மூளை-வயிறு சமிக்ஞைகள் மூலம் மனச்சோர்வு மருந்து பலனை முன்கூட்டியே கணிக்கும் ஐஐடி கான்பூர் ஆய்வு

இந்திய தொழில்நுட்பக் கழகம் கான்பூர் (ஐஐடி கான்பூர்) ஆய்வாளர்கள், கான்பூரிலுள்ள கணேஷ் சங்கர் வித்யார்த்தி நினைவு (ஜிஎஸ்விஎம்) மருத்துவக் கல்லூரியுடன் இணைந்து ஒரு ஆய்வை மேற்கொண்டனர். மூளை மற்றும் வயிற்று மின்னலைகளை நோயாளியின் மருத்துவ அறிகுறிகளுடன் இணைப்பதன் மூலம் ஒரு புதிய வழியை அவர்கள் கண்டறிந்துள்ளனர். இதைக் கொண்டு மனச்சோர்வு எதிர்ப்பு மருந்துக்கு நோயாளி பதிலளிக்கும் விதத்தை, சிகிச்சை தொடங்கி வெறும் 7 முதல் 10 நாட்களுக்குள் கணிக்க முடியும். மருத்துவர்கள் பொதுவாக சிகிச்சை பலனளிக்கிறதா என அறிய 4 முதல் 6 வாரங்கள் எடுத்துக்கொள்வர்; இது அதைவிட மிக விரைவானது.

உலகளவில் சுமார் 5% வயது வந்தோரையும், இந்தியாவின் மக்கள்தொகையில் சுமார் 4.5% பேரையும் மனச்சோர்வு பாதிக்கிறது என ஆய்வாளர்கள் தெரிவித்தனர். பாதிக்கும் மேற்பட்ட நோயாளிகள் தங்களுக்கு முதலில் அளிக்கப்படும் மனச்சோர்வு எதிர்ப்பு மருந்துக்கு போதுமான அளவு பதிலளிப்பதில்லை. பயனுள்ள சிகிச்சையைக் கண்டறியும் முன் பல வாரங்கள் முயற்சி-தவறு முறையில் கழிகின்றன. இது குறித்து, ஆய்வின் முதன்மை ஆசிரியரும் ஐஐடி கான்பூர் அறிவாற்றல் அறிவியல் துறை உதவிப் பேராசிரியருமான டாக்டர் பிரகதி பிரியதர்ஷினி பாலசுப்ரமணி கருத்து தெரிவித்தார். "சிகிச்சையின் முதல் வாரத்தில் சேகரிக்கப்படும், உடலை அறுக்காத மூளை மற்றும் வயிற்று சமிக்ஞைகள் மதிப்புமிக்க தகவல்களைக் கொண்டுள்ளன. சிகிச்சை பலனைப் பற்றி அவை ஏற்கெனவே அறிவிக்கின்றன என்பதை எங்கள் ஆய்வு காட்டுகிறது," என்றார் அவர்.

144 முன்பு மனச்சோர்வு மருந்து எடுத்திராத நோயாளிகள் உட்பட மொத்தம் 206 பங்கேற்பாளர்களிடம், மூளை மின்னலைப் பதிவு (ஈஈஜி) மற்றும் வயிற்று மின்னலைப் பதிவு (ஈஜிஜி) மூலம் மின்னியல் செயல்பாட்டை ஆய்வாளர்கள் அளந்தனர். மருத்துவ அறிகுறித் தரவும் சேகரிக்கப்பட்டது. சிகிச்சை தொடங்கும்போதும், சுமார் ஒரு வாரம் கழித்தும் சமிக்ஞைகள் பதிவு செய்யப்பட்டு, 4-6 வாரங்களில் மதிப்பிடப்பட்ட சிகிச்சை பலன்களுடன் ஒப்பிடப்பட்டன. இதன் விளைவாக உருவான கணிப்பு மாடல், சிகிச்சைக்குப் பதிலளிக்காத நோயாளிகளை 84% சென்சிட்டிவிட்டியுடனும் 78% ஸ்பெசிஃபிசிட்டியுடனும் கண்டறிந்தது. தனி நோயாளிகள் குழுவில் சோதிக்கப்பட்டபோது, இது 77.3% ஒட்டுமொத்த துல்லியமும், 80% ஸ்பெசிஃபிசிட்டியும் 71.4% சென்சிட்டிவிட்டியும் பதிவு செய்தது.

இது குறித்து, அதே துறையின் முனைவர் பட்ட ஆய்வு மாணவரும் ஆய்வின் முதல் ஆசிரியருமான அமல் ஜூட் அஷ்வின் பிரான்சிஸ் கருத்து தெரிவித்தார். "வெவ்வேறு அறிகுறி வடிவங்கள், சிகிச்சை பலனுடன் தொடர்புடைய தனித்தனி மூளை-வயிறு உடலியக்க அமைப்புகளுடன் இணைந்திருப்பதை நாங்கள் கண்டோம்," என்றார். இத்தகைய உயிரியல் துணை வகைகளை அடையாளம் காண்பது, ஒரே மருந்துக்கு நோயாளிகள் ஏன் வெவ்வேறு விதமாக பதிலளிக்கிறார்கள் என்பதை விளக்க உதவும் எனவும் அவர் கூறினார். இந்த ஆய்வில் பயன்படுத்தப்பட்ட கருவிகள் தற்போது நியூரோகிளினிகல் இன்னோவேட்டிவ் சொல்யூஷன்ஸ் (என்சிஐஎஸ்) நிறுவனம் மூலம் கிடைக்கின்றன. இத்திட்டத்திற்கு உயிரி தொழில்நுட்ப ஆய்வுத் துணை நிறுவனம் (பிஐஆர்ஏசி) நிதியுதவி அளித்தது. பரந்த, பலதரப்பட்ட நோயாளிகள் குழுக்களில் இந்த அணுகுமுறையை உறுதிப்படுத்த மேலும் ஆய்வுகள் தேவை என ஆய்வாளர்கள் தெரிவிக்கின்றனர்.