எடை குறையாமலே கல்லீரலைக் காக்கும் மறைந்திருந்த GDF15 ஹார்மோன் பாதை

பசியை கட்டுப்படுத்தி எடை இழப்பை ஊக்குவிப்பதாக அறியப்பட்ட ஒரு ஹார்மோன், கல்லீரலைத் தீங்கு விளைவிக்கும் அழற்சியிலிருந்தும் காக்கக்கூடும் என கனடாவின் மெக்மாஸ்டர் பல்கலைக்கழக ஆய்வாளர்கள் கண்டறிந்துள்ளனர். GDF15 எனப்படும் இந்த ஹார்மோன், முன்பு அறியப்படாத ஒரு சமிக்ஞை பாதையின் மூலம் செயல்படுவதாகவும், எடை குறையாத நிலையிலும் கல்லீரல் அழற்சியைக் குறைத்து தழும்பு திசு உருவாவதை மெதுவாக்கும் என்றும் ஆய்வுக் குழு கண்டறிந்தது. இது, இந்த ஹார்மோனின் பலன்கள் பெரும்பாலும் பசி, உடல் எடை மீதான அதன் தாக்கத்தால்தான் கிடைக்கின்றன என்ற எண்ணத்தைக் கேள்விக்குள்ளாக்குகிறது. செல் மெட்டபாலிசம் இதழில் வெளியான இந்த முடிவுகள், உலகளவில் மில்லியன் கணக்கானோரைப் பாதிக்கும், சிரோஸிஸ், கல்லீரல் புற்றுநோய், கல்லீரல் செயலிழப்பு வரை முற்றக்கூடிய MASH (வளர்சிதை மாற்றக் கோளாறு தொடர்பான கொழுப்புக் கல்லீரல் அழற்சி) நோய்க்கு புதிய சிகிச்சை வழியைக் காட்டுகின்றன.

மனித MASH நோயை நெருக்கமாக ஒத்த சுட்டெலி மாதிரிகளை ஆய்வு செய்த குழு, மரபியல், மருந்தியல், மரபணுத் தொகுப்பியல் (ஜீனோமிக்ஸ்), திசுவின் எந்தப் பகுதியில் எந்த மரபணு செயல்படுகிறது என்பதைக் காட்டும் ஸ்பேஷியல் டிரான்ஸ்கிரிப்டோமிக்ஸ் ஆகிய முறைகளை இணைத்து GDF15 எவ்வாறு செயல்படுகிறது என்பதை ஆராய்ந்தது. GDF15, மூளையிலிருந்து நரம்பு மண்டலம் வழியாக சமிக்ஞை அனுப்பி, வளர்சிதை மாற்றம், நோய் எதிர்ப்பு செயல்பாடு மற்றும் மன அழுத்த எதிர்வினையில் ஈடுபடும் குளுக்கோகார்ட்டிகாய்டு என்னும் ஸ்டீராய்டு ஹார்மோன்களை வெளியிடச் செய்கிறது என்பதை ஆய்வாளர்கள் கண்டறிந்தனர். இந்த ஹார்மோன்கள், உணவு உட்கொள்ளல், உடல் எடை அல்லது கல்லீரல் கொழுப்பு அளவைப் பொருட்படுத்தாமல் கல்லீரல் அழற்சியைக் குறைத்தன; மேலும், முற்றிய நோயுடன் இணைந்து வரும் தழும்பு திசு உருவாவதையும் மெதுவாக்கின.

"GDF15 பசியையும் உடல் எடையையும் கட்டுப்படுத்துவதை விட மிக அதிகம் செய்கிறது என்று எங்கள் முடிவுகள் காட்டுகின்றன" என மெக்மாஸ்டர் பல்கலைக்கழக மருத்துவத் துறை பேராசிரியரும், அப்பல்கலைக்கழகத்தின் வளர்சிதை மாற்றம், பருமன் மற்றும் நீரிழிவு ஆய்வு மையத்தின் இணை இயக்குநருமான, இந்த ஆய்வின் மூத்த ஆய்வாளர் கிரிகோரி ஸ்டீன்பெர்க் தெரிவித்தார். "கல்லீரல் அழற்சியை அடக்கி, தழும்புத் திசுவைக் குறைக்க உதவும் ஒரு இயற்கையான மூளை-கல்லீரல் சமிக்ஞைப் பாதையை GDF15 செயல்படுத்துகிறது என்பதைக் கண்டறிந்தோம்" என்றும் அவர் கூறினார். இந்த ஆய்வின் முதன்மை ஆய்வாளரான டோங்டோங் வாங், இந்த ஹார்மோன் கல்லீரலிலுள்ள நோய் எதிர்ப்பு செல்களை "மிகவும் பாதுகாப்பான, குறைவான செயலூக்கமுள்ள நிலைக்கு" மாற்றுவதாகத் தெரிவித்தார்.

இந்த கண்டுபிடிப்பு, GDF15 எடை இழப்பின்போது கலோரி எரிப்பைத் தக்கவைக்க உதவுகிறது என 2023ஆம் ஆண்டு அதே குழு வெளியிட்ட ஆய்வின் தொடர்ச்சியாக அமைகிறது. தற்போதைய MASH சிகிச்சைகள் பெரும்பாலும் உடல் எடை மற்றும் கல்லீரல் கொழுப்பைக் குறைப்பதில் மட்டுமே கவனம் செலுத்துவதாக ஸ்டீன்பெர்க் தெரிவித்தார். கல்லீரல் அழற்சியை நேரடியாகக் குறிவைக்கும் சிகிச்சைகளுடன் அவற்றை இணைப்பதன் மூலம் புதிய சிகிச்சை வாய்ப்புகள் கிடைக்கக்கூடும் என இந்தப் பாதை சுட்டிக்காட்டுகிறது.