அல்சைமர் பிளேக் தோன்றும் ஏழு ஆண்டுகளுக்கு முன்பே மூளையில் மாற்றம்: புதிய ஆய்வு

அல்சைமர் நோய்க்குறியீட்டுடன் தொடர்புடைய மாற்றங்களை, விஞ்ஞானிகள் முன்பு நம்பியதை விட ஏழு ஆண்டுகளுக்கும் மேலாக முன்னதாகவே மூளைப் படங்கள் காட்டக்கூடும் என புதிய ஆய்வு ஒன்று தெரிவிக்கிறது. ஓஸ்லோ பல்கலைக்கழகத்தின் உளவியல் துறை விஞ்ஞானிகள் இந்த ஆய்வை மேற்கொண்டனர். இது நேச்சர் நியூரோசயின்ஸ் இதழில் வெளியிடப்பட்டது. அமிலாய்டு-பெட் எனப்படும் மூளை ஸ்கேன், அல்சைமர் ஆரம்பநிலைப் படமெடுப்புக்கான தற்போதைய தரமான முறையாகும். இது அமிலாய்டு பிளேக் எனும் புரதம் குவிவதை கண்டறியும். ஆனால் இந்த ஸ்கேன் நோயின் ஆரம்பகட்ட மூளை மாற்றங்களைப் பிடிக்கும் அளவுக்கு உணர்திறன் கொண்டதாக இல்லாமல் இருக்கலாம் என ஆய்வு தெரிவிக்கிறது.

இந்த மாற்றங்களைக் கண்டறிய, ஆரோக்கியமான நபர்களை ஆராய்ச்சியாளர்கள் கிட்டத்தட்ட 20 ஆண்டுகள் தொடர்ந்து எம்ஆர்ஐ மூளை ஸ்கேன் மூலம் கண்காணித்தனர். இந்த நீண்டகால தரவு, பிளேக் எப்போது முதலில் கண்டறியத்தக்கதானது என்பதையும், எந்த பங்கேற்பாளர்களுக்கு அது உருவானது என்பதையும் அறிய குழுவுக்கு உதவியது. பின்னர் பிளேக் உருவானவர்களுக்கும் இல்லாதவர்களுக்கும் இடையேயான மூளை அமைப்பு மாற்றங்களை அவர்கள் ஒப்பிட்டனர். "பெட் ஸ்கேன்களில் அதிக அளவு பிளேக் தெரிவதற்கு பல ஆண்டுகளுக்கு முன்பே மூளையில் அமைப்பு மாற்றங்கள் ஏற்படுவதை நாங்கள் கண்டறிந்தோம்" என்று ஜேம்ஸ் மைக்கேல் ரோ தெரிவித்தார். அவர் ஆய்வு நடந்த காலத்தில் ஓஸ்லோ பல்கலைக்கழகத்தின் மூளை, அறிவாற்றல் வாழ்நாள் மாற்ற மையத்தில் பணியாற்றிய முதுகலை ஆராய்ச்சியாளர் ஆவார்.

"பிளேக் குவிதலின் முதல் அறிகுறிகளுக்கு பல ஆண்டுகளுக்கு முன்பே மூளையில் அமைப்பு மாற்றங்களைக் கண்டதே இந்த ஆய்வின் மிகவும் முக்கியமான அம்சம்" என்று ஆண்டர்ஸ் மார்ட்டின் ஃபியெல் தெரிவித்தார். இவர் உளவியல் துறைப் பேராசிரியரும், மூளை, அறிவாற்றல் வாழ்நாள் மாற்ற மையத்தின் தலைவருமாவார். இதற்கு இரண்டு விளக்கங்கள் இருக்கலாம் என ஃபியெல் தெரிவித்தார். பிளேக் குவிதலுக்கு உதவும் அல்லது அதனால் விளையும் தீங்கு விளைவிக்கும் செயல்முறைகள், ஸ்கேனில் பிளேக் கண்டறியப்படும் முன்பே மூளையில் செயல்பட்டிருக்கலாம். அல்லது, அமிலாய்டு பிளேக் குவியத் தொடங்குவதற்கு முன்பே வேறு உயிரியல் செயல்முறைகள் மூளை மாற்றங்களை ஏற்படுத்தியிருக்கலாம்.

இரண்டாவது சாத்தியக்கூறு, எதிர்கால அல்சைமர் சிகிச்சைகளுக்கு முக்கியமானதாக இருக்கலாம் என ஃபியெல் தெரிவித்தார். அமிலாய்டு பிளேக் குவிதலிலிருந்து தனித்த வழிமுறைகள் மூலம் மூளை மாற்றங்கள் தொடங்கினால், வேறு உயிரியல் செயல்முறைகளை இலக்காகக் கொண்ட மருந்துகளை ஆராய்ச்சியாளர்கள் தொடர்ந்து உருவாக்க வேண்டியிருக்கும். "இது குறித்து மேலும் ஆராய்ச்சி தேவை" என்று அவர் கூறினார்.