பறவைப் பாடல்கள் ஏன் காதுக்கு இனிமையாக கேட்கின்றன? ஆய்வு விடை

ஜெர்மனியின் டூபிங்கன் பல்கலைக்கழகத்தைச் சேர்ந்த டாக்டர் நடீன் கால்ப் மற்றும் டாக்டர் கிறிஸ்டோஃப் ராண்ட்லர் ஆகியோர் ஒரு புதிய ஆய்வை மேற்கொண்டனர். சில பறவைப் பாடல்கள் ஏன் மற்றவற்றை விட காதுக்கு இனிமையாக இருக்கின்றன என்பதற்கான ஒலியியல் அம்சங்களை அவர்கள் கண்டறிந்துள்ளனர். இந்த ஆய்வு ஃப்ரண்டியர்ஸ் இன் பேர்ட் சயின்ஸ் இதழில் வெளியானது. இதைப் புரிந்துகொள்வது பூங்காக்களை சிறப்பாக வடிவமைக்கவும், காத்திருப்பு அறை போன்ற மன அழுத்தம் தரும் இடங்களை மேம்படுத்தவும் உதவும் என ஆய்வாளர்கள் தெரிவித்தனர். மேலும், இனிமையாகப் பாடும் பறவைகள் மூலம் பாதுகாப்பு நடவடிக்கைகளை மேற்கொள்ளவும் இது உதவும் என்றனர்.

ஆய்வாளர்கள் 84 பேரைத் தேர்ந்தெடுத்து, ஜெர்மனியில் பொதுவாகக் காணப்படும் காட்டுப் பறவைகளின் 123 பாடல்களின் சிறு பகுதிகளை அவர்களுக்குக் கேட்கச் செய்தனர். பங்கேற்பாளர்கள் ஒவ்வொரு பாடலையும் ஒன்று முதல் ஐந்து என்ற அளவில் இனிமையாக மதிப்பிட்டதுடன், தங்கள் பறவை அறிவு மற்றும் பறவைகள் மீதான ஆர்வம் குறித்த கேள்விகளுக்கும் பதிலளித்தனர். இதன் பிறகு ஆய்வாளர்கள் ஒவ்வொரு பாடலின் ஆம்ப்ளிட்யூட் (ஒலியின் உரத்த தன்மை), அதிர்வெண் (ஒலியின் சுருதி), சிக்கல்தன்மை — பாடலில் உள்ள கூறுகளின் எண்ணிக்கை மற்றும் வகைமை — மற்றும் பேண்ட்வித் ஆகியவற்றை அளந்தனர். பேண்ட்வித் என்பது ஒரு பாடலின் அதிகபட்ச மற்றும் குறைந்தபட்ச அதிர்வெண்களுக்கு இடையேயான வித்தியாசத்தைக் குறிக்கும்.

குறுகிய பேண்ட்வித், அதிக சிக்கல்தன்மை, அதிக அதிர்வெண் மற்றும் ஒப்பீட்டளவில் குறைந்த ஆம்ப்ளிட்யூட் கொண்ட பாடல்கள் அதிக இனிமையானதாக மதிப்பிடப்பட்டன. அதிக மதிப்பெண் பெற்ற பாடல்கள், மனித காது மிகவும் உணர்திறன் கொண்ட ஒரு குறிப்பிட்ட அதிர்வெண் வரம்பைத் தவிர்த்திருந்தன. ஒரு பிளாக்பேர்ட் பறவையின் (blackbird) பாடல் மிக இனிமையானதாகவும், ஒரு பார்ன் ஆவுல் பறவையின் பாடல் மிகக் குறைவான இனிமையானதாகவும் மதிப்பிடப்பட்டது. பறவைகள் மீது அதிக விருப்பம் கொண்டவர்கள் பாடல்களை அதிகமாக மதிப்பிட்டனர். ஆனால் அவர்களது பறவை அறிவு எந்த மாற்றத்தையும் ஏற்படுத்தவில்லை. "பறவை ஆர்வலராக இருக்க வேண்டிய அவசியமில்லாமலேயே, பறவைகளின் ஒலி இனிமையானதாக உணரலாம்" என்று இந்த ஆய்வின் முதன்மை ஆசிரியர் டாக்டர் நடீன் கால்ப் தெரிவித்தார். பறவைகளை தோற்றத்தில் அல்லது பாடலில் அடையாளம் காணும் திறன் மதிப்பீடுகளில் எந்த மாற்றத்தையும் ஏற்படுத்தவில்லை என்று அவர் மேலும் தெரிவித்தார். இது பறவைப் பாடலை ரசிப்பது வெறும் அடையாளம் காண்பதை விட ஆழமான ஏதோ ஒன்றுடன் தொடர்புடையது எனக் குறிப்பிடுகிறது.

இந்த ஆய்வுக் குழு, 21 பறவை இனங்கள் பொதுவாக இடம்பெற்ற ஒரு முந்தைய ஆய்வுடன் தங்கள் முடிவுகளை ஒப்பிட்டது. அந்த முந்தைய ஆய்வு, வெவ்வேறு பறவைப் பாடல்கள் மன சோர்வு அல்லது மன அழுத்தத்திலிருந்து மீள எந்த அளவு உதவுகின்றன என்பதை ஆராய்ந்திருந்தது. புதிய ஆய்வில் மிக இனிமையானதாக மதிப்பிடப்பட்ட பிளாக்பேர்ட் பறவையின் பாடல்கள், அந்த முந்தைய ஆய்வில் மன சோர்விலிருந்து மீள அதிகம் உதவுவதாகவும் மதிப்பிடப்பட்டிருந்தன என்று ஆய்வாளர்கள் தெரிவித்தனர்.

ஒரு பறவை எவ்வளவு அடிக்கடி ஒலி எழுப்புகிறது என்பதைக் குறிக்கும் கால் ரேட் இனிமையை பாதிக்குமா என்பதைத் தங்களால் சோதிக்க முடியவில்லை என ஆய்வாளர்கள் தெரிவித்தனர். மேலும் அவர்கள், அதிக ஆண்கள், வெவ்வேறு கலாச்சாரங்கள் மற்றும் அனுபவம் மிக்க பறவை பார்வையாளர்கள் உள்ளிட்ட பரந்த மாதிரிகளுடன் பெரிய அளவிலான தொடர் ஆய்வுகளை மேற்கொள்ளத் திட்டமிட்டுள்ளனர்.