விண்வெளியில் மலம் கழிப்பதில் வீரர்கள் சிரமப்படுவது ஏன்? ஆய்வு விடை

விண்வெளியில் விண்வெளி வீரர்கள் பொதுவாக மலச்சிக்கலால் அவதிப்படுவது ஏன் என்பதைக் கண்டறிந்துள்ளது நேச்சர் கம்யூனிகேஷன்ஸ் இதழில் வெளியான ஒரு ஆய்வு. சர்வதேச விண்வெளி நிலையத்தில் இருந்தபோதும், பூமிக்குத் திரும்பிய பிறகும், 52 விண்வெளி வீரர்களிடமிருந்து பெறப்பட்ட 488 ரத்த மாதிரிகளை ஆராய்ச்சியாளர்கள் பகுப்பாய்வு செய்தனர். இந்த வீரர்கள் இரண்டு முதல் ஒன்பது மாதங்கள் வரை விண்வெளியில் தங்கியிருந்தனர். உடல், குடலில் உள்ள உணவு, குடல் நுண்ணுயிரிகள் ஆகியவற்றின் மூலக்கூறுகளில் ஏற்பட்ட மாற்றங்களை இந்த மாதிரிகள் மூலம் ஆராய்ச்சியாளர்கள் ஆய்வு செய்தனர்.

நுண்ணீர்ப்பு நிலையில் (microgravity), உணவை செரிமான மண்டலம் வழியாகத் தள்ளும் குடல் இயக்கம் மிகவும் மெதுவாகிவிடுவதை ஆராய்ச்சியாளர்கள் கண்டறிந்தனர். வழக்கமாக, உணவிலிருந்து ஆற்றலை உருவாக்க குடல் நுண்ணுயிரிகள் முக்கியமாக நார்ச்சத்தையும் கார்போஹைட்ரேட்டையும் நம்பியிருக்கும். ஆனால் விண்வெளியில், புரதத்தையே அவை அதிகமாக நம்பியிருப்பதாக ஆய்வு கண்டறிந்தது. மொத்தத்தில், விண்வெளி வீரர்களின் உடலில் சுமார் 40 கூறுகள் மாற்றமடைந்தன. இவற்றில் பெரும்பாலானவை, ஆற்றலுக்காக குடல் நுண்ணுயிரிகள் புரதத்தை உடைக்கும் இந்த மாற்றத்துடன் தொடர்புடையவை.

நுண்ணீர்ப்பு நிலையில் செரிமானமும் கழிவு பிரிதலும் மெதுவாவதால், மலம் உருவாவதே மெதுவாகிறது. இதனால் விண்வெளி வீரர்கள் குறைவாகவே மலம் கழிக்கின்றனர். விண்வெளியில் நீண்ட காலம் தங்குவது, இது உடல்நலத்தைப் பாதித்து, தேவையில்லாத நச்சுப் பொருட்கள் குவிவதற்கு வழிவகுக்கும் என்று ஆராய்ச்சியாளர்கள் கண்டறிந்தனர். பல ஆண்டுகள் வரை வீரர்களை விண்வெளியில் தங்க வைக்கக்கூடிய எதிர்கால பயணங்களுக்கு இது ஒரு கவலைக்குரிய விஷயமாகும்.

இந்த மாற்றங்கள் ஏவப்பட்ட சில நாட்களிலேயே தொடங்குவதாகவும், வீரர்கள் பூமியில் தரையிறங்கிய சில நாட்களுக்குள் இயல்பு நிலைக்குத் திரும்புவதாகவும் ஆய்வு கண்டறிந்தது. வீரர்களின் உணவுமுறையைச் சரிசெய்வதன் மூலம் இந்த மாற்றங்களை ஓரளவு குறைக்க முடியும். ஆனால் நீடித்த தீர்வு ஒன்றுக்கு மேலும் ஆய்வுகள் தேவை.