காம்சட்கா நிலநடுக்கம் ஏற்படும் இடத்தை முன்னரே சுட்டிக்காட்டிய புதிய முறை

பூமியின் மிகப்பெரிய நிலநடுக்கங்கள் எப்போது நிகழும் என்று அல்ல, எங்கு நிகழும் என்பதைக் கண்டறியும் முறையை யுசி ரிவர்சைட் ஆய்வாளர்கள் உருவாக்கியுள்ளனர். இதை உருவாக்கியவர்கள் புவி இயற்பியலாளர்கள் காரெத் ஃபன்னிங், ஆக்ஸெல் பெரியோலட். ஒரு டெக்டானிக் தட்டு மற்றொன்றின் அடியில் நுழையும் சப்டக்‌ஷன் மண்டலங்களில் இவர்களது அணுகுமுறை கவனம் செலுத்துகிறது. இத்தகைய மண்டலங்களே 8.5 அளவைத் தாண்டும் பூமியின் மிகப்பெரிய நிலநடுக்கங்களை உருவாக்கி, பெரும்பாலும் சுனாமிகளையும் தூண்டுகின்றன. மேற்பரப்பின் நுட்பமான அசைவுகளை அளக்கும் ஜிபிஎஸ் தரவுகளைப் பயன்படுத்தி, குழு ஒரு வழிமுறையை உருவாக்கியது. இது “அஸ்பெரிட்டீஸ்” எனப்படும் பூட்டப்பட்ட பிளவுப் பகுதிகளைக் கண்டறிகிறது. இப்பகுதிகள் அசைவை எதிர்த்து, போதிய அழுத்தம் குவியும் வரை ஆற்றலைச் சேமிக்கின்றன.

ஜியோஃபிசிகல் ரிசர்ச் லெட்டர்ஸ் இதழில் வெளியான ஒரு சோதனையில் இது உறுதியானது. கிழக்கு ரஷ்யாவின் காம்சட்கா சப்டக்‌ஷன் மண்டலத்தில் பின்னர் 8.8 அளவிலான நிலநடுக்கம் ஏற்பட்டது. அதே பகுதியையே தங்கள் மாதிரி முன்னரே சுட்டிக்காட்டியிருந்ததை ஆய்வாளர்கள் கண்டறிந்தனர். “நிலநடுக்கங்கள் நடக்கும்போது தலைப்புச் செய்திகளாகின்றன. ஆனால் அதற்கு பல ஆண்டுகளுக்கு முன்பே பிளவு அமைதியாக அழுத்தத்தைக் குவித்துக்கொண்டிருக்கும். இந்த அழுத்தத்தை அளக்க முடியும்” என்று ஃபன்னிங் கூறினார். “ஒப்பீட்டளவில் குறைந்த தரவுத் தொகுப்பின் அடிப்படையில், அழுத்தம் எங்கு குவிகிறது என்று எங்களுக்கு ஒரு யோசனை இருந்தது. இது இவ்வளவு சிறப்பாக செயல்பட்டது, இந்த அணுகுமுறைக்கு உண்மையான வாய்ப்பு உள்ளது என்பதை உறுதிப்படுத்தியது” என்று பெரியோலட் மேலும் கூறினார்.

இந்த முறையால் நிலநடுக்கத்தின் நேரத்தையோ, அது தூண்டும் சுனாமியின் அளவையோ கணிக்க முடியாது. 1952-இல் ஏற்பட்ட 9.0 அளவிலான நிலநடுக்கத்தை விட, 2025-இல் காம்சட்காவில் ஏற்பட்ட நிலநடுக்கம் மிகச் சிறிய சுனாமியை உருவாக்கியது. பிளவின் ஆழமற்ற பகுதி இம்முறை குறைவாகவே நகர்ந்திருக்கலாம் என்பதை இது காட்டுகிறது. ஃபன்னிங், பெரியோலட் இருவரும் இப்போது ஜப்பான், மெக்சிகோ, நியூசிலாந்து, அமெரிக்காவின் பசிபிக் வடமேற்குப் பகுதி ஆகிய சப்டக்‌ஷன் மண்டலங்களுக்கும் இதே அணுகுமுறையைப் பயன்படுத்துகின்றனர். கலிபோர்னியாவின் ஹேவர்ட் பிளவையும் அவர்கள் ஆராய்கின்றனர். சப்டக்‌ஷன் மண்டலங்களைப் போலவே, இந்தப் பிளவிலும் ஊர்ந்து நகரும், பூட்டப்பட்ட பகுதிகள் இரண்டும் உள்ளன.

இம்முறையை மேலும் விரிவாகப் பயன்படுத்த சிறந்த தரவு தேவை. நிலப்பரப்பில் உள்ள ஜிபிஎஸ் நிலையங்களை விட, கடலுக்கடியில் அளவீடுகள் மிகக் குறைவு. உலகின் மிகவும் ஆபத்தான பிளவுகள் பல அமைந்திருப்பது கடலுக்கடியிலேயே. ஆண்டுகணக்கில் மெதுவான உருமாற்றத்தை அளக்க கடல் தளத்தில் ஒலியியல் கருவிகளை ஜப்பானிய ஆய்வாளர்கள் ஏற்கெனவே பயன்படுத்தத் தொடங்கியுள்ளனர். சிலியிலும் பசிபிக் வடமேற்குப் பகுதியிலும் இதேபோன்ற முயற்சிகள் முன்மொழியப்பட்டுள்ளன.