ஈயத் தொடர்பு, அல்சைமர் புரதத்துடன் இணைந்து செல் சேதத்தை மோசமாக்குகிறது: ஐசிஎம்ஆர்-என்ஐஎன் ஆய்வு

அல்சைமர் நோயின் நோய் இயல்பில் முக்கியப் பங்கு வகிக்கும் புரத துண்டுகளான அமிலாய்டு-பீட்டா இருக்கும் நிலையில், சுற்றுச்சூழல் ஈயத்திற்கு வெளிப்படுவது நரம்பு செல்களின் கழிவு-அகற்றும் அமைப்பை கணிசமாகக் குலைக்கக்கூடும். இதை ஐதராபாத்தை தளமாகக் கொண்ட ஐசிஎம்ஆர்-தேசிய ஊட்டச்சத்து நிறுவன ஆராய்ச்சியாளர்கள் கண்டறிந்துள்ளனர். இந்த ஆய்வு ஜர்னல் ஆஃப் அப்ளைடு டாக்சிகாலஜி என்ற சர்வதேச இதழில் வெளியிடப்பட்டுள்ளது.

ஈயம் மற்றும் இரண்டு வகையான அமிலாய்டு-பீட்டா புரதங்களின் விளைவுகளை மனித நரம்பு செல்களில் ஆய்வகத்தில் ஆராய்ச்சியாளர்கள் ஆய்வு செய்தனர். ஈயம் அல்லது அமிலாய்டு-பீட்டா தனித்தனியே செல்லின் உள் கழிவு அகற்றும் அமைப்பான லைசோசோம் (lysosome) செயல்பாட்டில் ஓரளவு சேதத்தை ஏற்படுத்தின என NIN ஆராய்ச்சியாளர்கள் ஒரு அறிக்கையில் தெரிவித்தனர். ஆனால் இரண்டும் இணைந்து செயல்படும்போது மிக அதிக சிதைவை ஏற்படுத்தின: செல் உயிர்வாழும் தன்மையைக் குறைத்தன, லைசோசோம்கள் இயல்பாக செயல்பட தேவையான அமில சூழலைக் குலைத்தன, அவற்றின் அமைப்பையும் சேதப்படுத்தின.

"அமிலாய்டு-பீட்டா இருக்கும் நிலையில், ஈயத்திற்கு வெளிப்படுவது லைசோசோம் செயலிழப்பை கணிசமாக மோசமாக்குகிறது என்பதை எங்கள் கண்டுபிடிப்புகள் காட்டுகின்றன. இந்த செல் மாற்றங்களைப் புரிந்துகொள்வது, சுற்றுச்சூழல் வெளிப்பாடுகள் நரம்பு செல் ஆரோக்கியத்தை எவ்வாறு பாதிக்கலாம் என்பதை நன்கு புரிந்துகொள்ள உதவும்" என்று டாக்டர் சுரேஷ் சல்லா தெரிவித்தார். இவரே இந்த ஆராய்ச்சிக் குழுவிற்குத் தலைமை தாங்கினார். இவர் ஐசிஎம்ஆர்-என்ஐஎன் செல் உயிரியல் பிரிவு தலைவரும் அறிவியலாளர்-ஜி பதவியில் உள்ளவருமாவார்.

சுற்றுச்சூழல் ஈயத்திற்கு வெளிப்படுவது, அமிலாய்டு-பீட்டாவுடன் தொடர்புடைய செல் அழுத்தத்தை மேலும் அதிகரிக்கக்கூடும் என கண்டுபிடிப்புகள் தெரிவிக்கின்றன. இது நரம்பு செல்களை சேதத்திற்கு மேலும் பாதிக்கக்கூடியதாக ஆக்கக்கூடும். சுற்றுச்சூழல் காரணிகள், அல்சைமர் நோய் மற்றும் டிமென்ஷியா போன்ற நரம்பியல் சிதைவு கோளாறுகளுடன் தொடர்புடைய செல் மாற்றங்களுக்கு எவ்வாறு பங்களிக்கலாம் என்பதற்கான மேலும் ஒரு பார்வையை இது அளிக்கிறது. சுற்றுச்சூழல் மாசுக்கள் மற்றும் உயிரியல் காரணிகளுக்கு இடையேயான தொடர்பைப் புரிந்துகொள்வது மூளை ஆரோக்கியத்தைப் பேணுவதில் முக்கியமானது என இந்த ஆய்வு எடுத்துக்காட்டுகிறது. ஐசிஎம்ஆர்-என்ஐஎன் இயக்குநர் டாக்டர் பாரதி குல்கர்ணி இதைத் தெரிவித்தார்.