சிறுநீரக நோயை முன்கூட்டியே கண்டறிய ஏஐ கருவிகள் உருவாக்கிய ஐஐடி மெட்ராஸ், CMC வேலூர்

இந்திய தொழில்நுட்பக் கழகம் (ஐஐடி) மெட்ராஸ் மற்றும் வேலூர் கிறிஸ்தவ மருத்துவக் கல்லூரி (CMC) ஆராய்ச்சியாளர்கள் ஒரு புதிய கருவித் தொகுப்பை உருவாக்கியுள்ளனர். சிறுநீரக நோய்களை ஆரம்ப கட்டத்திலேயே கண்டறிந்து மதிப்பிட உதவும் செயற்கை நுண்ணறிவு (AI) அடிப்படையிலானவை இவை. இது குறிப்பிடத்தக்க சேதம் ஏற்படுவதற்கு முன்பே சரியான நேரத்தில் சிகிச்சை அளிக்க உதவும். இந்தத் தொழில்நுட்பங்களில், மருத்துவ மற்றும் ஆய்வக தரவுகளைப் பயன்படுத்தி நாள்பட்ட சிறுநீரக நோய் (CKD) ஏற்படும் அபாயத்தை கணிக்கும் இயந்திரக் கற்றல் மாடல். கணினிமய டோமோகிராபி (CT) ஸ்கேன்களை தானாகவே பகுப்பாய்வு செய்து இயல்பான சிறுநீரகம், சிறுநீரக நீர்க்கட்டி, சிறுநீரகக் கல், சிறுநீரக கட்டி என நான்கு வகைகளாக பிரிக்கும் ஆழ்ந்த கற்றல் அமைப்பு. CT ஸ்கேன்களில் இருந்து சிறுநீரகங்களை மறுஉருவாக்கம் செய்து கட்டியின் அளவையும் சிறுநீரகப் பாதிப்பு சதவீதத்தையும் துல்லியமாக மதிப்பிடும் 3D படவியல் தளம் ஆகியவை அடங்கும்.

CT பட வகைப்படுத்தி 12,000-க்கும் மேற்பட்ட படங்களில் பயிற்சி பெற்றது. ஆரோக்கியமான சிறுநீரகங்களை நீர்க்கட்டி, கல், கட்டி ஆகியவற்றிலிருந்து வேறுபடுத்தி அறிய முடியும். திறந்த மூல மென்பொருளைப் பயன்படுத்தி உருவாக்கப்பட்ட 3D படவியல் கட்டமைப்பு, கட்டியின் அளவை மதிப்பிட குறைந்த செலவில் மீண்டும் மீண்டும் பயன்படுத்தக்கூடிய முறையை வழங்குகிறது. இது மருத்துவர்களுக்கு சிகிச்சைத் திட்டமிடலில் உதவக்கூடும்.

ஐஐடி மெட்ராஸ் இயந்திரவியல் துறை பேராசிரியர் ஜி.எல். சாமுவேலின் கூற்றுப்படி, சிறுநீரக நோய்கள் பெரும்பாலும் ஆரம்ப கட்டத்தில் அறிகுறியின்றி இருப்பதால், குறிப்பிடத்தக்க சேதம் ஏற்படும் வரை கண்டறியப்படுவதில்லை. "டயாலிசிஸ் போன்ற விலையுயர்ந்த சிகிச்சைகளின் தேவையை இந்தக் கருவிகள் குறைக்க முடியும். சிறுநீரக நோய்களை முன்னதாகவே கண்டறிந்து, நோயாளிக்கேற்ற விரிவான தகவல்களை வழங்க உதவும் கருவிகளை உருவாக்க நாங்கள் இயந்திரக் கற்றலையும் மருத்துவ அறிவையும் இணைத்துப் பயன்படுத்தினோம்" என சாமுவேல் தெரிவித்தார்.

நாள்பட்ட சிறுநீரக நோய் மாடல் பயனர்நட்பு முன்மாதிரியாக உருவாக்கப்பட்டுள்ளது என ஐஐடி மெட்ராஸ் ஆராய்ச்சி மாணவர் ஜெனிஃபர் டெலிக்டா தெரிவித்தார். மருத்துவர்களுக்கான துல்லியத்தையும் விளக்கக்கூடிய தன்மையையும் மேம்படுத்த மேலும் பணி திட்டமிடப்பட்டுள்ளதாகவும் அவர் கூறினார். ஐஐடி மெட்ராஸ் மற்றும் SPARC எனும் ஆராய்ச்சி ஒத்துழைப்புத் திட்டத்தின் ஆதரவுடன் நடத்தப்பட்ட இந்த ஆய்வு, சிறுநீரக 'டிஜிட்டல் இரட்டையர்' உருவாக்குவதற்கான ஒரு படியாகவும் அமைகிறது. பெரிய நோயாளர் தரவுத்தொகுப்புகளைப் பயன்படுத்தி மாடல்களை சரிபார்க்கவும், அணியக்கூடிய உணர்விகளுடன் இணைத்து தனிநபர் சிறுநீரக ஆரோக்கிய கண்காணிப்பை ஆராயவும் ஆராய்ச்சியாளர்கள் திட்டமிட்டுள்ளனர்.