தைமஸுக்குச் செல்லும் கதிர்வீச்சு நுரையீரல் புற்றுநோய் நோயாளிகளுக்குக் கெட்ட விளைவுகளுடன் தொடர்புடையது: ஆய்வு

நான்-ஸ்மால்-செல் நுரையீரல் புற்றுநோய்க்கு (NSCLC) சிகிச்சை பெறும்போது தைமஸுக்குச் செல்லும் கதிர்வீச்சு மோசமான விளைவுகளுடன் தொடர்புடையது. இதை 1,107 நோயாளிகள் மீதான ஆய்வு ஒன்று ஆனல்ஸ் ஆஃப் ஆன்காலஜி இதழில் வெளியிட்டுள்ளது. மார்பின் மேல்பகுதியில் உள்ள சிறிய நோய்எதிர்ப்பு உறுப்பான தைமஸ், தொற்றுகளையும் புற்றுநோயையும் எதிர்த்துப் போராடத் தேவையான டி-செல்களை உருவாக்கவும் பயிற்றுவிக்கவும் உதவுகிறது. வயதாக வயதாக இது சுருங்கி, படிப்படியாகக் கொழுப்பு திசுவால் மாற்றப்படுவதால், பருவமடைந்த பிறகு இதற்குப் பெரிதாகப் பயன் இல்லை என இதுவரை கருதப்பட்டு வந்தது.

ஹார்வர்ட் பல்கலைக்கழகப் பேராசிரியரும், மாஸ் ஜெனரல் ப்ரிகாமில் உள்ள செயற்கை நுண்ணறிவு மருத்துவத் திட்டத்தின் இயக்குநருமான ஹியூகோ ஏர்ட்ஸ், இந்த ஆய்வின் மூத்த ஆசிரியர். அதே ஆய்வுக் குழுவின் சமீபத்திய ஆய்வுகள், இரண்டு நேச்சர் இதழ்களில் வெளியாகியிருந்தன. அவை, சில பெரியவர்களில் மற்றவர்களை விடக் கணிசமாக அதிக செயல்பாட்டுத் தைமஸ் திசு இருப்பதைக் கண்டறிந்தன. எஞ்சியிருக்கும் இந்தச் செயல்பாடு, அதிக டி-செல் பன்முகத்தன்மை, நீண்ட வாழ்நாள், குறைந்த புற்றுநோய், மேம்பட்ட நோய்எதிர்ப்பு சிகிச்சை விளைவுகள் ஆகியவற்றுடன் தொடர்புடையது என்று ஏர்ட்ஸ் தெரிவித்தார்.

இந்தப் புதிய ஆய்வில், 1,107 NSCLC நோயாளிகளின் வழக்கமான சிடி ஸ்கேன்களை ஆராய்ச்சியாளர்கள் செயற்கை நுண்ணறிவைப் பயன்படுத்தி பகுப்பாய்வு செய்தனர். இவர்கள் மூன்று குழுக்களைச் சேர்ந்தவர்கள். RTOG-0617 மருத்துவ சோதனையில் இருந்த 460 பேரும், வழக்கமான மருத்துவப் பராமரிப்பில் சிகிச்சை பெற்ற 647 பேரும் இதில் அடங்குவர். சிகிச்சைக்கு முன் ஒவ்வொரு நோயாளியின் தைமஸ் ஆரோக்கியத்துக்கும் மதிப்பெண் அளித்த ஆராய்ச்சியாளர்கள், சிகிச்சையின்போது தைமஸை எட்டிய கதிர்வீச்சு அளவையும் கணக்கிட்டனர். சிகிச்சைக்கு முன் தைமஸ் ஒப்பீட்டளவில் ஆரோக்கியமாக இருந்த நோயாளிகளில், அதிக தைமஸ் கதிர்வீச்சு அளவு RTOG-0617 சோதனையில் தொலைதூர உறுப்புகளுக்குப் புற்றுநோய் பரவும் அபாயத்தை 29% அதிகரிப்புடன் தொடர்புடையதாக இருந்தது. ஹார்வர்ட் குழு ஒன்றில் இந்த அபாயம் 33% அதிகரித்தது. டர்வலுமாப் எனும் நோய்எதிர்ப்பு மருந்துடன் கீமோகதிர் சிகிச்சை பெற்ற குழுவில் இது 95% அதிகரிப்பாக இருந்தது.

அதிக தைமஸ் கதிர்வீச்சு அளவு பெற்ற நோயாளிகள், ஓராண்டுக்குப் பிறகு தைமஸ் ஆரோக்கியத்தில் அதிக சரிவைக் காட்டினர். ஒரு சிறிய துணைக்குழுவில், இவர்களுக்கு லிம்போசைட் எண்ணிக்கையும் குறைவாக இருந்தது. கதிர்வீச்சு இந்த உறுப்பை நேரடியாகச் சேதப்படுத்தலாம் என்பதற்கு இது ஆதரவளிக்கிறது என்று ஏர்ட்ஸ் தெரிவித்தார். மாஸ் ஜெனரல் ப்ரிகாமின் கதிர்வீச்சு புற்றுநோயியல் நிபுணரும் இணை மூத்த ஆசிரியருமான ரேமண்ட் மேக் இதைக் கூறினார். ஏற்கெனவே உள்ள கதிர்வீச்சுத் திட்டமிடல் நுட்பங்களைப் பயன்படுத்தியே, மற்ற உறுப்புகளுக்கான கதிர்வீச்சை அதிகரிக்காமலோ, புற்றுநோய் சிகிச்சையைப் பாதிக்காமலோ, தைமஸைப் பாதுகாக்க முடியும் என அவர் தெரிவித்தார். இருப்பினும், மருத்துவர்கள் தங்கள் சிகிச்சைத் திட்டமிடலை மாற்றுவதற்கு முன், மேலும் ஆய்வுகள் தேவை என்றும் அவர் தெரிவித்தார்.