நாசாவின் ரோமன் தொலைநோக்கிக்கு இறுதி அனுமதி. ஆகஸ்ட் 30-இல் ஏவல்

நாசாவின் நான்சி கிரேஸ் ரோமன் விண்வெளித் தொலைநோக்கி, ஏவப்படுவதற்கு முன் ஒரு முக்கியமான கட்டத்தைக் கடந்துள்ளது. புளோரிடாவின் கென்னடி விண்வெளி மையத்தில், நாசா, ரோமன் திட்டக் குழு மற்றும் ஸ்பேஸ்எக்ஸ் (SpaceX) நிறுவனத்தின் தலைமைப் பொறுப்பாளர்கள் இணைந்து பறப்புத் தயார்நிலை மதிப்பாய்வு நடத்தினர். விண்கலம், ராக்கெட், ஏவுதளம் மற்றும் திட்டத்தின் ஒட்டுமொத்த நிலை ஆகியவை இதில் பரிசோதிக்கப்பட்டன. மதிப்பாய்வுக்குப் பிறகு, ரோமன் இறுதிக் கட்ட தயாரிப்புகளுக்குச் செல்லலாம் என அதிகாரிகள் உறுதி செய்தனர்.

ஆகஸ்ட் 30, ஞாயிற்றுக்கிழமை காலை (அமெரிக்க கிழக்குப் பகுதி நேரப்படி 7:26 மணிக்கு) கென்னடி விண்வெளி மையத்தின் 39ஏ ஏவுதளத்தில் இருந்து ரோமன் தொலைநோக்கியை ஏவ நாசாவும் ஸ்பேஸ்எக்ஸும் திட்டமிட்டுள்ளன. ஸ்பேஸ்எக்ஸின் மிகவும் சக்திவாய்ந்த ராக்கெட்டுகளில் ஒன்றான பால்கன் ஹெவி ராக்கெட்டில் இது செலுத்தப்படும். மூன்று ராக்கெட் புஸ்டர்கள் இணைந்து இயங்கும் இந்த ராக்கெட், பெரிய விண்கலங்களைச் சுமந்து செல்லத் தேவையான உந்துவிசையை அளிக்கிறது. ஏவுதலின்போது காற்றியக்க அழுத்தத்திலிருந்தும் வளிமண்டலத்திலிருந்தும் விண்கலத்தைப் பாதுகாக்கும் ஃபேரிங் (fairing) எனப்படும் பாதுகாப்புக் கூட்டுக்குள் ரோமன் தொலைநோக்கி ஏற்கெனவே பொருத்தப்பட்டுள்ளது.

அடுத்த சில நாட்களில், ஃபேரிங்குள் அடைக்கப்பட்ட ரோமன் விண்கலனை ஸ்பேஸ்எக்ஸின் 39ஏ ஏவுதள கிடங்கிற்கு குழுக்கள் நகர்த்தும். அங்கு தொழில்நுட்ப வல்லுநர்கள் அதை ராக்கெட்டுடன் இணைப்பர். அந்த வேலை முடிந்தவுடன், பால்கன் ஹெவி ராக்கெட்டும் ரோமன் தொலைநோக்கியும் இறுதிக் கட்ட ஏவுதல் தயாரிப்புகளுக்காக ஏவுதளத்திற்கு கொண்டு செல்லப்படும்.

முந்தைய திட்டங்களை விட பரந்த அளவில் அண்டத்தை ஆராய வடிவமைக்கப்பட்ட நாசாவின் புதிய விண்வெளித் தொலைநோக்கி இதுவாகும். அண்டம் எவ்வாறு பரிணமித்தது, அதன் விரிவாக்கத்திற்கு என்ன காரணம் என்பதை ஆராய விஞ்ஞானிகள் இதைப் பயன்படுத்தத் திட்டமிட்டுள்ளனர். சூரிய குடும்பத்திற்கு வெளியே உள்ள நட்சத்திரங்களைச் சுற்றும் கோள்களான எக்சோபிளானட்களைக் கண்டறியவும் இது உதவும். வானத்தின் பரந்த பகுதிகளை ஆய்வு செய்வதன் வழியாக, அண்டத்தின் வரலாறு மற்றும் அமைப்பு குறித்த ஆய்வுக்கு ரோமன் தொலைநோக்கி ஒரு சக்திவாய்ந்த புதிய வழியை வழங்கும் எனத் தெரிவிக்கப்படுகிறது.