கீட்டோ உணவால் கல்லீரல் கொழுப்பு 67% குறைவு: சோதனை முடிவு

பருமனுள்ளவர்களுக்கு, மத்திய தரைக்கடல் உணவுமுறையை விடவும், குறைந்த கொழுப்பு உணவுமுறையை விடவும். மிகக் குறைந்த கார்போஹைட்ரேட்டும் அதிக கொழுப்பும் கொண்ட உணவுமுறை சிறந்த வளர்சிதை மாற்ற நன்மைகளை அளிக்கக்கூடும் என ஆகஸ்ட் 27 அன்று செல் மெட்டபாலிசம் இதழில் வெளியான சமவாய்ப்புச் சோதனை ஒன்று தெரிவிக்கிறது. கீட்டோ அல்லது கீட்டோஜெனிக் டயட் (மிகக் குறைந்த கார்போஹைட்ரேட் உணவுமுறை) எனப்படும் இந்த உணவுமுறையில் நான்கைந்து மாதங்கள் இருந்த பிறகு. பருமனும் முன்-நீரிழிவும் (இரத்தச் சர்க்கரை இயல்பை விட அதிகமாக, ஆனால் நீரிழிவு எனும் அளவுக்கு இல்லாத நிலை) கொண்ட பங்கேற்பாளர்களில் பாதிப் பேருக்கு, இனி முன்-நீரிழிவு அளவுகோல்கள் பொருந்தவில்லை. அமெரிக்காவில் 40% வயது வந்தோர் பருமனுடன் இருப்பதாக மதிப்பிடப்பட்டுள்ளது.

“பருமனுள்ளவர்களிடம் எடை குறைப்பு வளர்சிதை மாற்ற ஆரோக்கியத்தை மேம்படுத்தும் என நமக்குத் தெரியும்” என்கிறார். மிசோரி மாநிலம் செயின்ட் லூயிஸில் உள்ள வாஷிங்டன் பல்கலைக்கழக மருத்துவப் பள்ளியைச் சேர்ந்த இச்சோதனையின் தலைமை ஆய்வாளர் சாமுவேல் க்ளைன். “கல்லீரலில் அதிக கொழுப்பும் முன்-நீரிழிவும் இருந்தால், கார்போஹைட்ரேட் உட்கொள்ளலைக் குறைப்பது வெறும் எடை குறைப்பைத் தாண்டி. வளர்சிதை மாற்றத்தில் முக்கிய சிகிச்சை பலன்களைத் தரக்கூடும் என எங்கள் தரவுகள் காட்டுகின்றன” என்றும் அவர் தெரிவித்தார்.

க்ளைனும் சக ஆய்வாளர்களும் பருமன், முன்-நீரிழிவு மற்றும் கல்லீரலில் கொழுப்பு படிதல் பாதிப்பு உள்ள 42 பேரை இச்சோதனையில் இணைத்தனர். இவர்கள் சமவாய்ப்பு முறையில் கீட்டோ, மத்திய தரைக்கடல், அல்லது தாவர சார்ந்த குறைந்த கொழுப்பு உணவுமுறை என மூன்று குழுக்களாகப் பிரிக்கப்பட்டனர். ஆய்வுக் குழுவே அனைத்து உணவையும் வழங்கியது. பங்கேற்பாளர்கள் வாரந்தோறும் ஊட்டச்சத்து நிபுணரைச் சந்தித்தனர். கீட்டோ உணவில் 4% கலோரி கார்போஹைட்ரேட்டிலிருந்தும், 73% கொழுப்பிலிருந்தும் கிடைத்தது. மத்திய தரைக்கடல் உணவில் 50% கார்போஹைட்ரேட், 35% கொழுப்பு. தாவர சார்ந்த உணவில் 70% கார்போஹைட்ரேட், 15% கொழுப்பு என இருந்தது. ஒவ்வொரு குழுவும் சராசரியாக உடல் எடையில் 10% குறைக்கும் வகையில் கலோரி அளவு சரிசெய்யப்பட்டது. இதற்கு நான்கைந்து மாதங்கள் ஆனது.

ஆய்வு முடிவில், மூன்று குழுக்களிலும் உடல் கொழுப்பு கணிசமாகக் குறைந்தது. இன்சுலின் உணர்திறனும் மூன்று குழுக்களிலும் மேம்பட்டது. ஆனால் கல்லீரல் மற்றும் வளர்சிதை மாற்ற அளவீடுகளில் கீட்டோ குழுவே அதிக மாற்றத்தைக் காட்டியது. கீட்டோ குழுவில் கல்லீரல் கொழுப்பு சராசரியாக 67% குறைந்தது. மத்திய தரைக்கடல் மற்றும் தாவர சார்ந்த குழுக்கள் இரண்டிலும் இது சராசரியாக 45% ஆக இருந்தது. 24 மணி நேரம் இரத்தத்தை ஆய்வு செய்ததில், கீட்டோ குழுவினரே குளுக்ககானின் அதிகபட்ச அதிகரிப்பைக் காட்டினர். கல்லீரலில் சேமிக்கப்படும் கொழுப்பைக் குறைக்க உதவும் ஹார்மோன் இது. இதே குழுவினரிடமே இன்சுலின் அளவு அதிகபட்சமாகக் குறைந்தது. “அதிக கொழுப்பை உண்டிருந்தும் கீட்டோ குழுவினருக்கு இரத்தக் கொழுப்பு அல்லது கொலஸ்ட்ரால் அளவு அதிகரிக்காதது தான் மிக ஆச்சரியமான கண்டுபிடிப்பு” என, இச்சோதனையின் முதன்மை ஆசிரியரான மேக்ஸ் பீட்டர்சன் தெரிவித்தார்.

சோதனைக்குப் பின், கீட்டோ உணவுமுறையைப் பின்பற்றியவர்களில் சுமார் 50% பேருக்கு முன்-நீரிழிவு அளவுகோல்கள் இனி பொருந்தவில்லை. மத்திய தரைக்கடல் குழுவில் இது 29%, தாவர சார்ந்த குழுவில் 7% ஆக இருந்தது. இந்த ஆய்வுக்கு அமெரிக்க தேசிய சுகாதார நிறுவனங்களும் பார்ன்ஸ்-யூத் மருத்துவமனை அறக்கட்டளையும் நிதியுதவி அளித்தன.