பெருவெடிப்புக்குப் பின் வெறும் 100 மில்லியன் ஆண்டுகளிலேயே பாறைக்கோள்கள் உருவாகியிருக்கலாம்

பெருவெடிப்புக்குப் பின் வெறும் 100 மில்லியன் ஆண்டுகளிலேயே பாறைக்கோள்களை உருவாக்கும் மூலப்பொருட்கள் தோன்றியிருக்கக்கூடும் என போர்ட்ஸ்மவுத் பல்கலைக்கழக ஆய்வாளர்கள் தெரிவிக்கின்றனர். இது விஞ்ஞானிகள் இதுவரை நினைத்திருந்ததை விட மிக விரைவானது. தி அஸ்ட்ரோஃபிசிகல் லெட்டர்ஸ் ஜர்னலில் இக்கண்டுபிடிப்பு வெளியானது. இது கோள் உருவாக்கத்தின் தொடக்கத்தை, சுமார் 13.8 பில்லியன் ஆண்டுகள் பழமையான பிரபஞ்சத்தின் தோற்றத்திற்கு மிக அருகில் கொண்டு வருகிறது; முதல் விண்மீன் திரள்கள் முழுமையாக உருவாகும் முன்பே இது நடந்திருக்கக்கூடும். குறிப்பிடத்தக்க கோள் உருவாக்கம் பிரபஞ்ச வரலாற்றில் பல பில்லியன் ஆண்டுகளுக்குப் பின்னரே தொடங்கும் என விஞ்ஞானிகள் பொதுவாக நினைத்திருந்தனர்.

முதல் தலைமுறை, மிகப்பெரிய நட்சத்திரங்களின் வாழ்க்கை முடிவில் ஏற்பட்ட வெடிப்புகளான 'பாப் III' அதிநோவாக்களிலிருந்து இம்மூலப்பொருட்கள் வந்தன என ஆய்வுக் குழு கண்டறிந்தது. இவ்வெடிப்புகள் கார்பன், ஆக்ஸிஜன், இரும்பு போன்ற தனிமங்களைச் சுற்றியுள்ள வாயுவில் பரப்பின. இதில் மிகவும் சக்திவாய்ந்த ஒரு வகையான 'பேர்-இன்ஸ்டெபிலிட்டி' அதிநோவா, ஒரே வெடிப்பில் சூரியனின் நிறையை விட 100 மடங்கு அதிகமான கன தனிமங்களை வெளியேற்ற முடியும். இது குறித்து, போர்ட்ஸ்மவுத் பல்கலைக்கழகத்தின் அண்டவியல் மற்றும் ஈர்ப்பியல் நிறுவனத்தைச் சேர்ந்த டாக்டர் டேனியல் வேலன் கருத்து தெரிவித்தார். "பூமி போன்ற கோள்களின் முன்னோடிகள், முதல் பிரபஞ்ச வெடிப்புகளின் எச்சங்களில் உருவாகக்கூடும். குறைந்த நிறையுள்ள, நீண்ட காலம் வாழும் நட்சத்திரங்களைச் சுற்றி, பெருவெடிப்புக்குப் பின் 100 மில்லியன் ஆண்டுகளிலேயே இது நிகழக்கூடும் என எங்கள் புதிய ஆய்வுக் கட்டுரை காட்டுகிறது," என்றார் அவர். இச்சிமுலேஷன் தொடரின் முதல் பகுதியை அவரது முனைவர் பட்ட மாணவர் கிரிஸ் ஜெசப் இயக்கினார்.

ஆய்வுக் குழுவின் சிமுலேஷன்களில், தனிமங்கள் நிறைந்த வாயு மேகங்களை ஈர்ப்புவிசை இணைத்து, சூரியனின் நிறையில் சுமார் 70% கொண்ட ஒரு இளம் நட்சத்திரத்தைச் சுற்றி சுழலும் வட்டு ஒன்றை உருவாக்கியது. அந்த வட்டுக்குள், பூமி-சூரிய தொலைவைப் போன்றே ஒரு தொலைவில், பல பூமி-நிறைகளுக்கு நிகரான திடப்பொருள் குவிந்து கோள் கட்டுமானப் பொருட்களை உருவாக்கியது.

நமது சூரியக் குடும்பம் உருவான காலத்தில் இருந்ததை விட சிறிது குறைவான அளவு நீரும் அந்த வட்டில் இருந்ததை ஆய்வாளர்கள் கண்டறிந்தனர். பூமி தன் நீரின் பெரும்பகுதியை, கோள் உருவாக்கத்தின்போது மிச்சமிருந்த பொருட்களிலிருந்து பெற்றிருக்கக்கூடும் என நம்பப்படுகிறது. இதுபோன்ற ஒரு வட்டில் உருவாகும் கோள்களும் அதேபோல் நீரைப் பெற்றிருக்கக்கூடும் என ஆய்வுக் குழு தெரிவித்தது.