30 ஆண்டுகளாகத் தொடர்ந்து சுருங்கும் கிரீன்லாந்து பனிப்பாளம்

கிரீன்லாந்து தீவின் பரப்பளவில் சுமார் 80 சதவீதத்தை மூடியிருக்கும் பனிப்பாளம், தொடர்ந்து 30 ஆண்டுகளாகச் சுருங்கி வருகிறது. இதை டென்மார்க், கிரீன்லாந்தின் புவியியல் ஆய்வு நிறுவனம் (GEUS) தெரிவித்துள்ளது. ஒவ்வோர் ஆண்டும் பனிப்பாளம் பெறுவதைவிட அதிகமாக இழக்கும் நிலையை 'எதிர்மறை மொத்த நிறை சமநிலை' என அழைக்கின்றனர். இந்த மூன்று தசாப்த போக்கை ஆய்வாளர்கள் ஒரு 'காலநிலை சமிக்ஞை' என வர்ணிக்கின்றனர்.

பனிப்பாளத்தின் மொத்த நிறை சமநிலை கடைசியாக 1995/96 உருகும் பருவத்தில் அதிகரித்தது. அதன் பின் ஒவ்வோர் ஆண்டும் இது எதிர்மறையாகவே உள்ளது. மிகச் சமீபத்திய 2025/26 உருகும் பருவத்தில், சுமார் 173 பில்லியன் டன் பனி இழக்கப்பட்டது. அதற்கு முந்தைய பருவத்தில் 130 பில்லியன் டன் இழப்பு இருந்தது. பதிவுசெய்யப்பட்ட மிகப்பெரிய தனி ஆண்டு இழப்பான 458 பில்லியன் டன், 2012ஆம் ஆண்டு அளவிடப்பட்டது.

"ஒரு தனி ஆண்டு வானிலையால் பெரிதும் பாதிக்கப்படலாம். எனவே அது நீண்டகால காலநிலைப் போக்குகள் குறித்து அதிகம் தெரிவிக்காது," என்று ஜியஸ் நிறுவனத்தின் பனியியல், காலநிலைத் துறை ஆய்வாளர் சிக்னே ஹில்லெருப் லார்சன் கூறினார். "அதனால்தான் காலநிலை குறித்துக் கூற வேண்டியிருக்கும்போது ஆய்வாளர்களாகிய நாங்கள் பொதுவாக 30 ஆண்டு காலகட்டத்தைப் பார்க்கிறோம்," என்று அவர் மேலும் கூறினார். கிரீன்லாந்து பனிப்பாளம் இப்போது தொடர்ந்து 30 ஆண்டுகள் ஒட்டுமொத்த சுருக்கத்தைக் கண்டுள்ளது என்று அவர் சுட்டிக்காட்டினார். "பூமி வெப்பமடைதல் உருகலை விரைவுபடுத்தி, காலப்போக்கில் கிரீன்லாந்து பனிப்பாளத்தைச் சுருக்கிக்கொண்டிருக்கிறது என்பதை இது கடுமையாக அடிக்கோடிட்டுக் காட்டுகிறது," என்று அவர் கூறினார்.