நாகப்பாம்பு விடத்திற்கு மாற்று மருந்து கண்டுபிடித்த ஐஐஎஸ்சி - டென்மார்க் டிடியு விஞ்ஞானிகள்

ஒவ்வோர் ஆண்டும் இந்தியாவில் நாகப்பாம்பு தீண்டலால் சுமார் 50,000 பேர் உயிரிழக்கின்றனர். இது உலகிலேயே அதிகபட்ச எண்ணிக்கை. பெங்களூரு இந்திய அறிவியல் கல்வி நிறுவனம் (ஐஐஎஸ்சி) மற்றும் டென்மார்க் தொழில்நுட்பப் பல்கலைக்கழகம் (டிடியு) ஆய்வாளர்கள் இணைந்து பணியாற்றினர். இந்திய நாகப்பாம்பு மற்றும் இராஜநாகப்பாம்பு இனங்களின் விடத்தை எதிர்க்கும் புதிய மாற்று மருந்தை அவர்கள் உருவாக்கியுள்ளனர்; இது எலிகளிடம் சோதிக்கப்பட்டு பாதுகாப்பு அளித்தது. இந்த ஆய்வு முடிவுகள் சயின்ஸ் ட்ரான்ஸ்லேஷனல் மெடிசின் இதழில் வெளியாகியுள்ளன.

பாம்பு விடமானது நரம்பு மண்டலம், இரத்தம் மற்றும் திசுக்களை சேதப்படுத்தும் பல்வேறு நச்சுகளின் கலவையாகும். இனத்திற்கு இனம், பகுதிக்குப் பகுதி இதன் கூறுகள் மாறுபடுவதால், ஒரே மாற்று மருந்தால் அனைத்தையும் எதிர்க்க முடிவதில்லை. நூறு ஆண்டுகளுக்கும் மேலாக பின்பற்றப்படும் வழக்கமான முறையில், குதிரைகளுக்கு விடத்தை செலுத்தி, அவற்றின் இரத்தத்தில் இருந்து எதிர்ப்பொருள்களை பிரித்தெடுத்து மாற்று மருந்து தயாரிக்கப்படுகிறது. இதில் தொகுதிக்குத் தொகுதி மாறுபாடு, பக்க விளைவுகள், குறைந்த அளவு பயனுள்ள எதிர்ப்பொருள்கள் எனப் பல குறைபாடுகள் உள்ளன.

ஐஐஎஸ்சியின் சூழலியல் அறிவியல் மையத்தின் இணைப் பேராசிரியர் கார்த்திக் சுனகர் மற்றும் டிடியுவின் பேராசிரியர் ஆண்ட்ரியாஸ் லாஸ்ட்சன் இந்த ஆய்வுக்குத் தலைமை தாங்கினர். விடத்தில் உள்ள நச்சுகளுடன் ஒட்டி, அவை உடலின் இலக்கு ஏற்பிகளுடன் இணைவதைத் தடுக்கும் ஐந்து சிறிய எதிர்ப்பொருள் துணுக்குகளான 'நானோபாடி'களை ஆய்வாளர்கள் உருவாக்கினர். "மாற்று மருந்து சிகிச்சை நூறு ஆண்டுகளாக கிட்டத்தட்ட மாறவே இல்லை" என்று சுனகர் கூறினார். இதை இந்தியாவின் நாகப்பாம்பு தீண்டல் பாதிப்பை எதிர்கொள்ளும் அடுத்த தலைமுறை அணுகுமுறை என அவர் விவரித்தார். ஆப்பிரிக்க பாம்பு விடங்களுக்கு முன்னர் உருவாக்கப்பட்ட, தடுப்பூசி செலுத்தப்பட்ட அல்பாக்கா, லாமா ஒட்டக இன விலங்குகளிடமிருந்து பெறப்பட்ட எதிர்ப்பொருள்களை அடிப்படையாகக் கொண்டு இந்த நானோபாடிகள் உருவாக்கப்பட்டன. பின்னர் இவை நுண்ணுயிரி செல்களில் மீண்டும் உற்பத்தி செய்யப்பட்டன.

சோதனையில், கண்ணாடி நாகப்பாம்பு, மோனோகிள்டு நாகப்பாம்பு மற்றும் இரண்டு வகை இந்திய இராஜநாகப்பாம்பு விடம் செலுத்தப்பட்ட எலிகளை இந்த நானோபாடி கலவை காப்பாற்றியது. விடம் செலுத்திய 30 நிமிடங்களுக்குப் பிறகு மருந்து கொடுக்கப்பட்ட போதும் எலிகள் இறக்கவில்லை. பக்கவாதம் அடைந்த அல்லது நரம்புப் பாதிப்பு அறிகுறிகளுடன் இருந்த சில எலிகள், சிகிச்சைக்குப் பின் முற்றிலும் சாதாரண நிலைக்குத் திரும்பியதாக சுனகர் தெரிவித்தார். ஒப்பீட்டளவில் சிறிய அளவு எதிர்ப்பொருள்களைக் கொண்டே இந்த விளைவு கிடைத்தது.

வழக்கமான மாற்று மருந்துகள் போலல்லாமல், இந்த நானோபாடி எதிர்ப்பொருள்களை குதிரைகளுக்குத் தொடர்ந்து விடம் செலுத்தாமல், நுண்ணுயிரி அல்லது மனிதமயமாக்கப்பட்ட அமைப்புகளில் உற்பத்தி செய்ய முடியும். இதுபோன்ற மாற்று மருந்துகளை பிற பகுதிகளின் பாம்பு இனங்களுக்கு ஏற்றவாறு உருவாக்குவதற்கான ஒரு வழிகாட்டு மாதிரி இது எனலாஸ்ட்சன் கூறினார். இது தற்போது எலிகளிடம் மட்டுமே சோதிக்கப்பட்டுள்ளதால், மனிதர்களிடம் பயன்படுத்தும் முன் மேலும் ஆய்வுகளும் பாதுகாப்புச் சோதனைகளும் தேவை என ஆய்வாளர்கள் கூறுகின்றனர்.