மெலனோமா தடுப்பூசியும் கீட்ரூடாவும் சேர்ந்து புற்றுநோயை நீண்ட காலம் தடுக்கின்றன: சோதனை தரவு

தோல் புற்றுநோயின் ஒரு வகையான, அதிக அபாயமுள்ள மெலனோமா நோயாளிகளுக்குப் பரிசோதனை நிலையிலுள்ள புற்றுநோய் தடுப்பூசியையும், அங்கீகரிக்கப்பட்ட நோய்எதிர்ப்பு சிகிச்சை மருந்தான கீட்ரூடாவையும் இணைத்துக் கொடுத்தனர். ஒரு பெரிய மருத்துவ சோதனையில் இவர்கள், கீட்ரூடா மட்டும் பெற்றவர்களை விட நீண்ட காலம் புற்றுநோயின்றி இருந்தனர். இதை மொடர்னாவும் மெர்க் நிறுவனமும் ஆகஸ்ட் 19 அன்று அறிவித்தன. சோதனையின் தரவை நிறுவனங்கள் இதுவரை வெளியிடவில்லை. இந்தத் தடுப்பூசியோ, இணைப்புச் சிகிச்சையோ இன்னும் ஒழுங்குமுறை நிறுவனங்களால் அங்கீகரிக்கப்படவில்லை. அங்கீகாரம் கிடைத்தால், இந்தத் தனிப்பயனாக்கப்பட்ட முறை நோயாளிகளுக்குப் புதிய சிகிச்சை வழியாக அமையலாம் என நிறுவனங்கள் கூறுகின்றன. இதே இணைப்புச் சிகிச்சை பற்றிய முந்தைய சோதனை ஒன்றில், கீட்ரூடா மட்டும் பெற்றதைவிட, புற்றுநோய் மீண்டும் வருவதற்கான அல்லது இறப்புக்கான அபாயத்தைப் பாதியாகக் குறைத்ததாகக் கண்டறியப்பட்டது.

இண்டிஸ்மெரான் (intismeran) எனப்படும் இந்தத் தடுப்பூசி, கோவிட்-19 தடுப்பூசிகளிலும், சமீபத்தில் அங்கீகரிக்கப்பட்ட காய்ச்சல் தடுப்பூசியிலும் பயன்படுத்தப்பட்ட mRNA தொழில்நுட்பத்தையே பயன்படுத்துகிறது. நோயாளியின் சொந்தக் கட்டியிலிருந்து மரபணுப் பொருளை உடலுக்குள் அனுப்புகிறது இது. இது ஒரு சிகிச்சை-தடுப்பூசி. அதாவது, மெலனோமா ஏற்படுவதைத் தடுக்காது. மாறாக, நியோஆன்டிஜென்கள் (neoantigens) எனப்படும் புரதத் துண்டுகளைப் பயன்படுத்தி, நோயாளியின் குறிப்பிட்ட கட்டி செல்களை அடையாளம் காணும்படி நோய்எதிர்ப்பு அமைப்பிற்குப் பயிற்சி அளிக்கிறது. ஒவ்வொரு தடுப்பூசியும் அந்தந்த நோயாளியின் புற்றுநோய் செல்களிலிருந்தே தயாரிக்கப்படுவதால், ஒவ்வொருவருக்கும் ஏற்ப தனிப்பயன் சிகிச்சையை உருவாக்க முடிகிறது.

கீட்ரூடா ஏற்கெனவே நுரையீரல், பெருங்குடல், மார்பகப் புற்றுநோய் உள்ளிட்டவற்றுக்கு அங்கீகரிக்கப்பட்ட ஒரு செக்பாயிண்ட் இன்ஹிபிட்டர் ஆகும். இந்தச் சிகிச்சையை உருவாக்குவதில் ஈடுபடாத மிச்சிகன் பல்கலைக்கழக மருத்துவப் புற்றுநோயியல் நிபுணர் லெஸ்லி ஃபெச்சர் இதை விளக்கினார். நோய்எதிர்ப்பு அமைப்புக்குப் பிரேக் போல செயல்படும் PD-1 எனும் புரதத்தைத் தடுப்பதே கீட்ரூடாவின் செயல்பாடு. கட்டி அறுவை சிகிச்சை மூலம் அகற்றப்பட்ட பிறகு எஞ்சியிருக்கும் புற்றுநோய் செல்களை உடல் தாக்கும்படி செய்வதே, தடுப்பூசியும் கீட்ரூடாவும் இணைந்து இலக்காகக் கொள்வது.

இந்தச் சோதனையில் பங்கேற்ற நோயாளிகள் அனைவரின் கட்டிகளும் அறுவை சிகிச்சை மூலம் அகற்றப்பட்டிருந்தன. கட்டி தோலில் மட்டுமே இருந்த அதிக அபாயமுள்ள இரண்டாம் நிலை முதல், அருகிலுள்ள நிணநீர் முடிச்சுகளுக்குப் பரவிய மூன்றாம் நிலை வரையிலான நோயாளிகள் இதில் இருந்தனர். நுரையீரல் போன்ற வேறு உறுப்புக்குப் பரவி, அங்கிருந்து அகற்றப்பட்ட ஒரு கட்டியுடன் கூடிய நான்காம் நிலை நோயாளிகளும் இதில் இருந்தனர். அமெரிக்காவில் மிக அதிகமாகக் காணப்படும் புற்றுநோய் தோல் புற்றுநோய்தான். தோல் புற்றுநோயால் ஏற்படும் இறப்புகளில் பெரும்பாலானவற்றுக்கு மெலனோமா காரணமாகிறது. அமெரிக்கன் கேன்சர் சொசைட்டியின் கணக்கெடுப்பின்படி, ஆண்டுதோறும் 1,00,000-க்கும் அதிகமானோருக்கு மெலனோமா கண்டறியப்படுகிறது. சுமார் 8,500 பேர் இதனால் உயிரிழக்கின்றனர்.