பரவலாக பயன்படும் எலும்பு தேய்மான மருந்துகள்: அல்சைமர் அபாயம் குறையுமா?

எலும்பு புரை நோய்க்கு பொதுவாக பரிந்துரைக்கப்படும் மருந்துகள் நைட்ரஜன் கொண்ட பிஸ்பாஸ்போனேட் (NBP) ஆகும். இவை, அல்சைமர் நோய் மற்றும் தொடர்புடைய மறதி நோய்களுடன் (ADRD) குறைந்த அபாயத்துடன் தொடர்புடையவை. 1,20,000-க்கும் அதிகமான முதியோர் மீதான ஆய்வில் ஹாங்காங் பல்கலைக்கழக ஆய்வாளர்கள் இதை தெரிவித்துள்ளனர். அலெண்ட்ரோனேட், சோலெட்ரோனேட் போன்ற NBP மருந்துகள், எலும்பு புரை நோய் உள்ளவர்களின் எலும்புகளை பலப்படுத்தி, முறிவுகளைக் குறைக்க ஏற்கெனவே பயன்படுத்தப்படுகின்றன.

2005 முதல் 2020 வரை ஹாங்காங்கில் எலும்பு புரை நோய் அல்லது எலும்பு உடையக்கூடிய முறிவுகள் கொண்ட 60 வயதுக்கு மேற்பட்டோர் 1,20,000-க்கும் அதிகமானோர். இவர்களின் மருத்துவப் பதிவுகளை ஆய்வாளர்கள் பகுப்பாய்வு செய்தனர். NBP மருந்துகளை பயன்படுத்தியவர்கள், மற்ற எலும்பு புரை மருந்துகளை பெற்றவர்கள், மற்றும் சிகிச்சை பெறாதவர்கள் ஆகிய மூன்று குழுக்களிடையே மறதி நோய் அபாயத்தை ஒப்பிட்டனர். சிகிச்சை பெறாதவர்களைவிட, NBP பயன்படுத்தியவர்களுக்கு அல்சைமர் மற்றும் தொடர்புடைய மறதி நோய்கள் ஏற்படும் அபாயம் 16% குறைவாக இருந்தது. மற்ற எலும்பு புரை மருந்துகளை பெற்றவர்களை விட இந்த அபாயம் 24% குறைவாக இருந்தது. பெண்களிலும் இடுப்பு எலும்பு முறிவு உள்ளவர்களிலும் இந்த தொடர்பு குறிப்பாக வலுவாக இருந்தது.

முதியோரிடையே எலும்பு புரை நோயும் மறதி நோயும் பெரும்பாலும் ஒன்றுடன் ஒன்று இணைந்து காணப்படுகின்றன. வயது அதிகரிப்பு, பெண் பாலினம், உடல் செயல்பாடு குறைவு போன்ற பொதுவான அபாயக் காரணிகளையும் இரண்டும் பகிர்ந்து கொள்கின்றன. இதே ஆய்வுக் குழு முன்பே, எலும்பு புரை நோயும் எலும்பு முறிவுகளும் மறதி நோய்க்கான தனித்த அபாயக் காரணிகள் எனக் கண்டறிந்திருந்தது. ஹாங்காங் பல்கலைக்கழக மருத்துவப் பீடத்தின் (HKUMed) மருந்தியல் மற்றும் மருந்தகவியல் துறை பேராசிரியர் சியூங் சிங்-லுங் இது குறித்து பேசினார். 'NBP மருந்துகள் எலும்புகளை பலப்படுத்தி முறிவு அபாயத்தை குறைப்பதுடன், அல்சைமர் மற்றும் தொடர்புடைய மறதி நோய்களை தடுக்கக்கூடும் என்ற இரு பயன்களையும் அளிக்கக்கூடும் என எங்கள் ஆய்வு ஆதாரம் தருகிறது' என அவர் தெரிவித்தார்.

ஆய்வாளர்களின் மதிப்பீட்டின்படி, 48 நோயாளிகளுக்கு ஐந்து ஆண்டுகள் NBP மருந்துகளை கொடுத்தால், ஒரு மறதி நோய் நிகழ்வைத் தடுக்க முடியும். புதிய நோய்-மாற்று அல்சைமர் சிகிச்சைகள் தோன்றி வருகின்றன. ஆனாலும் அவற்றின் விலை, அணுகல் தொடர்பான கவலைகள் உள்ளன. இது ஏற்கெனவே பரவலாகக் கிடைக்கும் NBP போன்ற மருந்துகளை மறு பயன்பாட்டுக்குக் கொண்டு வருவதில் ஆர்வத்தை அதிகரித்துள்ளதாக ஆய்வாளர்கள் கூறுகின்றனர்.

உலகளவில் தற்போது 55 மில்லியன் பேர் மறதி நோயுடன் வாழ்கின்றனர். 2050-ஆம் ஆண்டில் இது 139 மில்லியனாக அதிகரிக்கும் என உலக சுகாதார நிறுவனம் (WHO) மதிப்பிட்டுள்ளது. மறதி நோயை முதன்மையான சுகாதார முன்னுரிமையாக WHO அறிவித்துள்ளது. இந்த ஆய்வு அல்சைமர்ஸ் & டிமென்ஷியா இதழில் வெளியானது.