கடல் அமிலமாக்கம் டயட்டங்களின் கார்பன் பிடிப்பையும் உணவு வலையையும் பாதிக்கலாமா?

பிளிண்டர்ஸ் பல்கலைக்கழகத்தின் புதிய ஆய்வு, கடல் அமிலமாக்கம் எவ்வாறு டயட்டங்களைப் (diatoms) பாதிக்கக்கூடும் என்பதைக் காட்டுகிறது. கடல், ஏரி, ஆறு, ஈரமான மண் ஆகியவற்றில் காணப்படும் நுண்ணிய, ஒரே செல் கொண்ட நுண்பாசிகளான இவை, கடல் உணவு வலைகளையும் கடலின் கார்பன் பிடிப்புத் திறனையும் பாதிக்கக்கூடும். மரைன் எக்காலஜி இதழில் வெளியான இந்த ஆய்வு, நுண்பாசி இனங்களை உயர்தொழில்நுட்ப முறைகள் மூலம் சோதித்தது. அதிகரிக்கும் கார்பன் டை ஆக்சைடு (CO2) அளவால் ஏற்படும் அமிலமாக்கம் உள்ளிட்ட பல அழுத்தங்கள், சுவட்டுத் தனிமங்களை அவை உட்கொள்வதை எப்படி பாதிக்கின்றன என்பதை இது ஆராய்ந்தது.

டயட்டங்கள் பூமியின் வளிமண்டலத்தில் உள்ள ஆக்சிஜனில் குறிப்பிடத்தக்க பகுதியை உற்பத்தி செய்கின்றன. கடலின் முதன்மை உற்பத்தியில் 40 முதல் 50 சதவீதம் வரை இவற்றின் பங்கு உள்ளது என மூத்த ஆசிரியர் சோஃபி லெடெர்ம் தெரிவித்தார். பிளிண்டர்ஸ் பல்கலைக்கழகத்தின் ஏஆர்சி பயோஃபிலிம் ஆராய்ச்சி மற்றும் புதுமை பயிற்சி மையத்தின் இயக்குநராக அவர் உள்ளார். மேலோட்டப் பரப்பு நீரிலிருந்து கார்பன் டை ஆக்சைடை பிடித்து, ஆழ்கடலுக்கு கரிமக் கார்பனை ஏற்றுவதற்கும் இவை உதவுகின்றன.

"கடலின் pH மாற்றங்கள் இந்த டயட்டங்களின் வளர்ச்சி, எண்ணிக்கை மற்றும் தனிம அமைப்பை பாதிக்கலாம் என நாங்கள் காட்டியுள்ளோம்" என லெடெர்ம் கூறினார். இந்த மாற்றங்கள் பல்வேறு சுவட்டுத் தனிமங்களுடன் எவ்வாறு தொடர்புகொள்கின்றன என்பதை ஆராய வேண்டும் என்றும் அவர் தெரிவித்தார். இது கடல் உணவு வலைகளில் இடையூறு, கார்பன் மற்றும் சிலிக்கான் ஏற்றுமதி குறைவு, நுண்ணுயிர் செயல்பாடு அதிகரிப்பு ஆகிய பரந்த சூழலியல் தாக்கங்களுக்கு வழிவகுக்கலாம் என்றார். அதிகரிக்கும் கார்பன் உமிழ்வுகள் கடல் நீரின் pH ஐ மாற்றுகின்றன. இது இரும்பு, துத்தநாகம், கேட்மியம் போன்ற — கரிமமற்ற கார்பனை உட்கொள்ள இன்றியமையாத — சுவட்டுத் தனிமங்களை நுண்பாசிகள் உட்கொள்ளும் விதத்தை பாதிக்கலாம்.

தொழில்துறை புரட்சி முடிவடைந்ததில் இருந்து, கடலில் கார்பன் டை ஆக்சைடு கரைவதால் கடல் நீரின் pH ஏற்கெனவே 0.1 அலகு உலகளவில் குறைந்துள்ளது. இந்த நூற்றாண்டின் இறுதிக்குள் இது மேலும் 0.3 முதல் 0.6 அலகு வரை குறையக்கூடும் என மதிப்பிடப்பட்டுள்ளது. தென் ஆஸ்திரேலியாவின் கல்ஃப் செயின்ட் வின்சென்ட் மற்றும் சிஎஸ்ஐஆரோ நுண்பாசித் தொகுப்பிலிருந்து பெறப்பட்ட கடல் நீர் மாதிரிகளைப் பயன்படுத்தினர். ஆன்ஸ்டோ நிறுவனத்தின் நிபுணத்துவத்துடன், நியூட்ரான் ஆக்டிவேஷன் அனாலிசிஸ் முறையை ஆய்வாளர்கள் பயன்படுத்தினர். இதை தலாசியோசிரா ஸ்யூடோனானா மற்றும் நிட்ஸ்கியா நேவிஸ்-வரிங்கிகா இனங்களுக்குப் பயன்படுத்தினர்.

"டயட்டங்களின் எண்ணிக்கையும் வளர்ச்சியும் அதிகரிப்பது கார்பன் டை ஆக்சைடு அளவைக் குறைக்க உதவலாம்" என ஆய்வாளர்கள் தெரிவித்தனர். "என்றாலும், சூழலில் முதன்மை, சுவட்டு தனிமங்களின் அளவு குறைவதால் ஏற்படும் தாக்கம் இன்னும் நன்கு புரிந்துகொள்ளப்படவில்லை" என்றும் அவர்கள் கூறினர். இந்தக் கண்டுபிடிப்புகள் மற்ற கடல்வாழ் உயிரினங்களுக்கும் பொருந்தக்கூடும் என அவர்கள் தெரிவித்தனர். கடல் நீரின் தரத்தை மதிப்பிட டயட்டங்கள் ஏற்கெனவே பயோ இண்டிகேட்டர்களாகப் (bioindicators) பயன்படுத்தப்படுகின்றன.