ஏஐ மூலம் புதிய புரதம்: நோபல் ஆய்வகத்துடன் இணைந்தது ஐஐடி கான்பூர்

இந்திய தொழில்நுட்பக் கழகம் (ஐஐடி) கான்பூர் ஆராய்ச்சியாளர்கள், அமெரிக்காவின் வாஷிங்டன் பல்கலைக்கழகத்தில் நோபல் பரிசு பெற்ற உயிர்வேதியியலாளர் டேவிட் பேக்கரின் ஆய்வகத்துடன் இணைந்தனர். ஜி-புரோட்டீன் இணைந்த ஏற்பிகள் (GPCRs) எனப்படும் செல் மேற்பரப்பு ஏற்பிகளைத் தடுக்கக்கூடிய மினிப்ரோட்டீன் எனும் புதிய சிறிய புரதத்தை அவர்கள் வடிவமைத்துள்ளனர். பல நவீன மருந்துகள் செயல்படும் விதத்தில் GPCRs முக்கியப் பங்கு வகிக்கின்றன. "GPCR-களை இலக்காகக் கொண்ட மினிப்ரோட்டீன்களின் புதிய வடிவமைப்பு" எனும் தலைப்பிலான இந்த ஆய்வு நேச்சர் (Nature) இதழில் வெளியிடப்பட்டது.

GPCR-க்களுடன் இணைந்து அவற்றின் செயல்பாட்டை மாற்றும் மினிப்ரோட்டீன்களை திறம்பட வடிவமைத்து கண்டறிய செயற்கை நுண்ணறிவை (AI) பயன்படுத்தலாம் என இந்த ஆய்வு நிரூபிக்கிறது. CXCR4, CCR5 எனும் இரண்டு GPCR-கள் உள்பட பல ஏற்பிகளுக்கு ஆராய்ச்சிக் குழு மினிப்ரோட்டீன்களை வடிவமைத்தது. புற்றுநோய்க்கும் எச்ஐவி போன்ற வைரஸ் தொற்றுகளுக்கும் இவை இரண்டும் சாத்தியமான மருந்து இலக்குகளாக ஆராயப்பட்டு வருகின்றன.

வடிவமைக்கப்பட்ட மினிப்ரோட்டீன்களில் ஒன்று CXCR4 ஏற்பியுடன் எவ்வாறு இணைகிறது என்பதைக் காட்சிப்படுத்துவதே ஐஐடி கான்பூரின் பங்களிப்பாக இருந்தது. தனது கிரையோ-மின்னணு நுண்ணோக்கி (cryo-EM) வசதியில், சக்திவாய்ந்த இந்த படவியல் நுட்பத்தைப் பயன்படுத்தினர். இரு மூலக்கூறுகள் எவ்வாறு பொருந்துகின்றன, மினிப்ரோட்டீன் ஏற்பியின் செயல்பாட்டை எவ்வாறு மாற்றுகிறது என்பதை ஆராய்ச்சியாளர்களால் துல்லியமாகக் காண முடிந்தது.

ஏஐ அடிப்படையிலான புரத வடிவமைப்பு மருந்து கண்டுபிடிப்புக்கான நடைமுறை சாத்தியமான கருவி என்பதை இக்கண்டுபிடிப்புகள் காட்டுகின்றன. இந்த ஆய்வில் உருவாக்கப்பட்ட மினிப்ரோட்டீன்கள் இன்னும் மருந்துகள் அல்ல. இவை மருத்துவமனையை எட்டும் முன் பல ஆண்டுகள் மேலும் சோதனைகள் தேவை. எனினும், மருந்துகளால் இதுவரை இலக்குவைக்க கடினமாக இருந்த ஏற்பிகளுக்கு இலக்குசார் புரத அடிப்படையிலான சிகிச்சைகளை வடிவமைக்க இந்த ஆய்வு ஒரு செயல்படக்கூடிய முறையை வழங்குகிறது.