வைட்டமின் டி குறைவு மார்பக அறுவை சிகிச்சை வலியை அதிகரிக்குமா?

வைட்டமின் டி அளவு குறைவாக இருப்பது மார்பக புற்றுநோய்க்கான அறுவை சிகிச்சைக்குப் பிறகு ஏற்படும் வலியை அதிகரிக்கலாம். மேலும், ஓபியாய்டு வலி நிவாரணிகள் அதிகம் தேவைப்படலாம் என 'ரீஜனல் அனஸ்தீசியா & பெயின் மெடிசின்' ஆய்விதழில் வெளியான ஆய்வு ஒன்று தெரிவிக்கிறது. 30 nmol/L அளவுக்குக் கீழ் வைட்டமின் டி குறைபாடு உள்ள நோயாளிகள், முழு மார்பகத்தையும் அகற்றும் பெரிய அறுவை சிகிச்சையான ராடிகல் மாஸ்டெக்டமி எனும் அறுவை சிகிச்சைக்கு உட்படுகின்றனர். இதற்கு முன்பு வைட்டமின் டி துணைமருந்து எடுத்துக்கொள்வதால் அவர்கள் பயன் பெறக்கூடும் என ஆய்வு முடிவுகள் சுட்டிக்காட்டுகின்றன.

வைட்டமின் டி முதன்மையாக எலும்பு ஆரோக்கியத்திற்கானது என அறியப்படுகிறது. ஆனால், உடல் வலியை உணரும் விதத்திலும் இது தாக்கம் செலுத்தக்கூடும் என வளர்ந்து வரும் ஆய்வுத் தரவுகள் தெரிவிக்கின்றன; இது வீக்கம் மற்றும் நோயெதிர்ப்பு மண்டல தாக்கங்கள் வழியாக இருக்கலாம். மார்பக புற்றுநோய் நோயாளிகளிடையே வைட்டமின் டி குறைபாடு பொதுவாகக் காணப்படுகிறது. இதனால், எகிப்தின் ஃபயூம் பல்கலைக்கழக மருத்துவமனை ஆய்வாளர்கள் இந்தத் தொடர்பை ஆராய்ந்தனர். சிகிச்சை முறைகளை நிர்ணயிக்காமல் நோயாளிகளை காலப்போக்கில் பின்தொடரும் 'எதிர்நோக்கு கண்காணிப்பு ஆய்வு' முறையில், 2024 செப்டம்பர் முதல் 2025 ஏப்ரல் வரை இந்த ஆய்வு நடத்தப்பட்டது.

இந்த ஆய்வில் ஒரு மார்பகத்தை முழுமையாக அகற்றும் அறுவை சிகிச்சைக்கு உட்படவிருந்த 184 நோயாளிகள் சேர்க்கப்பட்டனர். பாதி பேர் வைட்டமின் டி குறைபாடு உள்ளவர்களாகவும் (30 nmol/L-க்குக் கீழ்), மீதி பாதி பேர் போதுமான அளவு உள்ளவர்களாகவும் (அதற்கு மேல்) பிரிக்கப்பட்டனர்; சராசரி வயது முறையே 44 மற்றும் 42-ஆக இருந்தது. அனைவருக்கும் வழக்கமான சிகிச்சை அளிக்கப்பட்டது; நோயாளிகளின் வைட்டமின் டி நிலை பற்றி பணியாளர்களுக்குத் தெரியாது. அறுவை சிகிச்சையில் ஓபியாய்டான ஃபெண்டானில் பயன்படுத்தப்பட்டது. சிகிச்சைக்குப் பின் ஒவ்வொரு 8 மணி நேரத்திற்கும் நரம்பு வழியாக பாராசிட்டமால் செலுத்தப்பட்டது. மேலும், நோயாளிகள் ஒரு பொத்தானை அழுத்தி தாங்களே இன்னொரு ஓபியாய்டான டிராமடாலை எடுத்துக்கொள்ளும் வசதியும் பெற்றனர்.

முதல் 24 மணி நேரத்தில், போதுமான வைட்டமின் டி உள்ள நோயாளிகளை விட, குறைபாடு உள்ள நோயாளிகள் மிதமான முதல் கடுமையான வலியை அனுபவித்ததாகத் தெரிவிக்க மூன்று மடங்கு அதிக வாய்ப்பு இருந்தது. எனினும், எந்த நோயாளியும் 0-10 அளவீட்டில் 7 அல்லது அதற்கு மேல் உள்ள கடுமையான வலியை அனுபவிக்கவில்லை. இந்த வேறுபாடு முழுவதும் மிதமான வலியில் (4-6) மட்டுமே இருந்தது. குறைபாடு உள்ள குழுவினருக்கு அறுவை சிகிச்சையின்போது 8 மைக்ரோகிராம் அதிகமாக ஃபெண்டானில் தேவைப்பட்டது — இது சொற்ப வேறுபாடு — மேலும் சிகிச்சைக்குப் பின் 112 மில்லிகிராம் அதிகமாக டிராமடாலும் பயன்படுத்தினர். குறைபாடு உள்ள குழுவில் குமட்டல் அதிகமாகக் காணப்பட்டது; வாந்தி அந்தக் குழுவில் மட்டுமே ஏற்பட்டது, ஆனால் அந்த வேறுபாடு புள்ளியியல் ரீதியாக முக்கியத்துவம் வாய்ந்தது அல்ல.

இது ஒரே மருத்துவமனையில் நடத்தப்பட்ட கண்காணிப்பு ஆய்வு என்பதால், வைட்டமின் டி குறைபாடே கூடுதல் வலிக்குக் காரணம் என நிரூபிக்க முடியாது என ஆய்வாளர்கள் எச்சரிக்கின்றனர். வீக்க குறியீடுகளை அவர்கள் அளவிடவில்லை; அத்துடன் பதற்றம், மனச்சோர்வு, புற்றுநோயின் நிலை, அறுவை சிகிச்சைக்கு முன் தூக்கக் கோளாறு போன்ற வலியைப் பாதிக்கக்கூடிய பிற காரணிகள் குறித்த தரவும் இல்லை. 'வைட்டமின் டி குறைபாடு, மிதமான முதல் கடுமையான அறுவை சிகிச்சைக்குப் பிந்தைய வலி அதிகரிப்புடனும், அதிக ஓபியாய்டு பயன்பாட்டுடனும் தொடர்புடையது' என ஆய்வாளர்கள் முடிவுரையில் தெரிவித்தனர்.