385 மில்லியன் ஆண்டுகளுக்கு முன் கவச மீன்கள் கடின இரையை உடைத்த இரு வழிமுறைகள்

டைனோசர்கள் தோன்றுவதற்கு முன்பே, பிளாகோடெர்ம் எனப்படும் கவச மீன்கள் தோன்றின. தாடையும் பற்களும் பெற்ற முதல் முதுகெலும்பு உயிரிகள் இவையே — இவை 400 மில்லியனுக்கும் மேற்பட்ட ஆண்டுகளுக்கு முன்பு தோன்றியவை. தொல் கடல்களில் உயிர்வாழ, இவை நொறுக்கும் கடி முறையை வளர்த்துக்கொண்டன. ஆஸ்திரேலியாவின் ஃப்ளிண்டர்ஸ் பல்கலைக்கழக ஆய்வாளர்கள், தற்போதைய வடக்கு மேற்கு ஆஸ்திரேலியாவை உள்ளடக்கிய 385 மில்லியன் ஆண்டுகள் பழமையான பாறை முகடு அமைப்பின் தொல்லுயிர் எச்சங்களை ஆய்வு செய்தனர். இதன்மூலம், இந்த ஆரம்பகால தாடை மீன்கள் கவசம் அணிந்த இரையை கடிப்பதற்கு இரண்டு வேறுபட்ட முறைகளை வளர்த்திருந்தது கண்டறிந்தனர்.

இந்த ஆய்வின் முதன்மை ஆசிரியர் டாக்டர் ரெக்ஸ் மிட்செல் ஆவார். ஆய்வாளர்கள், எட்டு பிளாகோடெர்ம் இனங்கள் எவ்வாறு இரை உண்டன என்பதை மீளுருவாக்கம் செய்தனர். இதற்காக, ஃபைனைட் எலிமென்ட் அனாலிசிஸ் எனப்படும் புதிய பொறியியல் கணினி நுட்பத்தையும், முப்பரிமான டிஜிட்டல் கடி சிமுலேஷன்களையும் அவர்கள் பயன்படுத்தினர். சயின்டிஃபிக் ரிப்போர்ட்ஸ் இதழில் வெளியான இந்த ஆய்வு, தொல்லுயிர் தாடை எலும்புகள் தாங்கிய கடி விசைகளை மாதிரியாக்கி, ஒவ்வொரு இனத்தின் கடிக்கும் மேற்பரப்பின் சிக்கல்தன்மையுடன் ஒப்பிட்டது.

சிறிய பிளாகோடெர்ம் இனங்கள், இரையை முழுமையாக நொறுக்குவதற்கு அகன்ற, தட்டையான நொறுக்கு தட்டுகளை பயன்படுத்தின. ஆனால் பெரிய இனங்களோ, முழுமையாக விழுங்க முடியாத அளவு பெரிய கவச இரையை குத்திப் பிளக்க, உயர்ந்த எலும்பு முகடு ஒன்றில் அமைந்த ஆயுதம் போன்ற பற்களை வளர்த்திருந்தன. இடைக்கால போர் சுத்தியல்கள், போலாக்ஸ்கள் போன்ற ஆயுதங்களின் தலைப்பகுதியை ஒத்த அமைப்பு இது. மிகச் சிறிய இனமும், மிகப் பெரிய இனமும் — முற்றிலும் வேறுபட்ட கடி கருவிகளை பயன்படுத்தினாலும் — கடினமான கடிகளை தாங்கும் மிக வலிமையான தாடைகளை பெற்றிருந்தன. இது ஆச்சரியமாக இருந்தது என, ஃப்ளிண்டர்ஸ் பல்கலைக்கழகத்தின் ARC ஃப்யூச்சர் ஃபெலோ டாக்டர் ஆலிஸ் க்ளெமெண்ட் மற்றும் முனைவர் பட்ட ஆய்வு மாணவர் ஆஸ்டின் ஃபிட்ஸ்பேட்ரிக் தெரிவித்தனர்.

இரையின் அளவும் வேட்டையாடியின் அளவும் இணைந்த உறவே இதற்குக் காரணம் என ஆய்வாளர்கள் கருதுகின்றனர்: சிறிய கவச இரையை முழுமையாக விழுங்கி, தட்டையான தட்டுகளுக்கு இடையே நொறுக்கிவிடலாம். ஆனால் பெரிய இரையை முதலில் சிறிய துணுக்குகளாக உடைக்க வேண்டும் — இதற்கு கவசத்தை குத்திப் பிளக்கும் சிக்கலான பல் அமைப்புகள் தேவைப்பட்டன. மனிதர்களைப் போல அல்லாமல், பிளாகோடெர்ம்களுக்கு ஒரே கீழ்த்தாடை எலும்பு இருக்கவில்லை; அதற்குப் பதிலாக, குருத்தெலும்பால் தாங்கப்பட்ட இரட்டை எலும்பு தட்டுகளே அவற்றின் தாடையாக அமைந்திருந்தன.

இந்த ஆய்வின் இணை ஆசிரியர் ஃப்ளிண்டர்ஸ் பல்கலைக்கழக மூத்த பேராசிரியர் ஜான் லாங், மேற்கு ஆஸ்திரேலிய தொல்லுயிர் எச்ச தளத்தில் 40 ஆண்டுகளாக பணியாற்றி வருகிறார். 2013ஆம் ஆண்டு முதல் பிளாகோடெர்ம்கள் மனித பரிணாம வளர்ச்சியுடன் நேரடியாக தொடர்புபடுத்தப்பட்டுள்ளதாக அவர் தெரிவித்தார். மீன்கள் முதல் மனிதர்கள் வரையிலான தொடர்ச்சியின் தொடக்கமாக அவை கருதப்படுவதாகவும் அவர் குறிப்பிட்டார்.