கருந்துளை மோதலின் மர்மத்திற்கு விண்வெளி வளைவு விளக்கமா?

2023 நவம்பர் 23-ஆம் தேதி லேசர் இன்டர்ஃபெரோமீட்டர் ஈர்ப்பலை வானாய்வகம் (LIGO) கண்டறிந்த ஒரு அசாதாரண கருந்துளை மோதல், முதலில் நினைத்தது போல் தீவிரமானதாக இருக்காது என புதிய ஆய்வு கூறுகிறது. GW231123 எனப் பெயரிடப்பட்ட இச்சமிக்ஞை, 140 சூரிய நிறை கொண்ட ஒரு கருந்துளையும், 100 சூரிய நிறை கொண்ட மற்றொரு கருந்துளையும் மோதியதால் உருவானது போல் தோன்றியது. இவை வழக்கமான நட்சத்திர பரிணாம மாதிரிகளால் விளக்க முடியாத அளவு வேகமாகச் சுழன்றன.

இவ்வித்தியாசமான நிறைகள் ஈர்ப்பு லென்சிங் எனும் மாயையால் ஏற்பட்டிருக்கலாம் என புதிய ஆய்வு கூறுகிறது. இது ஆஸ்ட்ரோபிசிக்கல் ஜர்னல் லெட்டர்ஸ் இதழில் வெளியிடப்பட்டுள்ளது. ஆல்பர்ட் ஐன்ஸ்டீனின் 1915 பொது சார்பியல் கோட்பாட்டால் முன்னரே கணிக்கப்பட்ட ஈர்ப்பு லென்சிங், ஒளியோ அல்லது ஆய்வுக்குழு கூறுவது போல ஈர்ப்பலைகளோ, ஒரு பாரிய பொருளைக் கடக்கும்போது நிகழ்கிறது. அப்பொருள் விண்வெளி-காலத்தை வளைத்து பாதையை மாற்றி, சமிக்ஞையை பெரிதாக்கியோ பிரித்தோ காட்டும்.

ஒளியைப் போலவே ஈர்ப்பலைகளும் பாரிய பொருட்களால் திசைமாற்றப்படலாம் என ஆல்பர்ட் ஐன்ஸ்டீன் நிறுவனத்தின் (AEI) குழுத் தலைவர் மிகுவேல் சுமலகாரெகுய் தெரிவித்தார். அவை பெரிதாக்கப்பட்டு, பல சமிக்ஞைகளாகவும் பிரிக்கப்படலாம் என்றார். GW231123-ஐ இவ்வாறு விளக்க முடியுமா என சோதிக்க ஆய்வுக்குழு ஒரு கணிதமாதிரியையும் மென்பொருளையும் உருவாக்கியது.

ஆய்வுக்கு உதவிய AEI-யில் இருந்த ஸ்ரஷ்டி கோயல் ஒரு சாத்தியத்தை முன்வைத்தார். GW231123, சுமார் 190 முதல் 850 சூரிய நிறை கொண்ட ஒரு பொருளால் திசைமாற்றப்பட்டிருக்கலாம். அல்லது குலோபுலர் கிளஸ்டர் போன்ற பரந்த அமைப்பாலும் இது நிகழ்ந்திருக்கலாம். இவ்வாறாயின், கருந்துளைகள் அசாதாரணமாக வேகமாகச் சுழலவேண்டிய தேவையின்றியே அதிக நிறையை விளக்கலாம் என்றார். இவ்வாறு மாதிரியாக்கினால், மோதலில் ஈடுபட்ட அமைப்பின் மொத்த நிறை முதலில் கணக்கிடப்பட்ட 240 சூரிய நிறைக்குப் பதிலாக 140 சூரிய நிறையாக இருந்தது.

லென்சிங்கிற்குக் காரணமான பொருள் என்னவென்று ஆய்வுக்குழுவுக்கு இன்னும் தெரியவில்லை. 100 முதல் 1,000 சூரிய நிறை கொண்ட தனித்த பாரிய பொருட்கள் மிகவும் அரிதாகவே இருக்கும் என சுமலகாரெகுய் குறிப்பிட்டார். GW231123-தான் ஈர்ப்பு லென்சிங்கால் பாதிக்கப்பட்ட முதல் ஈர்ப்பலை சமிக்ஞை என உறுதியாகக் கூற இன்னும் முடியாது என ஆய்வாளர்கள் கூறுகின்றனர். எதிர்காலத்தில் இதுபோன்ற சமிக்ஞைகளை உறுதிப்படுத்த LIGO போன்ற கண்டறிதல் கருவிகளை மேம்படுத்த வேண்டும்.