இளைஞர்களின் தற்கொலை அதிகரிப்புக்கும் சோடியம் நைட்ரைட்டுக்கும் தொடர்பு: இங்கிலாந்து ஆய்வு

BMJ பப்ளிக் ஹெல்த் என்ற திறந்த அணுகல் இதழில் வெளியான சமீபத்திய ஆய்வு, பொதுவாக உணவு பாதுகாக்க பயன்படுத்தப்படும் சோடியம் நைட்ரைட் மற்றும் இங்கிலாந்தில் தற்கொலை எண்ணிக்கையின் அதிகரிப்பு ஆகியவற்றுக்கு இடையே கவலைக்கிடமான தொடர்பை கண்டறிந்துள்ளது. இளைய தலைமுறையினர், குறிப்பாக ஆண்கள் அதிகமாக பாதிக்கப்பட்டுள்ளனர் என ஆய்வு வெளிப்படுத்துகிறது.

2019 முதல் 2024 வரையிலான வழக்குகளை இந்த ஆய்வு பின்நோக்கி ஆராய்ந்தது. இறப்புக்குப் பிந்தைய நைட்ரைட், நைட்ரேட் பரிசோதனைகளை நடத்தும் இங்கிலாந்தின் முதன்மை ஆய்வகத்தின் தரவுகள் இதற்குப் பயன்படுத்தப்பட்டன. வழக்குகளில் 71% இளைய தலைமுறையினர்; அவர்களில் பெரும்பாலோர் ஆண்கள். 87% வழக்குகளில், ரத்தத்தில் நைட்ரைட், நைட்ரேட் அளவு சாதாரண அளவை விட 100 மடங்கு அதிகமாக இருந்தது. வேண்டுமென்றே உட்கொண்டதற்கான அறிகுறி இது.

ஆய்வாளர்கள், பரிசோதனை மற்றும் அறிக்கையிடும் வரம்புகளால் மரணங்களின் உண்மையான எண்ணிக்கை அதிகமாக இருக்கக்கூடும் என எச்சரிக்கின்றனர். சோடியம் நைட்ரைட் பற்றிய தீங்கான தகவல்கள் இணையத்தில் பரவுவதையும் அவர்கள் சுட்டிக்காட்டுகின்றனர். இணையப் பழக்கம் மிக்க இளைஞர்களுக்கு இத்தகைய தகவல்கள் எளிதில் கிடைத்துவிடுகின்றன.

சோடியம் நைட்ரைட் எளிதில் கிடைப்பதைக் கட்டுப்படுத்தவும், தீங்கான இணையத் தகவல்களின் பரவலைத் தடுக்கவும் உடனடி நடவடிக்கை தேவை என ஆய்வு வலியுறுத்துகிறது. அவசர சேவைகள் சோடியம் நைட்ரைட் விஷத்தன்மையை குறைக்க விஷ முறிவு மருந்துகளை கொண்டு செல்லலாம் என ஆய்வாளர்கள் பரிந்துரைக்கின்றனர். முதன்மை ஆய்வாளர் பேராசிரியர் அம்ரிதா அக்லுவாலியா, இந்த பொது சுகாதார பிரச்சினையை தீர்க்க உடனடி நடவடிக்கைகள் தேவை என வலியுறுத்துகிறார்.