தற்போதைய எல் நினோ “மிக வலுவானதாக” மாறலாம், 2027 வரை நீடிக்கலாம்: WMO எச்சரிக்கை

பசிபிக் பெருங்கடலின் அசாதாரண வெப்ப நிலையால் உந்தப்படும் தற்போதைய எல் நினோ, வரும் மாதங்களில் “மிக வலுவான” நிலைக்கு தீவிரமடையலாம் என்று உலக வானிலை அமைப்பு (WMO) எச்சரித்துள்ளது. இது 2027 தொடக்கம் வரை நீடிக்கலாம். பசிபிக் பெருங்கடலின் நடு, கிழக்கு பூமத்திய ரேகைப் பகுதிகளில் கடல் மேற்பரப்பு வெப்பநிலை அசாதாரணமாக உயரும் இயற்கை காலநிலை அமைப்பே எல் நினோ ஆகும். வர்த்தகக் காற்றுகள் பலவீனமடைவது உள்ளிட்ட கடல்-வளிமண்டல தொடர்பு மாற்றங்களால் இது உருவாகிறது. பொதுவாக இரண்டு முதல் ஏழு ஆண்டுகளுக்கு ஒருமுறை இது ஏற்படும். உலகளாவிய காற்று அமைப்புகள், வளிமண்டல அழுத்தம், மழைவீழ்ச்சி பரவலை இது பாதிக்கிறது. தற்போதைய நிகழ்வு WMO-வின் மிக உயர் வகையான “மிக வலுவான” நிலையை எட்டும் என எதிர்பார்க்கப்படுவதாக WMO தெரிவித்துள்ளது. பசிபிக் வெப்பநிலை இயல்பை விட 2°C-க்கும் அதிகமாக இருக்கும் என WMO மதிப்பிடுகிறது.

வலுவான எல் நினோ உலகளாவிய காலநிலை அமைப்புகளை சீர்குலைக்கலாம் என்று WMO தெரிவித்துள்ளது. வறட்சி, வெள்ளம், புயல், டைபூன் ஏற்படும் வாய்ப்பையும் இது அதிகரிக்கலாம். இதனுடன் தொடர்புடைய மழைவீழ்ச்சி மாறுபாடு, விவசாயம், உணவுப் பாதுகாப்பு, நீர் கிடைப்பு, எரிசக்தி அமைப்புகளையும் பாதிக்கக்கூடும். எல் நினோவின்போது கடலால் உறிஞ்சப்படும் வெப்பம், படிப்படியாக வளிமண்டலத்தில் வெளியேறி, அடுத்த ஆண்டு உலகளாவிய வெப்பநிலை உயர்வுக்கு பங்களிக்கும். 2023-24-இன் வலுவான எல் நினோ, 2024-ஐ பதிவு செய்யப்பட்ட மிக வெப்பமான ஆண்டாக ஆக்கியதற்கு பங்களித்தது. இந்த நிகழ்விலும் புதிய வெப்பநிலை சாதனைகள் ஏற்படலாம் என WMO எச்சரித்துள்ளது.

இந்திய தென்மேற்கு பருவமழையையும் எல் நினோ பாதிக்கலாம் என WMO குறிப்பிட்டுள்ளது. வலுவான எல் நினோ நிகழ்வுகள் பெரும்பாலும் இயல்பை விட குறைந்த மழைவீழ்ச்சி வாய்ப்புடன் தொடர்புடையவை. ஆயினும் இந்த தாக்கம் ஆண்டுக்கு ஆண்டு மாறுபடும். இந்த மாறுபாடு விவசாய உற்பத்தி, பாசன வசதி, கிராமப்புற வாழ்வாதாரம், உணவுப் பொருள் விலைகளை பாதிக்கலாம். முன்கூட்டிய எச்சரிக்கை அமைப்புகள், காலநிலை முன்னறிவிப்பு, பேரிடர் தயார்நிலையை வலுப்படுத்த வேண்டும் என WMO கேட்டுக்கொண்டது. வறட்சியை தாங்கும் பயிர்களை ஊக்குவித்தல், நீர் மேலாண்மையை மேம்படுத்துதல், விவசாயம், சுகாதாரம், எரிசக்தி துறைகளுக்கு காலநிலை தகவல்களை பகிர்தல் ஆகியவை தொடர்புடைய அபாயங்களைக் குறைக்க உதவும் என WMO தெரிவித்தது.