பாலூட்டிகளில் இதுவரை காணப்படாத இரட்டை ஆன்டிபாடி மரபணு அமைப்பு: வெஸ்பர் வௌவால்களில் கண்டுபிடிப்பு

மற்ற விலங்குகளுக்கு கடுமையான நோயை ஏற்படுத்தக்கூடிய வைரஸ்களை வௌவால்கள் எவ்வாறு தாங்கிக்கொண்டு, தாங்களே அரிதாகவே கடுமையாக நோய்வாய்ப்படுகின்றன என்பது விஞ்ஞானிகளுக்கு நீண்டகாலமாக ஒரு புதிராக இருந்து வருகிறது. துலேன் பல்கலைக்கழக ஆராய்ச்சியாளர்கள், ஸ்டான்ஃபோர்ட் பல்கலைக்கழகம் மற்றும் நோய் கட்டுப்பாடு மற்றும் தடுப்பு மையங்களின் (CDC) இணை ஆராய்ச்சியாளர்களுடன் இணைந்து, இதற்கான பதிலின் ஒரு பகுதியைக் கண்டறிந்திருக்கக்கூடும். சயின்ஸ் அட்வான்சஸ் இதழில் வெளியான ஆய்வு ஒரு புதிய கண்டுபிடிப்பைக் காட்டியது. உலகின் மிகப்பெரிய வௌவால் குடும்பமான வெஸ்பர் வௌவால்கள், நோயெதிர்ப்பு அமைப்பு தொற்றுகளை கண்டறிந்து எதிர்த்துப் போராட உதவும் புரதங்களான ஆன்டிபாடிகளை உற்பத்தி செய்யும் மரபணுக்களின் இரண்டு தனித்த நகல்களைக் கொண்டுள்ளன. இதுவரை அறியப்பட்ட மற்ற எந்த பாலூட்டியும் ஒரே ஒரு அத்தகைய மரபணுத் தொகுப்பை மட்டுமே கொண்டுள்ளது.

அண்டார்டிகா தவிர ஒவ்வொரு கண்டத்திலும் காணப்படும் 500-க்கும் மேற்பட்ட இனங்களைக் கொண்ட குழுவாகும் வெஸ்பர் வௌவால்கள். ஆன்டிபாடிகள் இரண்டு பாரிய புரதச் சங்கிலிகள் மற்றும் இரண்டு இலேசான புரதச் சங்கிலிகளால் ஆன Y-வடிவ புரதங்கள். மனிதர்கள் மற்றும் அறியப்பட்ட மற்ற அனைத்து பாலூட்டிகளிலும், பாரிய சங்கிலிகள் ஒரே ஒரு மரபணுத் தொகுப்பைப் பயன்படுத்தி உற்பத்தி செய்யப்படுகின்றன. ஆனால் வெஸ்பர் வௌவால்களுக்கு இரண்டு தனித்த பாரிய-சங்கிலி மரபணு அமைப்புகள் உள்ளதாக ஆராய்ச்சியாளர்கள் கண்டறிந்தனர். இது பரந்த வகையான ஆன்டிபாடிகளை உருவாக்க அவற்றுக்கு மற்றொரு வழியை அளிக்கக்கூடும்.

'ஒரு பாலூட்டியில் இதுபோன்றதை நாங்கள் ஒருபோதும் பார்த்ததில்லை' என துலேன் பல்கலைக்கழகத்தின் சூழலியல் மற்றும் பரிணாமவியல் உதவிப் பேராசிரியரும் ஆய்வின் தொடர்பு ஆசிரியருமான ஹன்னா ஃபிராங்க் தெரிவித்தார். 'பாலூட்டி நோயெதிர்ப்பு அமைப்புகள் எவ்வாறு அமைக்கப்படலாம் என்பது குறித்த நமது புரிதலை இது முற்றிலும் மாற்றுகிறது. வௌவால்கள் ஏன் இவ்வளவு பரிணாம வெற்றியடைந்துள்ளன, வைரஸ்களுக்கு அவை எவ்வாறு பதிலளிக்கின்றன என்பது குறித்த புதிய கேள்விகளையும் இது எழுப்புகிறது' என அவர் மேலும் தெரிவித்தார். வௌவால் நோயெதிர்ப்புத் திறனை ஆராயும் ஆராய்ச்சியாளர்கள் பாரம்பரியமாக உள்ளார்ந்த நோயெதிர்ப்பு அமைப்பில் அதிக கவனம் செலுத்தி வந்துள்ளனர். ஆன்டிபாடி உற்பத்தி செய்யும் தகவமைப்பு நோயெதிர்ப்பு அமைப்பும் நெருக்கமான ஆய்வுக்கு தகுதியானது என இந்தப் புதிய கண்டுபிடிப்புகள் காட்டுவதாக ஃபிராங்க் தெரிவித்தார்.

வௌவால்கள் மகரந்தச் சேர்க்கையாளர்கள், விதை பரப்புநர்கள், இயற்கை பூச்சிக் கட்டுப்படுத்திகள் என முக்கிய சூழலியல் பங்குகளை வகிப்பதுடன், பல வைரஸ்களுக்கான இயற்கை புரவலன்களாகவும் உள்ளன. வௌவால்கள் ஏன் இவ்வளவு திறமையான வைரஸ் களஞ்சியங்களாக உள்ளன என்பதை இந்தக் கண்டுபிடிப்பு முழுமையாக விளக்கவில்லை என ஃபிராங்க் தெரிவித்தார். ஆனாலும் முன்பு அறியப்படாத ஒரு அளவிலான நோயெதிர்ப்பு பன்முகத்தன்மையை இது வெளிப்படுத்துகிறது. மற்ற உயிரினங்களின் நோயெதிர்ப்பு பதில்களை விஞ்ஞானிகள் நன்கு புரிந்துகொள்ள உதவக்கூடிய, நோய் பரவல் அபாயத்தைக் குறைக்கும் உத்திகள் உள்பட புதிய ஆராய்ச்சி திசையையும் இது திறக்கிறது.