எதிர்கால தீவிர வானிலை பேரழிவுகள் இன்னும் கொடூரமாக இருக்கலாம்: ஆய்வு எச்சரிக்கை

லண்டனின் கிங்ஸ் கல்லூரி விஞ்ஞானிகள், இதுவரை பதிவான கடுமையான புயல்கள் மற்றும் வெப்ப அலைகளின் வரலாற்றுத் தரவுகள், எதிர்காலத்தில் ஏற்படக்கூடிய வானிலைப் பேரழிவுகளின் தீவிரத்தை சரியாகக் காட்டாது என எச்சரிக்கின்றனர். ஏனெனில், அதிக உயிரிழப்புகள் மற்றும் உள்கட்டமைப்பு, ஆரோக்கியத்தில் ஏற்படும் பாதிப்புகள் போன்ற மிக மோசமான சாத்தியக்கூறுகளைக் கணிக்க தற்போதைய திட்டமிடல் கருவிகள் வடிவமைக்கப்படவில்லை என அவர்கள் தெரிவிக்கின்றனர்.

நேச்சர் சஸ்டெய்னபிலிட்டி இதழில் வெளியான ஆய்வுக் கட்டுரையில், 2000 முதல் 2025 வரை பதிவான ஒவ்வொரு வெப்பமண்டல புயலிலும், வெப்ப அலையிலும் ஏற்பட்ட உயிரிழப்புகள் ஆய்வு செய்யப்பட்டன. மொத்த உயிரிழப்புகளில் பெரும்பகுதி ஒரு சில பேரழிவு நிகழ்வுகளில் மட்டுமே குவிந்திருப்பது கண்டறியப்பட்டது. 2008ஆம் ஆண்டு மியான்மரைத் தாக்கிய நர்கிஸ் புயலில் கிட்டத்தட்ட 1,40,000 பேர் உயிரிழந்தனர். இது, அதே காலகட்டத்தில் ஏற்பட்ட மற்ற 675 கொடிய வெப்பமண்டல புயல்களால் ஏற்பட்ட மொத்த உயிரிழப்பைவிட இரண்டு மடங்கு அதிகம். மிகக் கொடிய வெப்ப அலை 2003ஆம் ஆண்டு ஐரோப்பாவில் ஏற்பட்டது. அப்போது சுமார் 70,000 பேர் உயிரிழந்தனர். இறந்தவர்களில் கிட்டத்தட்ட பாதிப் பேர், ஆகஸ்ட் மாத முதல் இரண்டு வாரங்களிலேயே உயிரிழந்தனர்.

எதிர்காலத்தில் மில்லியன் கணக்கானோர் உயிரிழக்கக்கூடிய நிகழ்வுகளை முற்றிலும் நிராகரிக்க முடியாது எனப் பகுப்பாய்வு கூறியது. எனினும், இது சாத்தியம் என்பதால் அது நிகழக்கூடும் என்று பொருள் அல்ல என ஆசிரியர்கள் வலியுறுத்தினர். முதன்மை ஆசிரியரும், லண்டனின் கிங்ஸ் கல்லூரியில் சுற்றுச்சூழல் புவியியல் மூத்த விரிவுரையாளருமான டாக்டர் டாம் மேத்யூஸ் இவ்வாறு கூறினார்: 'வரலாறு, எதிர்கால அபாயத்தை நாம் குறைவாக மதிப்பிடும்படி செய்யும் வாய்ப்பே அதிகம். தீவிர வானிலை என்றால் என்ன செய்யும் என்ற நமது புரிதலை வடிவமைத்த நிகழ்வுகள், நிகழக்கூடிய மிக மோசமான நிகழ்வுகள் அல்ல.'

பரிச்சயமான புயல்களை, வழக்கத்திற்கு மாறான தீவிரத்துடன் எதிர்கொள்வதில் - எடுத்துக்காட்டாக அதிக காற்றின் வேகம் கொண்ட சூறாவளிகள் - தற்போதைய அபாய மதிப்பீட்டு அணுகுமுறைகள் பொதுவாகத் திறம்பட உள்ளன. ஆனால் முன் உதாரணமே இல்லாத நிகழ்வுகளுக்கு அவை தயாராக இல்லை. எடுத்துக்காட்டாக, வலிமையான சூறாவளிக்கு சற்று முன்பே ஏற்படும் கடுமையான வெப்ப அலை. அப்போது மில்லியன் கணக்கானோர் வெளியேறிக்கொண்டிருக்கும் நிலையில், குளிரூட்டி வசதி கிடைக்காமல் போகலாம்.

இத்தகைய பேரழிவு சூழல்களைக் கண்டறிந்து தடுக்க உதவும் வகையில், ஆசிரியர்கள் மூன்று முன்னுரிமைகளை முன்வைத்துள்ளனர். முதலாவது, இருப்பு அபாய அறிஞர்கள், முன்களப் பாதிப்பு சமூகங்கள், காப்பீட்டாளர்கள், காலநிலைப் புனைகதை எழுத்தாளர்கள், காலநிலை மாடல் நிபுணர்கள் ஆகியோரை உள்ளடக்கிய எதிர்கால அபாய ஆய்வுகள் (ஹொரைசன் ஸ்கேன்). இரண்டாவது, பாதிப்புகள் திடீரென கூர்மையாக அதிகரிக்கும் வாய்ப்புகளை நன்கு புரிந்துகொள்வது. மூன்றாவது, இன்றைக்கு இல்லாத அளவு வெப்பமான மற்றும் குளிரான காலநிலைகளில் வானிலையின் இயற்பியல் எல்லைகளை வரைபடமாக்குவது.