நரம்புச் சேதத்தைச் சரிசெய்ய ரஷ்யாவின் முதல் சொந்த முறை

செயற்கையாகத் தயாரிக்கப்பட்ட கட்டமைப்புடன் உயிருள்ள செல்களையும் இணைத்து உருவாக்கப்படுபவை பயோசிந்தெடிக் பொருட்கள். இவற்றைப் பயன்படுத்தி, சேதமடைந்த நரம்புத் திசுவைச் சரிசெய்யும் ரஷ்யாவின் முதல் முறையைத் தாம் உருவாக்கியுள்ளதாக குபன் அரசு மருத்துவப் பல்கலைக்கழகம் அறிவித்துள்ளது. பல்கலைக்கழகத்தின் பெரிய அளவிலான “மீளுருவாக்க மருத்துவம்” திட்டத்தின் கீழ் இந்த ஆய்வு நடந்தது. இந்தத் தகவல் ஒரு ஆராய்ச்சிக் கட்டுரையாக வெளியாகாமல், பல்கலைக்கழக அறிக்கையாகவே வெளியிடப்பட்டுள்ளது.

“நரம்புத் திசுச் செல்கள் ஏற்றப்பட்ட பயோசிந்தெடிக் பொருட்களைப் பயன்படுத்தி நரம்புச் சேதங்களைச் சரிசெய்யும் முறை உருவாக்கப்பட்டுள்ளது. விரிவான நரம்புச் சேதங்களைச் சரிசெய்வதற்கான உள்நாட்டு இம்ப்ளாண்ட்கள் எதுவும் தற்போது ரஷ்யாவில் பதிவு செய்யப்படவில்லை. அதனால்தான் இந்தத் துறையில் இது தனித்துவமானதாக உள்ளது” என்று பல்கலைக்கழகத்தின் ரெக்டர் (தலைவர்) பேராசிரியர் செர்கெய் அலெக்ஸீங்கோ கூறினார். பயன்படுத்துவதற்கு முன்னர் அந்தப் பொருளில் உயிருள்ள நரம்புத் திசுச் செல்கள் நிறைக்கப்படுகின்றன என்பதே “செல்கள் ஏற்றுதல்” என்பதன் பொருள்.

அதே திட்டத்தின் கீழ், பரவலான தோல் காயங்கள் மற்றும் தீக்காயங்களுக்கு சிகிச்சை அளிக்கும் வகையில் “செயற்கைத் தோல்” என்று பல்கலைக்கழகம் குறிப்பிடும் பொருளும் தயாரிக்கப்பட்டுள்ளது.

திசு மீளுருவாக்க ஆராய்ச்சிக்காக ஒரு பயோரியாக்டர் அமைக்கப்பட்டுள்ளதாகவும் அலெக்ஸீங்கோ தெரிவித்தார். கட்டுப்பாட்டுச் சூழலில் உயிர்ச்செல்களை வளர வைக்கும் கலன் அது. மேலும், விலங்கு மாதிரிகளில் மேற்கொண்ட ஆய்வுகளில், உறுப்புகளுக்கும் திசுக்களுக்கும் தேவையான உயிரியல் ஸ்கஃபோல்டுகளின் தனித்துவமான மாதிரிகள் பெறப்பட்டுள்ளன. செல்கள் அமர்ந்து வளர்ந்து புதிய திசுவாக மாற உதவும் தாங்கு அமைப்பே ஸ்கஃபோல்டு எனப்படுகிறது.

மீளுருவாக்க மருத்துவ தொழில்நுட்பங்களை மேம்படுத்தும் முறைகளை உருவாக்குவது பல்கலைக்கழகத்தின் மற்றொரு ஆய்வுத் திசையாக உள்ளது.