விண்வெளிக்கு ஒரு கிலோ அனுப்ப அதிகம் செலவிடும் நாடு இந்தியா — ஆய்வு

ஒரு கிலோ எடையை விண்வெளிச் சுற்றுப்பாதைக்கு அனுப்ப, முக்கிய விண்வெளி நாடுகள் அனைத்திலும் இந்தியாவே அதிகம் செலவிடுகிறது என்று புதிய ஆய்வு தெரிவிக்கிறது. அறுபது ஆண்டுகளுக்கும் மேலான ராக்கெட் ஏவுதல்களை ஆராய்ந்த இந்த மதிப்பாய்வு ஆய்வு, 'எகனாமிக்ஸ் லெட்டர்ஸ்' (Economics Letters) இதழில் வெளியாகியுள்ளது. மலிவான ஏவுதல் நாடு என்ற இந்தியாவின் பொதுப் பிம்பத்துக்கு இது நேர்மாறான முடிவு.

கேம்பிரிட்ஜ் பல்கலைக்கழகத்தின் அலெசியோ டெர்சி, டூரின் பாலிடெக்னிக்கின் (Politecnico di Torino) பிரான்செஸ்கோ நிக்கோலி ஆகியோர் இந்த ஆய்வை நடத்தினர். புவிக்கு மிக அருகிலான, பெரும்பாலான செயற்கைக்கோள்கள் இயங்கும் தாழ் சுற்றுப்பாதைக்கு 2025-ல் இந்திய ராக்கெட்டுகள் மூலம் ஒரு கிலோ அனுப்ப 13,302 டாலர் செலவானதாக அவர்கள் மதிப்பிடுகின்றனர். ஐரோப்பாவுக்கு 9,897 டாலர்; ரஷ்யாவுக்கு 6,682 டாலர்; சீனாவுக்கு 5,809 டாலர்; ஜப்பானுக்கு 5,287 டாலர்; அமெரிக்காவுக்கு 3,225 டாலர். உலக சராசரி 3,868 டாலர் — இந்தியச் செலவில் கிட்டத்தட்ட கால் பங்கு.

இதற்குக் காரணம், இஸ்ரோ (ISRO) பெரும்பாலும் சிறிய ராக்கெட்டுகளையே பயன்படுத்துவதுதான் என்று ஆய்வாளர்கள் கூறுகின்றனர். எவ்வளவு சுமை ஏற்றினாலும், ராக்கெட்டைத் தயார் செய்து ஏவுவதற்கான நிலையான செலவு பெரிதாக மாறாது. சிறிய ராக்கெட்டில் இந்தச் செலவு குறைந்த அளவு பேலோடு (payload) மீதே பகிரப்படுகிறது. பெரிய ராக்கெட் அதே செலவை பல டன் சுமையில் பங்கிட்டுக்கொள்ளும்; சிறிய ராக்கெட்டால் அது முடியாது. அதனால் சுற்றுப்பாதைக்குச் செல்லும் ஒவ்வொரு கிலோவுக்குமான விலை உயர்கிறது.

ஏவுதல்கள் பெருகப் பெருகச் செலவு படிப்படியாகக் குறையும் போக்கான 'அனுபவ வளைவையும்' (experience curve) ஆய்வு பரிசீலித்தது. 2010-க்குப் பிறகு அமெரிக்காவும் ஐரோப்பாவும் மட்டுமே புள்ளியியல் ரீதியாக உறுதியான அனுபவ வளைவைக் காட்டியுள்ளன. செலவைக் குறைக்கும் அளவுக்கு இந்தியா அடிக்கடி ஏவுதல்களை நடத்துவதில்லை என்று ஆய்வாளர்கள் எழுதுகின்றனர்.