பேரிடர் முன்னறிவிப்பை விரைவுபடுத்த நாசாவின் 100 பெட்டாபைட் தரவை சூப்பர் கம்ப்யூட்டரில் இணைத்த ETH சூரிக்

நாசாவின் பரந்த காலநிலைத் தரவுகளை AI மாடல்களுக்குப் பயிற்றுவித்து, உயிர்காக்கக்கூடிய முன்னறிவிப்புகளை மிக விரைவாக வழங்க சுவிட்சர்லாந்து ஆய்வாளர்கள் முயல்கின்றனர். இயற்கை பேரிடர் முன்னறிவிப்பில் ஒரு புரட்சி நிகழ்ந்து வருவதாக அவர்கள் கூறுகின்றனர். நாசாவின் தரவு களஞ்சியத்தை உலகின் மிக சக்திவாய்ந்த சூப்பர் கம்ப்யூட்டர்களில் ஒன்றில் அவர்கள் செலுத்துகின்றனர். இதனால் வானிலை, காலநிலை முன்னறிவிப்பை விரைவுபடுத்தவும் விரிவுபடுத்தவும், விஞ்ஞானிகள் இதற்கு முன் காணாத அமைப்புகளைக் கண்டறியவும் AI உதவும் என அவர்கள் நம்புகின்றனர்.

சுவிட்சர்லாந்தின் சூரிக் தொழில்நுட்பக் கூட்டமைப்புப் பல்கலைக்கழக (ETH) ஆய்வாளர்கள், பொதுவில் கிடைக்கும் நாசாவின் தரவில் சுமார் 100 பெட்டாபைட் அளவை, அதாவது சுமார் ஆறு பில்லியன் கோப்புகளை நகலெடுத்துள்ளனர். லுகானோவில் உள்ள சுவிஸ் தேசிய சூப்பர் கம்ப்யூட்டிங் மையத்தில் (CSCS) இயங்கும் ஆல்ப்ஸ் என்ற உலகின் மிக சக்திவாய்ந்த சூப்பர் கம்ப்யூட்டர்களில் ஒன்றின் அருகே உள்ள சேவையகங்களில் இவை சேமிக்கப்பட்டுள்ளன. இந்த மாற்றத்திற்கு சுமார் ஓர் ஆண்டு ஆனது என, ETH நிறுவனத்தின் காலநிலை அமைப்பு மாடலிங் மையத்தை (C2SM) வழிநடத்தும் காலநிலை இயற்பியல் பேராசிரியர் ரெட்டோ நுட்டி தெரிவித்தார். இந்த தரவு அளவை சுமார் 20 மில்லியன் முழு நீள திரைப்படங்களுக்கு, அல்லது வழக்கமான கணினியின் சேமிப்பகத்தை விட சுமார் ஒரு மில்லியன் மடங்கு அதிகமானதாக அவர் ஒப்பிட்டார்.

"இது ஒரு மகத்தான அறிவியல் வாய்ப்பு" என்று ETH கணிப்பு இயற்பியல் பேராசிரியரும் CSCS தலைவருமான தாமஸ் சூல்தெஸ் கூறினார். நாசாவின் காலநிலைத் தரவு நேரடியாக இயந்திரத்தில் இணைக்கப்பட்டிருப்பது, "விஞ்ஞானிகள் முன்பு நினைத்துப் பார்க்காத விஷயங்களைச் செய்ய உண்மையிலேயே உதவுகிறது" என அவர் மேலும் கூறினார். கடல் மற்றும் வளிமண்டல செயல்பாடுகளை கணித சமன்பாடுகள் மூலம் உருவகப்படுத்தும் பாரம்பரிய முறையை விட, AI உருவாக்கிய புள்ளியியல் மாடல்கள் மிக விரைவானவை என நுட்டி கூறினார். மணிநேரங்களுக்குப் பதிலாக, "வடிவ அறிதல் அடிப்படையிலான புள்ளியியல் மாடல் ஒரு நிமிடத்தில் பல நாட்களுக்கான உலகளாவிய வானிலை முன்னறிவிப்பைச் செய்ய முடியும்" என்றார்.

இந்த மாடல்களைப் பயிற்றுவிப்பது செலவு அதிகம் எனினும், இயக்குவது மலிவானது என நுட்டி கூறினார். இதனால் ஆய்வாளர்கள் ஒரு குறிப்பிட்ட வானிலை அமைப்பு உருவாகிறதா என பலமுறை சரிபார்க்க முடியும். இது உயிர் காக்கும் முன்னெச்சரிக்கை அமைப்புகளுக்கு உதவும். அனைத்து பேரிடர்களையும் முன்கூட்டியே கணிக்க முடியாது என அவர் கூறினார். ஆனால் நிலச்சரிவு, பனிப்பாறை சரிவு போன்ற புவியியல் அபாயங்களை, வடிவத்தை அடையாளம் காணும் திறன் இருந்தால் செயற்கைக்கோள் தரவில் முன்கூட்டியே கண்டறிய முடியும் என அவர் தெரிவித்தார்.

கடந்த ஆண்டு மே மாதம் பனிப்பாறை சரிவால் அழிந்த சுவிஸ் கிராமமான ப்ளாட்டனை அவர் உதாரணமாகக் குறிப்பிட்டார். அந்த ஆபத்து ஒரு ஆண்டுக்கும் மேலாக முன்பே செயற்கைக்கோள் தரவில் தெரிந்தது. நெருக்கமான கண்காணிப்பு காரணமாக சுவிஸ் அதிகாரிகள் சரிவுக்கு ஒரு வாரம் முன்பே கிராமத்தை வெளியேற்றி, பெருமளவு உயிரிழப்பைத் தவிர்த்தனர். நேபாளம்-சீனா எல்லையில் ஆகஸ்ட் 26-ம் தேதி நிகழ்ந்த பேரழிவு தரும் பனிப்பாறை சரிவுக்கு முன்பும், இதேபோன்ற நெருக்கமான கண்காணிப்பு எச்சரிக்கை அளித்திருக்க முடியும் என நுட்டி கூறினார். அந்தப் பகுதியில் செயற்கைக்கோள் பட பகுப்பாய்வு முன்எச்சரிக்கை அறிகுறிகளைக் காட்டியிருந்ததாகத் தெரிகிறது.