ராட்டில்ஸ்நேக் இரத்தத்தில் சக்திவாய்ந்த விஷ மறுமருந்துக்கான வழி கண்டறிந்த ஆய்வாளர்கள்

அமெரிக்காவின் மேரிலாந்து பல்கலைக்கழக (UMD) ஆய்வாளர்கள், மேற்கத்திய டயமண்ட்பேக் ராட்டில்ஸ்நேக் பாம்புகளின் இரத்தத்தில் நச்சுத் தடுப்பு புரதங்களைக் கண்டறிந்துள்ளனர். இவை, பாம்பு கடிக்குச் சிகிச்சையளிக்கும் விஷ எதிர்ம‌ருந்தை இன்னும் சக்திவாய்ந்ததாக உருவாக்க உதவக்கூடும் என ஆய்வாளர்கள் தெரிவிக்கின்றனர். இந்தப் புரதங்கள், பாம்புகள் தங்கள் சொந்த விடத்திற்கு எதிராகத் தற்காத்துக் கொள்ள இயற்கையாக வளர்த்துக் கொண்ட பாதுகாப்பு அமைப்பாகும். மேரிலாந்து பல்கலைக்கழக உயிரியல் துறை சிறப்புப் பேராசிரியர் ஷான் பி. கரோல் தலைமையில் நடத்தப்பட்ட இந்த ஆய்வு, அமெரிக்க தேசிய அறிவியல் கழகத்தின் இதழான PNAS இல் வெளியிடப்பட்டுள்ளது.

பாம்பு கடி, உலகின் மிகவும் புறக்கணிக்கப்பட்ட வெப்பமண்டல நோய்களில் ஒன்றாகும். உலக சுகாதார அமைப்பு (WHO) மதிப்பீட்டின்படி, ஆண்டுதோறும் விஷப் பாம்புகள் காரணமாக சுமார் 80,000 முதல் 140,000 பேர் வரை உயிரிழக்கின்றனர். உயிர் பிழைத்தவர்களில் லட்சக்கணக்கானோர் நிரந்தர ஊனத்திற்கு ஆளாகின்றனர்; பெரும்பாலும் விஷ எதிர்ம‌ருந்து சரியாகக் கிடைக்காத கிராமப்புறங்களில் இவர்கள் வாழ்கின்றனர். தற்போதுள்ள விஷ எதிர்ம‌ருந்துகள், குதிரைகள் அல்லது ஆடுகளுக்கு பாம்பு விடத்தைச் செலுத்தி, அவற்றின் உடலில் உருவாகும் எதிர்ப்பொருள்களை (antibodies) சேகரிப்பதன் மூலம் தயாரிக்கப்படுகின்றன. இந்த முறை செலவு அதிகம் கொண்டது, தரத்திலும் திறனிலும் மாறுபடுகிறது, மேலும் கடுமையான நோய் எதிர்ப்பு சக்தி எதிர்வினைகளை ஏற்படுத்தலாம்.

2022ஆம் ஆண்டு, கரோலின் ஆய்வகம் FETUA-3 எனப்படும் ஒரு புரதத்தைக் கண்டறிந்தது. இது மேற்கத்திய டயமண்ட்பேக் ராட்டில்ஸ்நேக் பாம்பின் விடத்தில் உள்ள மெட்டலோப்ரோட்டீனேஸ்கள் எனப்படும் நச்சு நொதிகளை (திசு மற்றும் இரத்த நாளங்களைச் சேதப்படுத்தும் நொதிகள்) தடுக்க வல்லது. மேலும், இது பிற ராட்டில்ஸ்நேக் இனங்களின் நச்சுகளையும் முடக்குகிறது. டெக்சாஸ் ஏ அண்ட் எம் பல்கலைக்கழகத்தின் எல்டா சான்செஸ் உள்ளிட்ட இணை ஆசிரியர்களுடன் இணைந்து இந்த ஆய்வு மேற்கொள்ளப்பட்டது. இதில், ஒவ்வொரு FETUA புரதமும் விடத்தின் குறிப்பிட்ட விளைவுகளை மட்டுமே தடுக்க முடிந்தது எனக் கண்டறியப்பட்டது; ஒன்று இரத்தப்போக்கைக் குறைத்தது, மற்றொன்று நொதி செயல்பாட்டைத் தடுத்தது. ஆனால், எந்தப் புரதமும் தனியாக விடக் கடியால் ஏற்படும் மரணத்தை முழுமையாகத் தடுக்கவில்லை.

ஆய்வாளர்கள் பல FETUA புரதங்களை இணைத்தபோது, அந்தக் கலவைகள் தனிப்புரதங்களைவிட மிகவும் திறம்பட விடத்தைத் தடுத்தன. ஆய்வக சோதனைகளில், உகந்த முறையில் இணைக்கப்பட்ட கலவைகள் தற்போதுள்ள ஆடு அடிப்படையிலான ராட்டில்ஸ்நேக் விஷ எதிர்ம‌ருந்தை விடச் சுமார் பத்து மடங்கு அதிக ஆற்றல் கொண்டவையாக இருந்தன. இவை ராட்டில்ஸ்நேக் விடத்தின் கொல்லும் விளைவுகளை முழுமையாக முடக்கியதுடன், பல மில்லியன் ஆண்டுகளாகப் பரிணாம வேறுபாடு கொண்ட பல வைப்பர் (viper) இனப் பாம்புகளின் விடத்திற்கு எதிராகவும் பரந்த பாதுகாப்பை அளித்தன.

இந்த ஆய்வு, வைப்பர் பாம்பு விடத்தில் உள்ள மூன்று முக்கிய நச்சுக் குடும்பங்களில் ஒன்றான மெட்டலோப்ரோட்டீனேஸ்கள் மீது மட்டுமே கவனம் செலுத்தியது. மற்ற இரண்டு நச்சுக் குடும்பங்களையும் இப்போது ஆய்வாளர்கள் இலக்காகக் கொண்டுள்ளனர். இந்த ஆய்விற்கு ஹோவர்ட் ஹியூஸ் மருத்துவ நிறுவனம் மற்றும் வைப்பர் வளங்கள் மையம் நிதியுதவி அளித்தன.