ஓசெம்பிக், வெகோவி மருந்துகள்: ஆண்களுக்கு முடி உதிர்வு அபாயம் அதிகரிப்பா?

ஆண்பால் முடி உதிர்வு எனப்படும் பொதுவான பரம்பரை முடி உதிர்வுக்கு மரபணு ரீதியாக ஏற்கனவே ஆளாகும் ஆண்கள் உள்ளனர். இவர்களுக்கு, ஓசெம்பிக், வெகோவி, ஸெபவுண்ட் போன்ற GLP-1 (குளூக்காகன்-போன்ற பெப்டைட்-1) மருந்துகளால் கூடுதலாக 7% முடி உதிர்வு அபாயம் ஏற்படக்கூடும். இதை நியூயார்க் பல்கலைக்கழக லாங்கோன் ஹெல்த் ஆய்வாளர்களின் புதிய ஆய்வு தெரிவிக்கிறது. இந்த மருந்துகள் சர்க்கரை நோய் மற்றும் உடல் பருமனுக்கு பரிந்துரைக்கப்படுகின்றன.

GLP-1 ஏற்பியை உருவாக்கும், அதன் புரத அளவையும் பாதிக்கும் GLP1R எனும் மரபணுவை ஆய்வாளர்கள் ஆராய்ந்தனர். அதன் செயல்பாட்டை GLP-1 மருந்து செயல்பாட்டின் அளவுகோலாகக் கொண்டனர். அதிக GLP1R செயல்பாட்டுடன் தொடர்புடைய மரபணு வகைகளை, ஆண்பால் முடி உதிர்வு உள்ள ஆண்களின் மரபணுக்களுடன் ஒப்பிட்டனர். இது தலையின் உச்சி மற்றும் முன்பகுதியை பாதிக்கும் பரம்பரை முடி உதிர்வு. அதிக GLP-1 ஏற்பி அளவுக்கு தொடர்புடைய மரபணு மாறுபாடுகள் இந்த ஆண்களில் அதிகம் காணப்பட்டன. இரத்த அழுத்த அதிகரிப்பு (hypertension) தலைத்தோலுக்கான இரத்த ஓட்டத்தைப் பாதித்து முடி உதிர்வை ஏற்படுத்தும் அறியப்பட்ட காரணி. இதை கணக்கில் கொண்ட பின்னரும் இந்த தொடர்பு நீடித்தது.

இன்சுலின் எதிர்ப்பு அல்லது குறைந்த டெஸ்டோஸ்டிரோன் இந்த தொடர்புக்கு காரணமா என ஆய்வாளர்கள் பரிசோதித்தனர். இரண்டும் காரணமாக இல்லை என தெரிந்தது. கூடுதல் 7% அபாயமும் மாறாமல் இருந்தது. 'GLP-1 பயன்பாட்டுக்கும் ஆண்பால் முடி உதிர்வு அபாய அதிகரிப்புக்கும் இடையிலான முதல் மரபணு தொடர்பை எங்கள் ஆய்வு காட்டுகிறது. நீண்ட காலமாக சந்தேகிக்கப்பட்ட இந்த தொடர்பு இதுவரை அறிவியல் பூர்வமாக நிரூபிக்கப்படவில்லை' என்று நியூயார்க் பல்கலைக்கழக கிராஸ்மேன் மருத்துவப் பள்ளியின் மூத்த ஆய்வாளர் லின் பெட்டுகோவா கூறினார்.

GLP-1 மருந்துகளை பயன்படுத்துவோர் முன்பே முடி இளசாதல் குறித்து தெரிவித்துள்ளனர். இது பெரும்பாலும் இந்த மருந்துகள் ஏற்படுத்தும் விரைவான எடை இழப்புடன் தொடர்புபடுத்தப்பட்டது. எடை நிலைப்படுத்தப்பட்ட பின் முடி மீண்டும் வளர்கிறது. செப்டம்பர் 3-ஆம் தேதி ஜர்னல் ஆஃப் இன்வெஸ்டிகேட்டிவ் டெர்மடாலஜி இதழில் இந்த கண்டுபிடிப்புகள் வெளியாயின. இவை, GLP-1 மருந்துகளை பரிந்துரைப்பதற்கு முன் நோயாளிகளுக்கு முடி உதிர்வு அபாயத்தை பரிசோதிக்கவோ, மினாக்சிடில் போன்ற மருந்துகளுடன் இணைந்து பரிந்துரைக்கவோ உதவக்கூடும் என பெட்டுகோவா தெரிவித்தார். பெண்களிலும் இந்த ஆய்வு தொடரும் என்றார்.

இந்த பகுப்பாய்வு இரு பெரிய மரபணு தரவுத்தளங்களை பயன்படுத்தியது. ஒன்று, 31,684 பேரின் தரவுகளைக் கொண்ட eQTLGen தரவுத்தளம். மற்றொன்று, பெரும்பாலும் வெள்ளையின ஆண்கள் 205,327 பேரின் தரவுகளைக் கொண்ட காம்ப்ளக்ஸ் ட்ரெய்ட்ஸ் ஜெனெடிக்ஸ் குழு தரவுத்தளம். 50 வயதுக்கு மேற்பட்ட வெள்ளையின அமெரிக்க ஆண்களில் பாதி பேர் ஆண்பால் முடி உதிர்வால் பாதிக்கப்படுவதாக மதிப்பிடப்பட்டுள்ளது. எடை இழப்புக்காக மட்டும் GLP-1 மருந்துகளை பயன்படுத்தியவர்களின் விகிதம் அமெரிக்காவில் 12% எனவும் மதிப்பிடப்பட்டுள்ளது.