தீக்கடல் நாய்களுக்கு பறவைக் காய்ச்சல் அபாயம்: அண்டார்டிக் அருகிலுள்ள ஆய்வு நிலையத்தை காலி செய்யும் ஆஸ்திரேலியா

தாஸ்மேனியாவுக்கும் அண்டார்டிக்காவுக்கும் இடையே பாதி தூரத்தில் அமைந்துள்ள தொலைதூர தீவே மக்குவாரி தீவு. அங்குள்ள ஆய்வு நிலையத்தில் பணிபுரியும் சுமார் இருபத்து நான்கு தொழில்நுட்ப ஊழியர்கள், விஞ்ஞானிகள், துணை பணியாளர்களை காலி செய்யப்போவதாக ஆஸ்திரேலியா தெரிவித்துள்ளது. தீவில் ஆயிரக்கணக்கில் உள்ள தீக்கடல் நாய்களிடையே எச்5என்1 பறவைக் காய்ச்சல் பரவலாம் என்ற கவலையே இதற்குக் காரணம். மக்குவாரி தீவில் இதுவரை இந்த வைரஸ் கண்டறியப்படவில்லை. ஆனாலும், செப்டம்பர் முதல் நவம்பர் வரையிலான இனப்பெருக்க காலத்தில் பல தீக்கடல் நாய்கள் இதனால் இறக்கும் என அதிகாரிகள் எதிர்பார்க்கின்றனர்.

மனிதர்களுக்கு எச்5 பறவைக் காய்ச்சல் அபாயம் குறைவு என அதிகாரிகள் கூறுகின்றனர். ஆனாலும், 'பாதிக்கப்பட்ட ஏராளமான விலங்குகளுக்கு அருகில் வாழ்வதால் ஏற்படும் உளவியல்-சமூக அபாயங்களை' புறக்கணிக்க முடியாது என ஆஸ்திரேலியாவின் காலநிலை மாற்றம் துறை துணைச் செயலாளர் சீன் சல்லிவன் தெரிவித்தார். வைரஸ் பரவலைத் தடுக்கவல்ல இந்த நடவடிக்கை. பணியாளர்களின் நலனையும் நிலையத்தின் பாதுகாப்பான இயக்கத்தையும் பேணவே இந்த வெளியேற்றம் நடத்தப்படுகிறது.

மக்குவாரி தீவின் 24 பணியாளர்களும், செப்டம்பர் அல்லது அக்டோபர் தொடக்கத்தில், பனிக்கப்பலான ஆர்எஸ்வி நுயினா மூலம் வெளியேற்றப்படுவார்கள் என ஆஸ்திரேலிய சூழல் அமைச்சகம் தெரிவித்தது. தீக்கடல் நாய்கள் எச்5என்1-க்கு மிக எளிதில் பாதிக்கப்படும் தன்மை கொண்டவை. ஆஸ்திரேலியாவின் மற்றொரு தொலைதூர பகுதியான ஹேர்ட், மெக்டொனால்ட் தீவுகளில், ஆயிரக்கணக்கான தீக்கடல் நாய் குட்டிகள் ஏற்கெனவே இந்த வைரஸால் இறந்துவிட்டதாக ஜூன் மாதம் அதிகாரிகள் தெரிவித்திருந்தனர். உலகெங்கும் கோழி, காட்டுப் பறவைகளுக்கு கடும் நோய், மரணத்தை ஏற்படுத்தும் இந்த எச்5 வைரஸ் வகையிலிருந்து, ஆஸ்திரேலியா பல ஆண்டுகளாக விடுபட்ட ஒரே கண்டப் பகுதியாக இருந்தது.

வெள்ளிக்கிழமை நிலவரப்படி, நாடு முழுவதும் 341 உறுதி செய்யப்பட்ட அல்லது சந்தேகிக்கப்படும் எச்5 பறவைக் காய்ச்சல் பாதிப்பு நிகழ்வுகளை ஆஸ்திரேலிய அதிகாரிகள் பதிவு செய்துள்ளனர். கோழிகளிலோ, நாட்டின் வேளாண் உற்பத்தியிலோ எந்த பாதிப்பு நிகழ்வும் கண்டறியப்படவில்லை.