உஸ்பெகிஸ்தான் 80,000 ஆண்டு பழமையான அம்பு முனைகள்: ஐரோப்பா வந்த பாதை மாறுமா?

உஸ்பெகிஸ்தானில் உள்ள ஒபி-ரக்மத் பாறை அடைக்கலத்தின் மிகப் பழமையான குடியிருப்பு அடுக்குகளில் சிறிய முக்கோண எறிகணை முனைகளை ஆய்வாளர்கள் கண்டறிந்துள்ளனர். இவை சுமார் 80,000 ஆண்டுகள் பழமையானவை. இலக்குகளில் மோதியபோது ஏற்பட்ட தாக்க அடையாளங்களை ஆய்வுத் தரவுகளுடன் ஒப்பிட்டு, இவை எறிகணை முனைகள் என குழு உறுதிசெய்தது. இவர்களின் கண்டுபிடிப்பு பிளாஸ் ஒன் என்ற ஆய்விதழில் வெளியாகியுள்ளது.

இந்த முனைகள் 2 சென்டிமீட்டருக்கும் குறைவான அகலமும், சில கிராம் எடையும் கொண்டவை. கனமான ஈட்டித் தண்டுகளில் பொருத்த முடியாத அளவு சிறியவையும் உடையக்கூடியவையும் ஆகும். குறைந்த இழுவைத் திறன் கொண்ட வில்லுகளுக்கான அம்பு தண்டுகளின் அகலத்தை இவை ஒத்திருக்கின்றன. சுமார் 25,000 ஆண்டுகளுக்குப் பிறகு, பிரான்சின் ரோன் பள்ளத்தாக்கில் நியாண்டர்தால் பகுதிக்குள் நுழைந்த ஹோமோ சேபியன்ஸ் மனிதர்கள் உருவாக்கிய முனைகளை இவை நெருக்கமாக ஒத்திருக்கின்றன.

1962ல் கண்டுபிடிக்கப்பட்ட ஒபி-ரக்மத் தளத்தை, அண்மையில் ஆண்ட்ரி க்ரிவோஷப்கின் தலைமையில் அகழாய்வு செய்தனர். இது தியன் ஷான் மலைத்தொடரில் 1,250 மீட்டர் உயரத்தில் அமைந்துள்ளது. முனைகள், பெரிய கற்கருவிகள், சிறிய கற்கருவிகள் என சுமார் 80,000 முதல் 40,000 ஆண்டுகள் வரையிலான கற்கருவித் தொகுப்பு இங்கு உள்ளது. சுமார் 70,000 ஆண்டுகள் பழமையான அடுக்கில் கிடைத்த ஒரு குழந்தையின் மண்டை ஓட்டு எச்சங்களில், நியாண்டர்தால் மற்றும் நவீன மனித பண்புகள் இரண்டும் கலந்திருந்தன. இது கலப்பினத்தால் ஏற்பட்டிருக்கலாம் என ஆய்வாளர்கள் கருதுகின்றனர்.

தொல்பொருள் ஆய்வாளர் லுடோவிக் ஸ்லிமாக் 2023ல் ஒரு கருதுகோளை முன்வைத்தார். மத்திய ஆசியாவே மனித இனத்தின் ஆரம்பகால விரிவாக்கத்தின் முக்கிய பாதை என்பது அதன் சாரம். மேற்கு ஐரோப்பாவில் 19ம் நூற்றாண்டில் முதலில் உருவாக்கப்பட்ட புலப்பெயர்வு மாதிரிகளுக்கு இது மாற்றாக அமைகிறது. இந்தக் கண்டுபிடிப்பு அந்தக் கருதுகோளுக்கு வலு சேர்க்கிறது. ஆஸ்திரேலியாவில் ஹோமோ சேபியன்ஸின் பழமையான சான்று சுமார் 65,000 ஆண்டுகள் பழமையானது. இது ஐரோப்பாவின் மிகப் பழமையான சான்றை விட 10,000 ஆண்டுகள் பழையது.