மனித குலத்தின் பரிணாம மரம்: மறுவகைப்பாடு வேண்டும் என மோனாஷ் ஆய்வு

ஆஸ்திரலோபிதிக்கஸ், பாரான்த்ரோபஸ் போன்ற தொல்லுயிர் மனித இனங்களை, மனிதர்கள் சேர்ந்த ஹோமோ பேரினத்திலேயே சேர்க்க வேண்டும் என மோனாஷ் பல்கலைக்கழகத்தின் புதிய ஆய்வு பரிந்துரைக்கிறது. இது மனிதப் பரிணாம வகைப்பாட்டில் பெரும் மாற்றத்தை முன்மொழிகிறது. பேரினம் என்பது நெருங்கிய தொடர்புடைய இனங்களின் தொகுப்பு.

அமெரிக்கன் ஜர்னல் ஆஃப் பயாலஜிக்கல் ஆந்த்ரோபாலஜி இதழில் இந்த ஆய்வு வெளியானது. சமீபத்திய தொல்லுயிர் கண்டுபிடிப்புகளும் பரிணாம, மரபணு பகுப்பாய்வு முன்னேற்றங்களும், ஹோமோவையும் அதன் நெருங்கிய தொல்லுயிர் உறவினர்களையும் பிரிக்கும் எல்லைகளை மங்கலாக்குவதாக ஆய்வு கூறுகிறது. இவை அனைத்தும் கடந்த 4 முதல் 5 மில்லியன் ஆண்டுகளுக்குள் வாழ்ந்தவை.

கடந்த 50 ஆண்டுகளில் பரிணாம உயிரியல் ஒரு புதிய அணுகுமுறையை நோக்கிச் சென்றுள்ளது. உடல் ஒற்றுமைகளை மட்டும் பார்ப்பதற்குப் பதிலாக, பொது மூதாதையர் தொகுதிகளான 'க்ளேட்' அடிப்படையில் உயிரினங்களை வகைப்படுத்துகிறார்கள். ஆனால் மனிதப் பரிணாம வகைப்பாடு இந்த மாற்றத்தை இன்னும் முழுமையாகப் பின்பற்றவில்லை என ஆய்வு தெரிவிக்கிறது.

மோனாஷ் உயிரியக்க கண்டுபிடிப்பு நிறுவனத்தின் ஆய்வாளர் டாக்டர் இயன் டவுல், ஹோமோ, ஆஸ்திரலோபிதிக்கஸ், பாரான்த்ரோபஸ் ஆகியவை 'தனித்தனி பரிணாம கிளைகளாக இருக்கத் தேவையில்லை' எனக் கூறினார். இவற்றைப் பிரிக்கப் பயன்படுத்திய நடத்தை மற்றும் சூழலியல் வேறுபாடுகளும் இப்போது நிலைநிறுத்த கடினமாகி வருவதாக அவர் தெரிவித்தார்.

பெரிய மூளை, நுட்பமான கருவி பயன்பாடு போன்ற பண்புகள் மூலம் ஹோமோ பாரம்பரியமாக அடையாளம் காணப்பட்டது. ஆனால் ஹோமோவில் சிலவற்றுக்கு மிகச் சிறிய மூளை இருந்ததாகவும், சிக்கலான நடத்தைகள் பாரான்த்ரோபஸ் மற்றும் ஆஸ்திரலோபிதிக்கஸ் இனங்களிலும் காணப்பட்டதாகவும் டவுல் சுட்டிக்காட்டினார். 'நம் மூதாதையரையும் நெருங்கிய தொல்லுயிர் உறவினர்களையும் பற்றி அறிய அறிய, நம் குடும்ப மரம் எவ்வளவு சிக்கலானது, நேர்கோட்டில் இல்லாதது என்பது புரிகிறது' என்று அவர் கூறினார்.