத்தின் சுற்றுச்சூழல் தாக்கத்தை, மபோரிகா ஏரி, பரிங்கா ஏரி ஆகிய இரு நீர்பிடிப்புப் பகுதிகளின் வண்டல் மாதிரிகளை ஆய்வு செய்து மறுகட்டமைத்தனர். காலநிலை, தாவரங்கள், புவியியல் அமைப்பு, நிலத்தட்டு (டெக்டானிக்) சூழல் ஆகியவை இரண்டிலும் ஒரே மாதிரி இருந்தாலும், இரு நீர்பிடிப்புப் பகுதிகளும் வெவ்வேறு விதமான அரிப்பு முறைகளைக் காட்டின. வண்டல் மேற்பரப்பு மண்ணிலிருந்தா அல்லது ஆழமான அடித்தள பாறையிலிருந்தா வந்தது என்பதைக் கண்டறிய, கார்பன், நைட்ரஜன் ஐசோடோப்புகள், மூலக்கூறு உயிர்க்குறிகள் ஆகியவற்றை நீர்பிடிப்புப் பகுதியின் நில அமைப்புப் பகுப்பாய்வுடன் குழு இணைத்தது.

செங்குத்தான மலைச்சரிவுகள் ஆற்றுப் பாதைகளுடன் அதிகம் இணைந்திருக்கும் மபோரிகா நீர்பிடிப்புப் பகுதியில், ஆழமான நிலச்சரிவுகள் ஆழ்மண் மற்றும் அடித்தள பாறைப் பொருட்களை விரைவாக ஏரிக்குள் கொண்டு சேர்த்தன; நிலநடுக்கத்துக்கு முன்னும் பின்னும் முதன்மை அரிப்பு செயல்முறை மாறாமலேயே இருந்தது. மென்மையான பரிங்கா நீர்பிடிப்புப் பகுதியில் ஆரம்பத்தில் மேற்பரப்பு மண் அரிப்பே மேலோங்கியிருந்தது; ஆனால் காலப்போக்கில் வண்டல் மூலங்கள் உயரமான பகுதிகளின் மேற்பரப்பு மண்ணிலிருந்து, தாழ்வான பகுதிகளில் உள்ள ஆழமான பொருட்களுக்கு மாறின. இது, சாதாரண மேற்பரப்பு அரிப்பிலிருந்து நிலநடுக்கத்தால் தூண்டப்பட்ட அடித்தள பாறைச் சரிவுக்கு மாறியதைக் காட்டுகிறது.

"ஒவ்வொரு மலையும் நிலநடுக்கத்தால் ஒரே மாதிரி பாதிக்கப்படுவதில்லை" என இந்த ஆய்வின் முதன்மை ஆசிரியர் வாங் ஜின் தெரிவித்தார். "நிலநடுக்கம் மேற்பரப்பு மண்ணை மட்டும் அகற்றுமா, அல்லது மிக ஆழமான பொருட்களை வெளியேற்றுமா என்பதை நிலப்பரப்பின் வடிவமே நிர்ணயிக்கிறது என்பதைக் கண்டறிந்தோம். இது, ஒரே அளவிலான நிலநடுக்கங்கள் ஏன் வெவ்வேறு புவியியல் தடங்களை விட்டுச் செல்கின்றன என்பதை விளக்க உதவுகிறது" என்றும் அவர் கூறினார். எதிர்காலத்தில் பெரிய நிலநடுக்கங்களுக்கு மலைப் பகுதிகள் எவ்வாறு எதிர்வினையாற்றும் என்பதையும், அதனால் ஏற்படும் அரிப்பு ஆறுகள் வழியாக வண்டலையும் கார்பனையும் எவ்வாறு நகர்த்தும் என்பதையும் கணிக்க இந்தக் கண்டுபிடிப்புகள் உதவும் என ஆய்வாளர்கள் தெரிவிக்கின்றனர்.